ନୂଆଦିଲ୍ଲୀ, ୧୪ ଅକ୍ଟୋବର (ହି.ସ.)। ଦିଲ୍ଲୀର ଜନ୍ତର ମନ୍ତରଠାରେ ପ୍ରଦର୍ଶନ ମାମଲାରେ କାକରୋଚ୍ ଜନତା ପାର୍ଟି (ସିଜେପି)ର ଦୁଇ ନେତାଙ୍କୁ ପାଞ୍ଚ ଦିନ ପାଇଁ ନ୍ୟାୟିକ ହେପାଜତକୁ ପଠାଯାଇଛି। ସ୍ୱତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ନ୍ୟାୟିକ ହେପାଜତକୁ ପଠାଇବା ପାଇଁ ଆଦେଶ ଦେଇଛନ୍ତି।

ପ୍ରକୃତରେ, ଦିଲ୍ଲୀ ପୁଲିସ ସିଜେପିର ମୁଖପାତ୍ର ସୌରଭ ଦାସ, ଆଶୁତୋଷ ରାଙ୍କା ଓ ଅଜିଙ୍କ୍ୟ ସିନ୍ଧେଙ୍କ ସମେତ ୧୪ ଜଣ ସଦସ୍ୟଙ୍କ ବିରୋଧରେ କନଟ୍ ପ୍ଲେସ୍ ଓ ପାର୍ଲାମେଣ୍ଟ ଷ୍ଟ୍ରିଟ୍ ଥାନାରେ ପୃଥକ୍ ପୃଥକ୍ ଦୁଇଟି ଏତଲା ରୁଜୁ କରିଛି। ପୁଲିସ ଅନୁଯାୟୀ, ଅକ୍ଟୋବର ୧୩ ତାରିଖରେ ସିଜେପିର ଏହି ସଦସ୍ୟମାନେ ନିଷିଦ୍ଧ ଜନ୍ତର ମନ୍ତରରେ ଏକ ଘରୋଇ ପରିସର ଦେଇ ପ୍ରବେଶ କରିଥିଲେ ଏବଂ ପୁଲିସ କର୍ମଚାରୀଙ୍କ କାର୍ଯ୍ୟରେ ବାଧା ସୃଷ୍ଟି କରିଥିଲେ। ଏହା ପରେ ପୁଲିସ ତିନି ନେତାଙ୍କୁ ଅଟକ ରଖିଥିଲା।

ବୁଧବାର ସକାଳେ ତିନି ଜଣଙ୍କୁ ସ୍ୱତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ଙ୍କ ସମ୍ମୁଖରେ ହାଜର କରାଯାଇଥିଲା। ଏହା ପରେ ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ପାଞ୍ଚ ଦିନ ପାଇଁ ନ୍ୟାୟିକ ହେପାଜତକୁ ପଠାଯାଇଥିବା ବେଳେ ଅଜିଙ୍କ୍ୟ ସିନ୍ଧେଙ୍କୁ ଛଅ ମାସ ପର୍ଯ୍ୟନ୍ତ ଶାନ୍ତି ବଜାୟ ରଖିବା ପାଇଁ ୫,୦୦୦ ଟଙ୍କାର ବ୍ୟକ୍ତିଗତ ମୁଚାଲିକାରେ ବାନ୍ଧି ରଖାଯାଇଛି।

ଦିଲ୍ଲୀ ପୁଲିସ ଜନ୍ତର ମନ୍ତରକୁ ସରକାରୀ ବିରୋଧ ପ୍ରଦର୍ଶନ ସ୍ଥଳ ତାଲିକାରୁ ବାଦ୍ ଦେଇଛି। ଅର୍ଥାତ୍ ଏବେ ଜନ୍ତର ମନ୍ତରରେ କୌଣସି ପ୍ରଦର୍ଶନ କରାଯାଇପାରିବ ନାହିଁ। ଏହି ନିଷ୍ପତ୍ତିକୁ ବିରୋଧ କରି ସିଜେପି ନେତାମାନେ ପ୍ରଦର୍ଶନ କରିଥିଲେ।

ନୂଆଦିଲ୍ଲୀ ଜିଲ୍ଲାର ପୁଲିସ ଉପାୟୁକ୍ତ ସଚିନ ଶର୍ମାଙ୍କ ଅନୁଯାୟୀ, ଏହି ଘଟଣା ଅକ୍ଟୋବର ୧୩ ତାରିଖ ସକାଳର। ଜନ୍ତର ମନ୍ତରରେ ପ୍ରଦର୍ଶନ କରିବାକୁ ପହଞ୍ଚିଥିବା ସିଜେପି ସଦସ୍ୟମାନଙ୍କୁ ସେଠାରେ ମୁତୟନ ପୁଲିସ କର୍ମଚାରୀ ଅଟକାଇବାକୁ ଚେଷ୍ଟା କରିଥିଲେ। ଅଭିଯୋଗ ଅନୁଯାୟୀ, ଏହା ସତ୍ତ୍ୱେ କର୍ମୀମାନେ ଏକ ଘରୋଇ ପରିସର ଦେଇ ଭିତରକୁ ପ୍ରବେଶ କରିଥିଲେ ଏବଂ ପୁଲିସ କର୍ମଚାରୀଙ୍କ କାର୍ଯ୍ୟରେ ବାଧା ଦେଇଥିଲେ। ପୁଲିସ ସମସ୍ତ ୧୪ ଜଣ ସଦସ୍ୟଙ୍କୁ ଅଟକ ରଖି ସମ୍ପୃକ୍ତ ଆଇନଗତ ବ୍ୟବସ୍ଥା ଅନୁଯାୟୀ ପଦକ୍ଷେପ ନେଇଥିଲା।

