କୋଲକାତା, ୧୯ ଅକ୍ଟୋବର (ହି.ସ.)। କୋଲକାତାର ଚୋରବାଗାନ ପୂଜା ମଣ୍ଡପରେ ଘଟିଥିବା ଦଳାଚକଟାରେ ୧୯ ଜଣଙ୍କ ମୃତ୍ୟୁ ପରେ କୋଲକାତା ପୁଲିସ ପକ୍ଷରୁ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି। ଏହି ଅବହେଳା ପାଇଁ ପୁଲିସ ପୂଜା ଆୟୋଜକଙ୍କ ବିରୋଧରେ ନିଜ ଆଡ଼ୁ ସଂଜ୍ଞାନ ନେଇ ଏକ ଏତଲା (ଏଫ୍ଆଇଆର୍) ରୁଜୁ କରିଛି। ଏଥିସହ ସୁରକ୍ଷା ବ୍ୟବସ୍ଥା ସୁନିଶ୍ଚିତ କରିବା ଏବଂ ଶାନ୍ତି ବଜାୟ ରଖିବା ଉଦ୍ଦେଶ୍ୟରେ ଚୋରବାଗାନ ସଂଲଗ୍ନ କେତେକ ନିର୍ଦ୍ଦିଷ୍ଟ ଅଞ୍ଚଳରେ ମଙ୍ଗଳବାର (ନବମୀ) ପର୍ଯ୍ୟନ୍ତ ଭାରତୀୟ ନାଗରିକ ସୁରକ୍ଷା ସଂହିତା (ବିଏନ୍ଏସ୍ଏସ୍)ର ଧାରା ୧୬୩ ଲାଗୁ କରାଯାଇଛି।

କୋଲକାତା ପୁଲିସ କମିଶନର ଅଜୟ ନନ୍ଦ ରବିବାର ସକାଳେ ଜାରି କରିଥିବା ଏହି ଆଦେଶ ଅନୁଯାୟୀ, ଉକ୍ତ ଅଞ୍ଚଳଗୁଡ଼ିକରେ ପାଞ୍ଚ ଜଣ କିମ୍ବା ତା’ଠାରୁ ଅଧିକ ଲୋକ ଏକାଠି ହେବା ଉପରେ କଡ଼ା କଟକଣା ଲଗାଯାଇଛି। ପୁଲିସ ସୂଚନା ଅନୁଯାୟୀ, ଆୟୋଜକଙ୍କ ବିରୋଧରେ ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ଧାରା ୧୦୫ (ଅନିଚ୍ଛାକୃତ ହତ୍ୟା), ଧାରା ୧୧୦ (ଅନିଚ୍ଛାକୃତ ହତ୍ୟା ଉଦ୍ୟମ) ଏବଂ ଧାରା ୩(୫) (ସମାନ ଉଦ୍ଦେଶ୍ୟ ନେଇ ଏକାଧିକ ବ୍ୟକ୍ତିଙ୍କ ଦ୍ୱାରା ଅପରାଧ) ଅନୁଯାୟୀ ମାମଲା ରୁଜୁ ହୋଇଛି। ଘଟଣାର ପ୍ରକୃତ କାରଣ ଜାଣିବା ପାଇଁ ପୁଲିସ ଏପର୍ଯ୍ୟନ୍ତ ୧୪ ଜଣଙ୍କୁ ଅଟକ ରଖି ପଚରାଉଚରା କରୁଛି। ଏଥିସହ ୭ ଜଣଙ୍କୁ ଗିରଫ କରାଯାଇଛି।

ନିର୍ଦ୍ଦିଷ୍ଟ ଅଞ୍ଚଳରେ ନିଷେଧାଦେଶ ଜାରି

ପୁଲିସ କମିଶନରଙ୍କ ବିଜ୍ଞପ୍ତି ଅନୁଯାୟୀ, ଏହି ନିଷେଧାଦେଶ ମୁଖ୍ୟତଃ ବଉବଜାର ଥାନା ଅଞ୍ଚଳର ଚୋରବାଗାନ ପୂଜା ମଣ୍ଡପ ନିକଟବର୍ତ୍ତୀ କେତେକ ଅଂଶରେ ଲାଗୁ ହେବ।

ଏହି ଅଞ୍ଚଳଗୁଡ଼ିକ ମଧ୍ୟରେ ରହିଛି:

