ୱାଶିଂଟନ୍, ଅକ୍ଟୋବର ୧୯ (ହି.ସ.)। ରୁଷ୍ ଓ ୟୁକ୍ରେନ୍ ମଧ୍ୟରେ ଚାଲିଥିବା ଯୁଦ୍ଧକୁ ଶେଷ କରିବା ପାଇଁ ନିଜର ଉଦ୍ୟମକୁ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସଫଳତା ଦିଗରେ ଏକ ବଡ଼ ପଦକ୍ଷେପ ବୋଲି କହିଛନ୍ତି। ଏହି ପ୍ରସଙ୍ଗରେ ସେ ୟୁକ୍ରେନ୍ର ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କିଙ୍କ ଜିଦ୍କୁ କଡ଼ା ସମାଲୋଚନା କରିଛନ୍ତି। ନିଜ ଉଦ୍ୟମରେ ସନ୍ତୁଷ୍ଟ ଥିବା ଟ୍ରମ୍ପ ରବିବାର (ସ୍ଥାନୀୟ ସମୟ) ଦାବି କରିଛନ୍ତି ଯେ ଦୁଇ ଦେଶ ମଧ୍ୟରେ ଚାଲିଥିବା ସଂଘର୍ଷର ଅନ୍ତ ଘଟାଇବା ପାଇଁ ଚାଲିଥିବା ଆଲୋଚନାରେ ବଡ଼ ଅଗ୍ରଗତି ହୋଇଛି।

ସେ ରୁଷ୍ ପ୍ରତି ନିଜ ପ୍ରଶାସନର କୂଟନୈତିକ ଆଭିମୁଖ୍ୟକୁ ସମର୍ଥନ କରିବା ସହ ଅଭିଯୋଗ କରିଛନ୍ତି ଯେ ଦୁଇ ବର୍ଷ ପୂର୍ବେ ଜେଲେନ୍ସ୍କି ଏକ ଉତ୍ତମ ଚୁକ୍ତି କରିବାରେ ବିଫଳ ହୋଇଥିଲେ। ଟ୍ରମ୍ପ ନିଜର ସୋସିଆଲ୍ ମିଡିଆ ପ୍ଲାଟଫର୍ମ ‘ଟ୍ରୁଥ୍ ସୋସିଆଲ୍’ରେ ଏକ ପୋଷ୍ଟ କରି ଯୁଦ୍ଧରତ ଦୁଇ ଦେଶ ମଧ୍ୟରେ ଚୁକ୍ତି କରାଇବା ପାଇଁ ନିଜର ରଣନୀତିକୁ ଅତ୍ୟନ୍ତ ଭଲ ଓ ସରଳ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଏହି ରଣନୀତିର ମୁଖ୍ୟ ଉଦ୍ଦେଶ୍ୟ ହେଉଛି ରୁଷ୍କୁ ଆଲୋଚନା ଟେବୁଲ୍ରୁ ଦୂରେଇ ନ ଦେବା। ଏପରି କରିବା ଏକ ମୂର୍ଖତା ହେବ। ଉଭୟ ଦେଶ ଚାହିଁଲେ ବନ୍ଦୀମାନଙ୍କ ମୁକ୍ତି ସମ୍ପର୍କିତ ଆଲୋଚନାର ଦଲିଲ୍ରେ ଯେକୌଣସି ସମୟରେ ସ୍ୱାକ୍ଷର କରିପାରିବେ ବୋଲି ସେ ଦାବି କରିଛନ୍ତି।

ଟ୍ରମ୍ପ ଲେଖିଛନ୍ତି, “ରୁଷ୍କୁ ନେଇ ମୋର ନିଷ୍ପତ୍ତି ସ୍ପଷ୍ଟ। ମୁଁ ରୁଷ୍ ଓ ୟୁକ୍ରେନ୍ ମଧ୍ୟରେ ଶାନ୍ତି ପ୍ରତିଷ୍ଠା ପାଇଁ ଆଲୋଚନା କରୁଛି। ମୁଁ ଏପରି କୌଣସି ପଦକ୍ଷେପ ନେବାକୁ ଚାହୁଁନାହିଁ, ଯାହା ରୁଷ୍କୁ ଆଲୋଚନା ଟେବୁଲ୍ରୁ ଦୂରେଇ ଦେବ। ଏହି ଆଲୋଚନାରେ ବହୁତ ଭଲ ଅଗ୍ରଗତି ହେଉଛି। ଏଥିରେ ବନ୍ଦୀମାନଙ୍କ ମୁକ୍ତି ପ୍ରସଙ୍ଗ ମଧ୍ୟ ସାମିଲ ରହିଛି।” ରୁଷ୍ ଇରାନକୁ ସହାୟତା କରୁଥିବା ଅଭିଯୋଗ ସମ୍ପର୍କରେ ମଧ୍ୟ ଟ୍ରମ୍ପ ନିଜର ମତ ରଖିଛନ୍ତି। ସେ କହିଛନ୍ତି ଯେ ରୁଷ୍ର ସାମର୍ଥ୍ୟ ତୁଳନାରେ ଇରାନକୁ ମସ୍କୋର ସହଯୋଗ ବହୁତ କମ୍।

ହିନ୍ଦୁସ୍ଥାନ ସମାଚାର / ସ୍ୱାଗତିକା