ବାଗପତ, ଅକ୍ଟୋବର ୧୯ (ହି.ସ.)। ଦୁର୍ଗାପୂଜା ପେଣ୍ଡାଲଗୁଡ଼ିକର ସୁରକ୍ଷାକୁ ନେଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦ୍ଦେଶ ପରେ ବାଗପତରେ ପୁଲିସ ଓ ପ୍ରଶାସନ ସତର୍କ ହୋଇଉଠିଛି। ରାମନବମୀ ଓ ବିଜୟାଦଶମୀକୁ ଦୃଷ୍ଟିରେ ରଖି ଜିଲ୍ଲାପାଳ ଦିବ୍ୟାଂଶୁ ପଟେଲ ଏବଂ ପୁଲିସ ଅଧୀକ୍ଷକ ପୂର୍ଣ୍ଣେନ୍ଦୁ ସିଂହ ରାତିରେ ପୁଲିସ ବଳ ସହ ବାଗପତ ସହରରେ ପଦଯାତ୍ରା କରି ପାଟ୍ରୋଲିଂ କରିଥିଲେ। ଅଧିକାରୀମାନେ ସୁରକ୍ଷା ବ୍ୟବସ୍ଥା ଓ ଆଇନଶୃଙ୍ଖଳାର ସମୀକ୍ଷା କରିବା ସହ ଦୁର୍ଗାପୂଜା ପେଣ୍ଡାଲଗୁଡ଼ିକର ନିରୀକ୍ଷଣ କରିଥିଲେ।

ଏହି ସମୟରେ ଜିଲ୍ଲାପାଳ ଓ ପୁଲିସ ଅଧୀକ୍ଷକ ଦୁର୍ଗାପୂଜା ପେଣ୍ଡାଲରେ ପୂଜାର୍ଚ୍ଚନା କରିବା ସହ ଶ୍ରଦ୍ଧାଳୁମାନଙ୍କ ସହ ଆଲୋଚନା କରିଥିଲେ। ସେମାନେ ଲୋକମାନଙ୍କୁ ପର୍ବପର୍ବାଣୀଗୁଡ଼ିକୁ ଶାନ୍ତିପୂର୍ଣ୍ଣ, ସଦ୍ଭାବପୂର୍ଣ୍ଣ ଓ ପାରସ୍ପରିକ ଭାଇଚାରାର ସହିତ ପାଳନ କରିବାକୁ ଅପିଲ୍ କରିଥିଲେ। ସୁରକ୍ଷା ବ୍ୟବସ୍ଥା ବଜାୟ ରଖିବା ସହ ସତର୍କ ରହିବାକୁ ପୁଲିସ ବଳକୁ ମଧ୍ୟ ନିର୍ଦ୍ଦେଶ ଦିଆଯାଇଥିଲା।

ଏଥିସହ ଦୁର୍ଗାପୂଜା ପେଣ୍ଡାଲଗୁଡ଼ିକରେ ଅଗ୍ନି ନିରାପତ୍ତା, ପ୍ରବେଶ ଓ ପ୍ରସ୍ଥାନ ଦ୍ୱାର ଏବଂ ବିଦ୍ୟୁତ୍ ବ୍ୟବସ୍ଥା ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଥିଲା। ଅଧିକାରୀମାନଙ୍କୁ ନିଜେ କ୍ଷେତ୍ରସ୍ତରରେ ଉପସ୍ଥିତ ରହି ବ୍ୟବସ୍ଥାର ତଦାରଖ କରିବାକୁ କୁହାଯାଇଥିଲା।

ସୂଚନାଯୋଗ୍ୟ ଯେ, ପଶ୍ଚିମବଙ୍ଗରେ ଦୁର୍ଗାପୂଜା ସମୟରେ ଘଟିଥିବା ଏକ ଦୁର୍ଘଟଣା ପରେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ସମସ୍ତ ପୁଲିସ କମିଶନର, ଜିଲ୍ଲାପାଳ ଓ ପୁଲିସ ଅଧୀକ୍ଷକମାନଙ୍କୁ ଦୁର୍ଗାପୂଜା ପେଣ୍ଡାଲଗୁଡ଼ିକରେ ଦୃଢ଼ ସୁରକ୍ଷା ବ୍ୟବସ୍ଥା ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଥିଲେ।

ମୁଖ୍ୟମନ୍ତ୍ରୀ କହିଥିଲେ ଯେ, ଅଧିକାରୀମାନେ ନିଜେ ପୂଜା ପେଣ୍ଡାଲକୁ ଯାଇ ଅଗ୍ନି ନିରାପତ୍ତା ବ୍ୟବସ୍ଥା ଯାଞ୍ଚ କରନ୍ତୁ। ପ୍ରବେଶ ଓ ପ୍ରସ୍ଥାନ ଦ୍ୱାରଗୁଡ଼ିକର ବ୍ୟବସ୍ଥା ଉପରେ ବିଶେଷ ଧ୍ୟାନ ଦିଆଯାଉ। ଜରୁରୀ ପରିସ୍ଥିତିରେ ଲୋକମାନଙ୍କୁ ସୁରକ୍ଷିତ ଭାବେ ବାହାର କରିବା ପାଇଁ ପର୍ଯ୍ୟାପ୍ତ ଜରୁରୀକାଳୀନ ପ୍ରସ୍ଥାନ ପଥ ରହିବା ଆବଶ୍ୟକ। ଏହା ସହ ପୂଜା ପେଣ୍ଡାଲଗୁଡ଼ିକର ବିଦ୍ୟୁତ୍ ବ୍ୟବସ୍ଥା ଯାଞ୍ଚ କରିବା ଏବଂ କୌଣସି ପ୍ରକାରର ଅବହେଳା ନ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଅଧିକାରୀମାନଙ୍କୁ କ୍ଷେତ୍ରସ୍ତରରେ ରହି ସମସ୍ତ ବ୍ୟବସ୍ଥାର ନିରୀକ୍ଷଣ କରିବାକୁ କୁହାଯାଇଥିଲା। ଏହି ନିର୍ଦ୍ଦେଶ ପରେ ବାଗପତରେ ପୁଲିସ ଓ ପ୍ରଶାସନ ପକ୍ଷରୁ ପର୍ବପର୍ବାଣୀ ସମୟରେ ସୁରକ୍ଷା ବ୍ୟବସ୍ଥାକୁ ଅଧିକ ସକ୍ରିୟ କରାଯାଇଛି। ଶ୍ରଦ୍ଧାଳୁମାନଙ୍କ ସୁରକ୍ଷା ସୁନିଶ୍ଚିତ କରିବା ସହ ପର୍ବପର୍ବାଣୀଗୁଡ଼ିକୁ ଶାନ୍ତିପୂର୍ଣ୍ଣ ପରିବେଶରେ ସମ୍ପନ୍ନ କରାଇବା ଉପରେ ଅଧିକାରୀମାନେ ଗୁରୁତ୍ୱ ଦେଉଛନ୍ତି।

ହିନ୍ଦୁସ୍ଥାନ ସମାଚାର / ସ୍ୱାଗତିକା