କଲେଜ ଷ୍ଟ୍ରିଟ୍ର କୋଲୁଟୋଲା ଷ୍ଟ୍ରିଟ୍ରୁ ଇଡେନ୍ ହସ୍ପିଟାଲ୍ ରୋଡ୍ ପର୍ଯ୍ୟନ୍ତ ଅଂଶ।

ଚିତ୍ତରଞ୍ଜନ ଆଭେନ୍ୟୁ (ସିଆର୍ ଆଭେନ୍ୟୁ)ର କୋଲୁଟୋଲା ଷ୍ଟ୍ରିଟ୍ରୁ ଇଡେନ୍ ହସ୍ପିଟାଲ୍ ରୋଡ୍ ପର୍ଯ୍ୟନ୍ତ ଅଂଶ।

କୋଲୁଟୋଲା ଷ୍ଟ୍ରିଟ୍ର କଲେଜ ଷ୍ଟ୍ରିଟ୍ରୁ ସିଆର୍ ଆଭେନ୍ୟୁ ପର୍ଯ୍ୟନ୍ତ ଅଂଶ।

ଇଡେନ୍ ହସ୍ପିଟାଲ୍ ରୋଡ୍ର ସିଆର୍ ଆଭେନ୍ୟୁରୁ କଲେଜ ଷ୍ଟ୍ରିଟ୍ ପର୍ଯ୍ୟନ୍ତ ଅଞ୍ଚଳ।

ଆଦେଶରେ ସ୍ପଷ୍ଟ କରାଯାଇଛି ଯେ, ଏହି ଅଞ୍ଚଳଗୁଡ଼ିକରେ ଲାଠି କିମ୍ବା ଅନ୍ୟ କୌଣସି ଅସ୍ତ୍ରଶସ୍ତ୍ର ଧରି ଚଳପ୍ରଚଳ କରିବା ଉପରେ ସମ୍ପୂର୍ଣ୍ଣ ନିଷେଧ ରହିବ। ତେବେ ଏହି କଟକଣା ସମଗ୍ର ବଉବଜାର ଥାନା ଅଞ୍ଚଳରେ ଲାଗୁ ହୋଇନାହିଁ।

ରାଜ୍ୟପାଳ ସ୍ଥିତିର ସମୀକ୍ଷା କଲେ

ଏହି ସମୟରେ ରବିବାର ସକାଳେ ପୁଲିସ କମିଶନର ଅଜୟ ନନ୍ଦ ଏବଂ ରାଜ୍ୟପାଳ ଆର୍.ଏନ୍. ରବି ସ୍ଥିତିର ସମୀକ୍ଷା କରିବା ପାଇଁ କୋଲକାତା ମେଡିକାଲ୍ କଲେଜ ଓ ହସ୍ପିଟାଲ୍ ପରିଦର୍ଶନ କରିଥିଲେ। ସେଠାରେ ଚିକିତ୍ସାଧୀନ ଆହତମାନଙ୍କୁ ଭେଟି ସେମାନଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ପଚାରି ବୁଝିଥିଲେ।

ଏହା ପୂର୍ବରୁ ଶନିବାର ରାତିରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଘଟଣାର ନିରପେକ୍ଷ ତଦନ୍ତ କରାଯିବ ବୋଲି ଆଶ୍ୱାସନା ଦେଇଥିଲେ। ସେ କହିଥିଲେ ଯେ, ଏସ୍ଟିଏଫ୍, ସିଆଇଡି ଏବଂ ଅଗ୍ନିଶମ ବିଭାଗର ଟିମ୍ ଘଟଣାସ୍ଥଳରୁ ଆବଶ୍ୟକ ନମୁନା ଓ ପ୍ରମାଣ ସଂଗ୍ରହ କରିବେ।

ମୁଖ୍ୟମନ୍ତ୍ରୀ ଥିମ୍ ଆଧାରିତ ପୂଜାର ବଢ଼ୁଥିବା ପ୍ରଚଳନକୁ ନେଇ ମଧ୍ୟ ଗଭୀର ଚିନ୍ତା ପ୍ରକାଶ କରିଥିଲେ। ସେ ସ୍ପଷ୍ଟ ଭାବେ କହିଥିଲେ ଯେ, ଭବିଷ୍ୟତରେ ଥିମ୍ ପୂଜାକୁ ନେଇ ପ୍ରଶାସନକୁ ନୂଆ କରି ବିଚାର କରିବାକୁ ପଡ଼ିବ। କାରଣ ଲୋକଙ୍କ ଜୀବନ ଯେକୌଣସି ଥିମ୍ଠାରୁ ଅଧିକ ମୂଲ୍ୟବାନ। ଏହି ଦୁଃଖଦ ଘଟଣାରୁ ମିଳିଥିବା ଶିକ୍ଷାକୁ ଭବିଷ୍ୟତର ବ୍ୟବସ୍ଥାରେ ଲାଗୁ କରାଯିବ ବୋଲି ସେ କହିଛନ୍ତି।

ହିନ୍ଦୁସ୍ଥାନ ସମାଚାର / ସ୍ୱାଗତିକା