କାଠମାଣ୍ଡୁ, ୧୪ ଅକ୍ଟୋବର (ହି.ସ.)। ସରକାରୀ ବିଦ୍ୟାଳୟ ପ୍ରତି ଛାତ୍ରଛାତ୍ରୀ ଓ ଅଭିଭାବକଙ୍କ ବଢ଼ୁଥିବା ଆକର୍ଷଣକୁ ଆହୁରି ମଜବୁତ କରିବା ଉଦ୍ଦେଶ୍ୟରେ ନେପାଳ ସରକାର ବିଦ୍ୟାଳୟଗୁଡ଼ିକର ଭିତ୍ତିଭୂମି ବିକାଶ ପାଇଁ ଏକ ଯୋଜନା ଆରମ୍ଭ କରିଛନ୍ତି। ଏହି ଯୋଜନା ଅନ୍ତର୍ଗତ ଉନ୍ନତ ଶିକ୍ଷାଗତ ଫଳାଫଳ ହାସଲ କରୁଥିବା ଏବଂ ୨,୦୦୦ରୁ ଅଧିକ ଛାତ୍ରଛାତ୍ରୀ ଥିବା ଦେଶର ୧୦୯ଟି ବଡ଼ ସରକାରୀ ବିଦ୍ୟାଳୟକୁ ପ୍ରାଥମିକତା ଦେଇ ସେଗୁଡ଼ିକର ଭିତ୍ତିଭୂମିର ସମ୍ପ୍ରସାରଣ କରାଯାଉଛି।

ଶିକ୍ଷା ଓ କ୍ରୀଡ଼ା ମନ୍ତ୍ରୀ ସସ୍ମିତ ପୋଖରେଲ କହିଛନ୍ତି ଯେ, ଶିକ୍ଷା କ୍ଷେତ୍ରରେ ପରିବର୍ତ୍ତନ ଆଣିବା ଦିଗରେ ଏହାକୁ ଏକ ଐତିହାସିକ ପଦକ୍ଷେପ ଭାବେ ବିବେଚନା କରାଯାଉଛି। ଚଳିତ ଆର୍ଥିକ ବର୍ଷରେ ଏହି ବିଦ୍ୟାଳୟଗୁଡ଼ିକର ଭିତ୍ତିଭୂମି ସୁଦୃଢ଼ କରିବା ପାଇଁ ମୋଟ ୬୫୪ କୋଟି ନେପାଳୀ ଟଙ୍କାର ବଜେଟ୍ ଆବଣ୍ଟନ କରାଯାଇଛି।

ସସ୍ମିତ ପୋଖରେଲଙ୍କ ଅନୁଯାୟୀ, ଯୋଜନାର ପ୍ରଥମ ପର୍ଯ୍ୟାୟରେ ୮୯ଟି ବିଦ୍ୟାଳୟ ପାଇଁ ୫୩୪ କୋଟି ନେପାଳୀ ଟଙ୍କା ଜାରି କରାଯାଇଛି। ଏହି ଅର୍ଥରେ ବିଦ୍ୟାଳୟଗୁଡ଼ିକରେ ଆଧୁନିକ ସୁବିଧା ସମ୍ପନ୍ନ ତିନି ମହଲା ବିଶିଷ୍ଟ ୧୨ଟି କୋଠରି ଥିବା କୋଠା ନିର୍ମାଣ କାର୍ଯ୍ୟକୁ ତ୍ୱରାନ୍ୱିତ କରାଯିବ। ପ୍ରତ୍ୟେକ ବିଦ୍ୟାଳୟରେ ପ୍ରାୟ ୬ କୋଟି ନେପାଳୀ ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ଏହି କୋଠାଗୁଡ଼ିକରେ ଆଧୁନିକ ଶ୍ରେଣୀଗୃହ, ସୁବ୍ୟବସ୍ଥିତ ପରୀକ୍ଷାଗାର ଏବଂ ସମୃଦ୍ଧ ପାଠାଗାରର ବ୍ୟବସ୍ଥା ରହିବ। ଏହାଦ୍ୱାରା ଛାତ୍ରଛାତ୍ରୀମାନଙ୍କୁ ଅଧିକ ସୁରକ୍ଷିତ, ସୁବ୍ୟବସ୍ଥିତ ଏବଂ ପ୍ରଭାବଶାଳୀ ଶିକ୍ଷଣ ପରିବେଶ ଯୋଗାଇଦେବାରେ ସହାୟତା ମିଳିବ ବୋଲି ମନ୍ତ୍ରୀ କହିଛନ୍ତି।

ଶିକ୍ଷା ଓ କ୍ରୀଡ଼ା ମନ୍ତ୍ରୀ ପୋଖରେଲ କହିଛନ୍ତି ଯେ, କେତେକ ସରକାରୀ ବିଦ୍ୟାଳୟରେ ଛାତ୍ରଛାତ୍ରୀଙ୍କ ସଂଖ୍ୟା ଅଧିକ ରହିବା ଖୁସିର ବିଷୟ ହୋଇଥିବାବେଳେ ଅନ୍ୟ କେତେକ ବିଦ୍ୟାଳୟ ଛାତ୍ରଛାତ୍ରୀଙ୍କ ଅଭାବର ସମ୍ମୁଖୀନ ହେଉଛନ୍ତି। ଆମେ ଏହି ବାସ୍ତବତା ପ୍ରତି ମଧ୍ୟ ସମାନ ଭାବେ ସଚେତନ ଅଛୁ। ବିଦ୍ୟାଳୟଗୁଡ଼ିକ ମଧ୍ୟରେ ଥିବା ଏହି ଅସମାନତା ଦୂର କରିବା ପାଇଁ ବଡ଼ ବିଦ୍ୟାଳୟଗୁଡ଼ିକର ଭିତ୍ତିଭୂମିର ଉନ୍ନତିରୁ ଆମେ ଏହି ପ୍ରୟାସ ଆରମ୍ଭ କରିଛୁ।

ହିନ୍ଦୁସ୍ଥାନ ସମାଚାର / ସ୍ୱାଗତିକା