ନୂଆଦିଲ୍ଲୀ, ୧୫ ଅକ୍ଟୋବର (ହି.ସ.) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପରାମର୍ଶକ୍ରମେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଡ. ଏଲ୍. ମୁରୁଗନଙ୍କ କେନ୍ଦ୍ର ମନ୍ତ୍ରିପରିଷଦରୁ ଇସ୍ତଫାକୁ ତତ୍କାଳ ପ୍ରଭାବରୁ ଗ୍ରହଣ କରିଛନ୍ତି।

ଗୁରୁବାର ରାଷ୍ଟ୍ରପତି ଭବନ ପକ୍ଷରୁ ଜାରି ପ୍ରେସ୍ ବିଜ୍ଞପ୍ତି ଅନୁଯାୟୀ, ସମ୍ବିଧାନର ଅନୁଚ୍ଛେଦ ୭୫ର ଖଣ୍ଡ (୨) ଅନୁସାରେ ଡ. ମୁରୁଗନଙ୍କ ଇସ୍ତଫା ଗ୍ରହଣ କରାଯାଇଛି।

ଉଲ୍ଲେଖଯୋଗ୍ୟ, ସୂଚନା ଓ ପ୍ରସାରଣ ତଥା ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଡ. ଏଲ୍. ମୁରୁଗନ ଅକ୍ଟୋବର ୧୩ ତାରିଖରେ କେନ୍ଦ୍ର ମନ୍ତ୍ରିପରିଷଦ ଏବଂ ରାଜ୍ୟସଭାରୁ ଇସ୍ତଫା ଦେବା ନେଇ ଘୋଷଣା କରିଥିଲେ। ଏ ସମ୍ପର୍କରେ ସେ ପ୍ରଧାନମନ୍ତ୍ରୀ ମୋଦୀଙ୍କୁ ଏକ ପତ୍ର ଲେଖିଥିଲେ ଏବଂ ଏହାକୁ ସୋସିଆଲ ମିଡିଆରେ ମଧ୍ୟ ସେୟାର କରିଥିଲେ।

ତାମିଲନାଡୁରେ ଭାରତୀୟ ଜନତା ପାର୍ଟିକୁ ଅଧିକ ମଜଭୁତ କରିବା ଏବଂ ୨୦୨୯ ଲୋକସଭା ନିର୍ବାଚନ ପାଇଁ ପ୍ରସ୍ତୁତି ନିମନ୍ତେ ସମ୍ପୂର୍ଣ୍ଣ ସମୟ ଦେବାକୁ ଇଚ୍ଛା ପ୍ରକାଶ କରି ସେ ପ୍ରଧାନମନ୍ତ୍ରୀଙ୍କୁ ମନ୍ତ୍ରୀ ପଦରୁ ମୁକ୍ତ କରିବାକୁ ଅନୁରୋଧ କରିଥିଲେ।

ନିଜ ପତ୍ରରେ ମୁରୁଗନ କହିଥିଲେ ଯେ ସେ ପୁଣି ତୃଣମୂଳ ସ୍ତରକୁ ଫେରି ଦଳୀୟ କର୍ମୀଙ୍କ ସହ କାମ କରିବାକୁ ଚାହୁଁଛନ୍ତି। ରାଜ୍ୟର ଗାଁ ଓ ସହରଗୁଡ଼ିକରେ ବିଜେପିର ଜନସମର୍ଥନ ବଢ଼ାଇବା ପାଇଁ ସେ ନିଜର ସମ୍ପୂର୍ଣ୍ଣ ସମୟ ସମର୍ପିତ କରିବାକୁ ଚାହୁଁଥିବା ଉଲ୍ଲେଖ କରିଥିଲେ।

ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ କେନ୍ଦ୍ର ମନ୍ତ୍ରିପରିଷଦରେ କାର୍ଯ୍ୟ କରିବା ନିଜ ଜୀବନର ଏକ ବଡ଼ ସୌଭାଗ୍ୟ ବୋଲି ବର୍ଣ୍ଣନା କରି ସେ ପ୍ରଧାନମନ୍ତ୍ରୀଙ୍କ ପ୍ରତି କୃତଜ୍ଞତା ଜଣାଇଥିଲେ। ଏଥିସହ ରାଜ୍ୟସଭା ସଦସ୍ୟ ପଦ ଛାଡ଼ିବା ପାଇଁ ମଧ୍ୟ ସେ ଅନୁମତି ଲୋଡ଼ିଥିଲେ।

ମଧ୍ୟପ୍ରଦେଶରୁ ରାଜ୍ୟସଭାକୁ ନିର୍ବାଚିତ ହୋଇଥିବା ମୁରୁଗନଙ୍କ କାର୍ଯ୍ୟକାଳ ୨୦୩୦ରେ ଶେଷ ହେବାର ଥିଲା। ୨୦୨୧ରେ ପ୍ରଧାନମନ୍ତ୍ରୀ ମୋଦୀଙ୍କ ପୂର୍ବ ମନ୍ତ୍ରିପରିଷଦରେ ସେ ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିଥିଲେ। ୨୦୨୪ରେ ମୋଦୀଙ୍କ ତୃତୀୟ ପାଳି ସରକାରରେ ମଧ୍ୟ ସେ ଏହି ଦାୟିତ୍ୱ ଜାରି ରଖିଥିଲେ।

ହିନ୍ଦୁସ୍ଥାନ ସମାଚାର / ସମନ୍ୱୟ