ରାଜୌରୀ, ୧୪ ଅକ୍ଟୋବର (ହି.ସ.)- ଏନଆଇଏର ଏକ ସ୍ୱତନ୍ତ୍ର କୋର୍ଟ ପାକିସ୍ତାନରେ ରହୁଥିବା ଜଣେ ଆତଙ୍କବାଦୀଙ୍କୁ ୨୦୨୨ର ଏକ ମାମଲାରେ ଘୋଷିତ ଅପରାଧୀ' ଘୋଷଣା କରିଛନ୍ତି। ଏହି ମାମଲା ଅଲ-ହୁଦା ଏଜୁକେସନ ଟ୍ରଷ୍ଟ ସହ ଜଡ଼ିତ କଥିତ ଆତଙ୍କବାଦୀ ପାଣ୍ଠି ଯୋଗାଣ କାର୍ଯ୍ୟକଳାପ ଏବଂ ପ୍ରତିବନ୍ଧିତ ଜମାତ-ଏ-ଇସଲାମୀର ବେଆଇନ କାର୍ଯ୍ୟକଳାପ ସହ ସମ୍ବନ୍ଧିତ।

ରାଜୌରୀ ଜିଲ୍ଲାର ଦରହାଲ ତହସିଲର ଥାନାମଙ୍ଗ ଗାଁର ବାସିନ୍ଦା ମୁଶ୍ତାକ ଅହମ୍ମଦ ମୀର ୧୯୯୫-୯୬ରେ ଆତଙ୍କବାଦରେ ସାମିଲ ହେବା ପାଇଁ ନିୟନ୍ତ୍ରଣ ରେଖା (ଏଲଓସି) ପାର କରିଥିଲେ। ବିଶ୍ୱାସ କରାଯାଏ ଯେ ସେ ବର୍ତମାନ ପାକିସ୍ତାନ ଅଧିକୃତ କାଶ୍ମୀର (ପିଓକେ)ରୁ ନିଜର କାର୍ଯ୍ୟକଳାପ ଚଳାଉଛନ୍ତି।

ଏନଆଇଏ କୋର୍ଟର ସ୍ପେଶାଲ ଜଜ ପ୍ରେମ ସାଗର ଭାରତୀୟ ନାଗରିକ ସୁରକ୍ଷା ସଂହିତାର ଧାରା ୮୪ ଅନୁଯାୟୀ ନ୍ୟାସନାଲ ଇନଭେଷ୍ଟିଗେସନ ଏଜେନ୍ସିର ଆବେଦନ ଉପରେ ଶୁଣାଣି କରି ମୀରଙ୍କୁ ଘୋଷିତ ଅପରାଧୀ ଘୋଷଣା କରିଛନ୍ତି। କୋର୍ଟ ଲକ୍ଷ୍ୟ କରିଥିଲେ ଯେ ତାଙ୍କ ବିରୋଧରେ ପୂର୍ବରୁ ମଧ୍ୟ ଜାମିନବିହୀନ ଗିରଫ ୱାରେଂଟି ଜାରି କରାଯାଇଥିଲା, କିନ୍ତୁ ଘୋଷିତ ଅପରାଧୀ' ଘୋଷଣା କରିବାର ପ୍ରକ୍ରିୟା ଏବଂ ଖବରକାଗଜରେ ନୋଟିସ ପ୍ରକାଶ ପାଇବା ସତ୍ୱେ ନା ତାଙ୍କୁ ଗିରଫ କରାଯାଇଥିଲା ନା ସେ କୋର୍ଟରେ ହାଜର ହୋଇଥିଲେ।

ଏନଆଇଏର ଏହି ମାମଲା ସେହି ଅଭିଯୋଗ ସହ ଜଡ଼ିତ, ଯେଉଁଥିରେ କୁହାଯାଇଛି ଯେ ଫେବୃଆରୀ, ୨୦୧୯ରେ ଜମାତ-ଏ-ଇସଲାମୀକୁ ବେଆଇନ ସଂଗଠନ ଘୋଷଣା କରାଯିବା ପରେ ମଧ୍ୟ ଅଲ-ହୁଦା ଏଜୁକେସନ ଟ୍ରଷ୍ଟ ମାଧ୍ୟମରେ ଏହା ପାଇଁ ପାଣ୍ଠି ସଂଗ୍ରହ କରାଯାଇଥିଲା ଏବଂ ପଠାଯାଇଥିଲା। ଅଗଷ୍ଟ, ୨୦୨୫ରେ ସ୍ପେଶାଲ ଏନଆଇଏ କୋର୍ଟ ନିଷିଦ୍ଧ ସଂଗଠନର କାର୍ଯ୍ୟକଳାପ ପାଇଁ କଥିତ ଭାବେ ପାଣ୍ଠି ସଂଗ୍ରହ ଏବଂ ଏହାର ବ୍ୟବହାର କରିବା ମାମଲାରେ ମୀର ଏବଂ ଅଲ-ହୁଦା ଏଜୁକେସନ ଟ୍ରଷ୍ଟ ସମେତ ତିନି ଅଭିଯୁକ୍ତଙ୍କ ବିରୋଧରେ ଅଭିଯୋଗ ସ୍ଥିର କରିଥିଲେ।

---------------

ହିନ୍ଦୁସ୍ଥାନ ସମାଚାର / ଗଗନ