ପୁଲିସ ଅନୁଯାୟୀ, ଏହି ମାମଲାରେ ପ୍ରଥମ ଏତଲା କନଟ୍ ପ୍ଲେସ୍ ଥାନାରେ ଏଫ୍ଆଇଆର୍ ନମ୍ବର ୨୮୯/୨୬ ଅନୁଯାୟୀ ରୁଜୁ ହୋଇଛି। ଏଥିରେ ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ଧାରା ୨୨୩(ଏ), ୩୩୨ ଓ ୬୧(୨) ଲାଗୁ କରାଯାଇଛି। ଦ୍ୱିତୀୟ ଏତଲା ସଂସଦ ମାର୍ଗ ଥାନାରେ ଏଫ୍ଆଇଆର୍ ନମ୍ବର ୧୨୮/୨୬ ଅନୁଯାୟୀ ରୁଜୁ ହୋଇଛି। ଏଥିରେ ବିଏନ୍ଏସ୍ର ଧାରା ୨୨୧, ୧୧୫(୨), ୧୩୨, ୧୨୧(୧) ଓ ୩(୫) ଅନୁଯାୟୀ ମାମଲା ରୁଜୁ ହୋଇଛି। ଉଭୟ ମାମଲାରେ ମୋଟ ୧୪ ଜଣ ସଦସ୍ୟଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯାଇଛି। ସିଜେପିର ପ୍ରମୁଖ ସଦସ୍ୟ ଆଶୁତୋଷ ରାଙ୍କା, ସୌରଭ ଦାସ ଓ ଅଜିଙ୍କ୍ୟ ସିନ୍ଧେଙ୍କ ବିରୋଧରେ ପୁଲିସ ପୃଥକ୍ ଭାବେ ନିରାକରଣମୂଳକ ପଦକ୍ଷେପ ମଧ୍ୟ ନେଇଛି।

ପୁଲିସର ଅଭିଯୋଗ ଅନୁଯାୟୀ, ଏହି ସଦସ୍ୟମାନଙ୍କ କାର୍ଯ୍ୟକଳାପ ଯୋଗୁଁ ସାର୍ବଜନୀନ ଶାନ୍ତି ଭଙ୍ଗ ହେବା ଏବଂ ଆଇନଶୃଙ୍ଖଳା ପରିସ୍ଥିତି ପ୍ରଭାବିତ ହେବାର ଆଶଙ୍କା ରହିଥିଲା। ଏହା ସହିତ, ତିନି ଜଣ ନେତା ସାମାଜିକ ଗଣମାଧ୍ୟମ ମାଧ୍ୟମରେ ଅନ୍ୟ ଲୋକଙ୍କୁ ମଧ୍ୟ ଏଭଳି କାର୍ଯ୍ୟକଳାପ ପାଇଁ ଉସୁକାଇବାକୁ ଚେଷ୍ଟା କରୁଥିବା ପୁଲିସ ଅଭିଯୋଗ କରିଛି। ଏହି ଆଧାରରେ ସେମାନଙ୍କୁ ସମ୍ପୃକ୍ତ ଆଇନଗତ ବ୍ୟବସ୍ଥା ଅନୁଯାୟୀ ଗିରଫ କରି ସ୍ୱତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ (ଏସ୍ଇଏମ୍)ଙ୍କ ସମ୍ମୁଖରେ ହାଜର କରାଯାଇଥିଲା।

ପୁଲିସ ଅନୁଯାୟୀ, ତିନି ଜଣ ସଦସ୍ୟଙ୍କ ବିରୋଧରେ ଭାରତୀୟ ନାଗରିକ ସୁରକ୍ଷା ସଂହିତା (ବିଏନ୍ଏସ୍ଏସ୍)ର ଧାରା ୧୨୬ ଓ ୧୭୦ ଅନୁଯାୟୀ ପଦକ୍ଷେପ ଆରମ୍ଭ କରାଯାଇଥିଲା। ସେମାନଙ୍କୁ ମୁକ୍ତ କରାଗଲେ ପୁଣିଥରେ ଆଇନ ଉଲ୍ଲଂଘନ କରିବା ସହ ଅନ୍ୟମାନଙ୍କୁ ମଧ୍ୟ ସେଥିପାଇଁ ଉସୁକାଇବାର ଆଶଙ୍କା ଥିବା ପୁଲିସ କହିଥିଲା। ମାମଲାର ବିଚାର କରିବା ପରେ ସ୍ୱତନ୍ତ୍ର କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ପାଞ୍ଚ ଦିନ ପାଇଁ ନ୍ୟାୟିକ ହେପାଜତକୁ ପଠାଇବାକୁ ଆଦେଶ ଦେଇଥିଲେ। ଅନ୍ୟପକ୍ଷରେ, ଅଜିଙ୍କ୍ୟ ସିନ୍ଧେଙ୍କୁ ଛଅ ମାସ ପର୍ଯ୍ୟନ୍ତ ଶାନ୍ତି ଓ ସଦ୍ବ୍ୟବହାର ବଜାୟ ରଖିବା ପାଇଁ ବାଧ୍ୟ କରାଯାଇଛି। ତାଙ୍କୁ ୫,୦୦୦ ଟଙ୍କାର ବ୍ୟକ୍ତିଗତ ମୁଚାଲିକା ସହ ସମାନ ପରିମାଣର ଜାମିନଦାର ରାଶିରେ ବଣ୍ଡ୍ ଭରିବାକୁ ନିର୍ଦ୍ଦେଶ ଦିଆଯାଇଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା