ଇସଲାମାବାଦ (ପାକିସ୍ତାନ), ୧୮ ଅକ୍ଟୋବର (ହି.ସ.)। ବଲୋଚିସ୍ତାନ ନ୍ୟାସନାଲ ପାର୍ଟିର ମୁଖ୍ୟ ସର୍ଦ୍ଦାର ଅଖତର ମେଙ୍ଗଲ କହିଛନ୍ତି ଯେ, ଆତଙ୍କବାଦ ବିରୋଧରେ ଅପରେସନ୍ କରିବାକୁ ଅନୁମତି ଦିଆଗଲା, କିନ୍ତୁ ବଲୋଚିସ୍ତାନରେ କେତେ ଅପରେସନ୍ କରାଯାଇଛି ଏବଂ ସେଥିରୁ କ’ଣ ଫଳାଫଳ ମିଳିଛି? ଆଜି ବଲୋଚିସ୍ତାନ ଜଳୁଛି ଏବଂ ଯୁବକମାନେ ପାହାଡ଼ ଉପରକୁ ଚଢ଼ିଯାଇଛନ୍ତି।

‘ଦ ବଲୋଚିସ୍ତାନ ପୋଷ୍ଟ’ର ରିପୋର୍ଟ ଅନୁଯାୟୀ, ଖାଇବର ପଖତୁନଖ୍ୱାର ପୂର୍ବତନ ମୁଖ୍ୟମନ୍ତ୍ରୀ ସୋହେଲ ଆଫ୍ରିଦି ଏବଂ ତାଙ୍କ ସହଯୋଗୀମାନଙ୍କ ଗିରଫଦାରୀ ସମ୍ପର୍କରେ ଉଲ୍ଲେଖ କରି ମେଙ୍ଗଲ କହିଛନ୍ତି, “ଏହି ପ୍ରଦେଶର ନିର୍ବାଚିତ ମୁଖ୍ୟମନ୍ତ୍ରୀ ଏବଂ ବାଚସ୍ପତି ନିଖୋଜ ଅଛନ୍ତି। ସେମାନଙ୍କ ସରକାର ମଧ୍ୟ ଛଡ଼ାଇ ନିଆଯାଇଛି ଏବଂ ଶାନ୍ତିପୂର୍ଣ୍ଣ ବିରୋଧ ପ୍ରଦର୍ଶନକୁ ଅନୁମତି ଦିଆଯାଉନାହିଁ। ଏଭଳି ବ୍ୟବସ୍ଥା କାମ କରିବ ନାହିଁ। ଖାଇବର ପଖତୁନଖ୍ୱା ଏବଂ ବଲୋଚିସ୍ତାନର ଲୋକମାନଙ୍କୁ ବିଶ୍ୱାସ କରାଯାଉଛି ଯେ ସେମାନେ ଦାସ। କିନ୍ତୁ ଯେପର୍ଯ୍ୟନ୍ତ ଆମେ ଏକ ଦେଶ ଭାବେ ଏକାଠି ହୋଇପାରିନାହୁଁ, ସେପର୍ଯ୍ୟନ୍ତ ଆମକୁ ଦାସ କରି ରଖାଯିବ।”

ସର୍ଦ୍ଦାର ଅଖତର ମେଙ୍ଗଲ କହିଛନ୍ତି ଯେ, ବାଚସ୍ପତି ଏକ ସାମ୍ବିଧାନିକ ପଦବୀ। ମାର୍ଶାଲ ଲ’ ସମୟରେ ମଧ୍ୟ ଏହି ପଦବୀରେ ଥିବା ବ୍ୟକ୍ତିଙ୍କୁ ଗିରଫ କରାଯାଇନଥିଲା। କିନ୍ତୁ ଆଜି ବାଚସ୍ପତି ଦେଶରୁ ନିଖୋଜ ଅଛନ୍ତି। ଏଭଳି ସ୍ଥିତିରେ କେଉଁ ଆଧାରରେ ଗଣତନ୍ତ୍ରର ଦାବି କରାଯାଉଛି ବୋଲି ସେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ, ଗୋଟିଏ ପଟେ ନିର୍ବାଚିତ ପ୍ରତିନିଧି ଓ ମନ୍ତ୍ରୀମାନେ ଅନୁପସ୍ଥିତ ଅଛନ୍ତି, ଅନ୍ୟପଟେ ଫର୍ମ-୪୭ ମାଧ୍ୟମରେ ନିର୍ବାଚିତ ହୋଇଥିବା ସଦସ୍ୟମାନେ ମଧ୍ୟ ଅନୁପସ୍ଥିତ ଅଛନ୍ତି।

୧୯୬୨ ମସିହା ଅକ୍ଟୋବର ୬ ତାରିଖରେ ଖୁଜଦାରଠାରେ ଜନ୍ମଗ୍ରହଣ କରିଥିବା ଅଖତର, ବଲୋଚିସ୍ତାନର ପୂର୍ବତନ ମୁଖ୍ୟମନ୍ତ୍ରୀ ମୀର ଅତାଉଲ୍ଲା ମେଙ୍ଗଲଙ୍କ ପୁତ୍ର। ସେ ମଧ୍ୟ ୧୯୯୭ରୁ ୧୯୯୮ ପର୍ଯ୍ୟନ୍ତ ବଲୋଚିସ୍ତାନର ମୁଖ୍ୟମନ୍ତ୍ରୀ ଥିଲେ। ସେ ପାକିସ୍ତାନର ଜାତୀୟ ସଂସଦର ସଦସ୍ୟ ମଧ୍ୟ ରହିଛନ୍ତି। ପାକିସ୍ତାନୀ ସେନା ଏବଂ ସରକାରଙ୍କ ନୀତିକୁ ସେ ତୀବ୍ର ସମାଲୋଚନା କରିଆସୁଛନ୍ତି। ପାକିସ୍ତାନଠାରୁ ଅଲଗା ହେବାର ଦାବି ଏବଂ ବଲୋଚିସ୍ତାନର ପରିସ୍ଥିତିକୁ ନେଇ ସେ ତୀବ୍ର ରାଜନୈତିକ ବୟାନ ଦେବା ପାଇଁ ଜଣାଶୁଣା।

ହିନ୍ଦୁସ୍ଥାନ ସମାଚାର / ସ୍ୱାଗତିକା