ତେହେରାନ (ଇରାନ), ଅକ୍ଟୋବର ୧୯ (ହି.ସ.)। ଏରୋସ୍ପେସ୍ ପ୍ରଯୁକ୍ତିବିଦ୍ୟା ଓ ସାମରିକ ଶିଳ୍ପ ଉତ୍ପାଦନ କ୍ଷେତ୍ରର ବିଶେଷଜ୍ଞ ମେହରଦାଦ ଅଖଲାଘି କେତାବଚିଙ୍କୁ ଇରାନର ନୂଆ ପ୍ରତିରକ୍ଷା ମନ୍ତ୍ରୀ ଭାବେ ନିଯୁକ୍ତ କରାଯାଇଛି। ଆମେରିକା ସହ ଯୁଦ୍ଧ ଆହୁରି ତୀବ୍ର ହେବାର ଆଶଙ୍କା ମଧ୍ୟରେ ଏହି ନିଯୁକ୍ତି ହୋଇଛି। ୬୮ ବର୍ଷୀୟ ଅଖଲାଘିଙ୍କ ନିଯୁକ୍ତିକୁ ରବିବାର ସଂସଦର ଅନଲାଇନ୍ ବୈଠକରେ ଅନୁମୋଦନ ମିଳିଛି। ଫେବୃଆରୀ ୨୮ରେ ଇରାନ ଉପରେ ଆମେରିକା ଓ ଇସ୍ରାଏଲ୍ର ଆକ୍ରମଣ ପରଠାରୁ ସଂସଦର ବୈଠକଗୁଡ଼ିକ ଅନଲାଇନ୍ରେ ହେଉଛି। ଅଖଲାଘି ପ୍ରତିରକ୍ଷା ଓ ସଶସ୍ତ୍ର ବାହିନୀ ଲଜିଷ୍ଟିକ୍ସ ମନ୍ତ୍ରଣାଳୟର ଦାୟିତ୍ୱ ଗ୍ରହଣ କରିବେ। ତାଙ୍କ ନିଯୁକ୍ତି ସପକ୍ଷରେ ମୋଟ ୨୩୭ ଜଣ ସାଂସଦ ଭୋଟ୍ ଦେଇଥିବା ବେଳେ ୧୫ ଜଣ ଏହାର ବିରୋଧରେ ମତ ଦେଇଥିଲେ।

ଅଲ୍ ଜଜିରାର ରିପୋର୍ଟ ଅନୁଯାୟୀ, ଏହି ପଦରେ କିଛି ସମୟ ଧରି ରହିଥିବା ମାଜିଦ୍ ଇବ୍ନ-ଏ ରଜା ଏବେ ଅଖଲାଘିଙ୍କ ଉପମନ୍ତ୍ରୀ ଭାବେ କାର୍ଯ୍ୟ କରିବେ। ଆମେରିକା ଓ ଇସ୍ରାଏଲ୍ର ଆକ୍ରମଣରେ ଇରାନର ସାମରିକ ଶିଳ୍ପ ଭିତ୍ତିଭୂମି ବ୍ୟାପକ କ୍ଷତିଗ୍ରସ୍ତ ହୋଇଥିବାରୁ ଏହାର ପୁନର୍ନିର୍ମାଣ ଓ ସମ୍ପ୍ରସାରଣ ଦାୟିତ୍ୱ ନୂଆ ପ୍ରତିରକ୍ଷା ମନ୍ତ୍ରୀଙ୍କ ଉପରେ ରହିବ।

ନୂଆ ମନ୍ତ୍ରୀଙ୍କ ପ୍ରତିରକ୍ଷା ଯୋଜନାଗୁଡ଼ିକୁ ପୂର୍ବରୁ ବରିଷ୍ଠ ସାମରିକ ଅଧିକାରୀ, ରାଷ୍ଟ୍ରପତି ମସୁଦ ପେଜେଶ୍କିଆନ୍ ଏବଂ ସଂସଦର ‘ଜାତୀୟ ସୁରକ୍ଷା ଓ ବୈଦେଶିକ ନୀତି ଆୟୋଗ’ ଅନୁମୋଦନ କରିସାରିଛନ୍ତି।

ରାଷ୍ଟ୍ରପତି ପେଜେଶ୍କିଆନ୍ କହିଛନ୍ତି, “ଇରାନର ଇସ୍ଲାମିକ୍ ଗଣତନ୍ତ୍ର କୌଣସି ଦେଶ ବିରୋଧରେ ଆକ୍ରମଣ ଆରମ୍ଭ କରିବ ନାହିଁ। କିନ୍ତୁ ଯଦି କେହି ଆକ୍ରମଣ କରେ, ତେବେ ଦେଶର ଆଞ୍ଚଳିକ ଅଖଣ୍ଡତାର ସୁରକ୍ଷା ପାଇଁ ଇରାନ ପୂର୍ଣ୍ଣ ଶକ୍ତି ସହ ଶେଷ ନିଃଶ୍ୱାସ ପର୍ଯ୍ୟନ୍ତ ଲଢ଼େଇ କରିବ।” ରାଷ୍ଟ୍ରପତି ଆହୁରି କହିଛନ୍ତି ଯେ ଅଖଲାଘିଙ୍କର ପ୍ରତିରକ୍ଷା ମନ୍ତ୍ରଣାଳୟ ଏବଂ ଏହା ସହ ଜଡ଼ିତ ସଂସ୍ଥାଗୁଡ଼ିକରେ ୪୨ ବର୍ଷରୁ ଅଧିକ ଅଭିଜ୍ଞତା ରହିଛି। ସରକାରୀ ଗଣମାଧ୍ୟମର ରିପୋର୍ଟ ଅନୁଯାୟୀ, ବାଲିଷ୍ଟିକ୍ କ୍ଷେପଣାସ୍ତ୍ର, କଠିନ ଇନ୍ଧନ ପ୍ରଣୋଦନ ପ୍ରଯୁକ୍ତିବିଦ୍ୟା, ଏରୋସ୍ପେସ୍ ପ୍ରଯୁକ୍ତିବିଦ୍ୟା ଏବଂ ସାମରିକ ଶିଳ୍ପ ଉତ୍ପାଦନ କ୍ଷେତ୍ରରେ ଅଖଲାଘିଙ୍କର ବିଶେଷ ଦକ୍ଷତା ରହିଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା