ନୂଆଦିଲ୍ଲୀ, ୧୪ ଅକ୍ଟୋବର (ହି.ସ.)। କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (କ୍ୟାଟ୍) ବୁଧବାର କହିଛି ଯେ ଚଳିତ ବର୍ଷ ନବରାତ୍ରିରୁ ଦୀପାବଳି ପର୍ଯ୍ୟନ୍ତ ସାରା ଦେଶରେ ୭ ଲକ୍ଷ କୋଟି ଟଙ୍କାରୁ ଅଧିକ ଉତ୍ସବକାଳୀନ ବ୍ୟବସାୟ ହେବାର ଆକଳନ କରାଯାଇଛି। ଗତ ବର୍ଷର ରେକର୍ଡ ବ୍ୟବସାୟ ତୁଳନାରେ ଏହା ପ୍ରାୟ ୧୫ରୁ ୧୮ ପ୍ରତିଶତ ଅଧିକ ହୋଇପାରେ। ନବରାତ୍ରି ଏବଂ ଦୁର୍ଗାପୂଜା ପରେ ଦଶହରା, କରୱା ଚୌଥ, ଧନତେରସ, ଦୀପାବଳି, ଗୋବର୍ଦ୍ଧନ ପୂଜା, ଭାଇ ଦୂଜ, ଛଠ୍ ପୂଜା, ଗୁରୁ ନାନକ ଜୟନ୍ତୀ ଏବଂ ତୁଳସୀ ବିବାହ ଭଳି ପର୍ବପର୍ବାଣୀ ସାରା ଦେଶରେ ବ୍ୟାପକ ଭାବେ ପାଳନ କରାଯାଏ।

କ୍ୟାଟ୍ର ଜାତୀୟ ମହାସଚିବ ତଥା ଚାନ୍ଦନୀ ଚୌକରୁ ଭାରତୀୟ ଜନତା ପାର୍ଟି (ବିଜେପି) ସାଂସଦ ପ୍ରବୀଣ ଖଣ୍ଡେଲୱାଲ କହିଛନ୍ତି ଯେ ଦେଶର ବିଭିନ୍ନ ରାଜ୍ୟର ପ୍ରମୁଖ ବ୍ୟବସାୟୀ ସଂଗଠନ ଏବଂ ବଜାରଗୁଡ଼ିକରୁ ମିଳିଥିବା ମତାମତ, ଗ୍ରାହକଙ୍କ ଚାହିଦା, ପର୍ବପର୍ବାଣୀ ସମୟରେ କିଣାକିଣିର ଧାରା, ଗ୍ରାମୀଣ ଓ ଅର୍ଦ୍ଧ-ସହରାଞ୍ଚଳ ବଜାରରେ ବୃଦ୍ଧି ପାଉଥିବା ସକ୍ରିୟତା, ସ୍ଥାନୀୟ ଉତ୍ପାଦଗୁଡ଼ିକର ବଢ଼ୁଥିବା ଚାହିଦା ଏବଂ ବିଭିନ୍ନ କ୍ଷେତ୍ରରେ ହେଉଥିବା ବ୍ୟାପକ ଆର୍ଥିକ କାର୍ଯ୍ୟକଳାପକୁ ଆଧାର କରି ଏହି ପ୍ରାରମ୍ଭିକ ଆକଳନ ପ୍ରସ୍ତୁତ କରାଯାଇଛି।

ବିଜେପି ସାଂସଦ କହିଛନ୍ତି ଯେ ଗତ ବର୍ଷ ଦୀପାବଳି ଅବସରରେ ସାରା ଦେଶରେ ପ୍ରାୟ ୬.୦୫ ଲକ୍ଷ କୋଟି ଟଙ୍କାର ରେକର୍ଡ ବ୍ୟବସାୟ ହୋଇଥିଲା। ଏଥିରେ ପ୍ରାୟ ୫.୪୦ ଲକ୍ଷ କୋଟି ଟଙ୍କାର ସାମଗ୍ରୀ ବ୍ୟବସାୟ ଏବଂ ୬୫,୦୦୦ କୋଟି ଟଙ୍କାର ସେବା କ୍ଷେତ୍ରର ବ୍ୟବସାୟ ସାମିଲ ଥିଲା। ଚଳିତ ବର୍ଷ ଉତ୍ସବକାଳୀନ କାର୍ଯ୍ୟକଳାପ ଆହୁରି ବ୍ୟାପକ ହେବାର ସମ୍ଭାବନା ଥିବାରୁ ମୋଟ ବ୍ୟବସାୟ ୭ ଲକ୍ଷ କୋଟି ଟଙ୍କା ଅତିକ୍ରମ କରିପାରେ।

ହିନ୍ଦୁସ୍ଥାନ ସମାଚାର / ସ୍ୱାଗତିକା