କାଠମାଣ୍ଡୁ, ଅକ୍ଟୋବର ୨୦ (ହି.ସ.)। ବର୍ଷକୁ ମାତ୍ର ଗୋଟିଏ ଦିନ ସାଧାରଣ ଶ୍ରଦ୍ଧାଳୁଙ୍କ ଦର୍ଶନ ପାଇଁ ଖୋଲାଯାଉଥିବା କାଠମାଣ୍ଡୁର ତଲେଜୁ ଭବାନୀ ମନ୍ଦିରରେ ମଙ୍ଗଳବାର ସକାଳୁ ଭକ୍ତମାନଙ୍କର ଲମ୍ବା ଧାଡ଼ି ଲାଗିଛି।
ବିଶ୍ୱ ଐତିହ୍ୟ ତାଲିକାରେ ସ୍ଥାନ ପାଇଥିବା ହନୁମାନଢୋକା ଦରବାର ଅଞ୍ଚଳରେ ଅବସ୍ଥିତ ତଲେଜୁ ଭବାନୀ ମନ୍ଦିରକୁ ମଙ୍ଗଳବାର ସକାଳ ୫ଟାରୁ ସାଧାରଣ ଶ୍ରଦ୍ଧାଳୁଙ୍କ ପାଇଁ ଖୋଲାଯାଇଛି। ତେବେ ମନ୍ଦିର ଖୋଲିବା ପୂର୍ବରୁ ହିଁ ଦର୍ଶନ ପାଇଁ ଭକ୍ତଙ୍କ ଧାଡ଼ି ଲାଗିଯାଇଥିଲା।
ହନୁମାନଢୋକା ଦରବାର ପରିଚାଳନା କାର୍ଯ୍ୟାଳୟର ମୁଖ୍ୟ ଜୟନ୍ତୀ ଶ୍ରେଷ୍ଠ ପ୍ରଧାନ କହିଛନ୍ତି ଯେ, ମନ୍ଦିରରେ ସକାଳ ୫ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ପୂଜାର୍ଚ୍ଚନା ଓ ଦର୍ଶନର ବ୍ୟବସ୍ଥା କରାଯାଇଛି।
ପ୍ରତିବର୍ଷ ଶାରଦୀୟ ନବରାତ୍ରିର ମହାନବମୀ ଅବସରରେ ହିଁ ଏହି ମନ୍ଦିରକୁ ସାଧାରଣ ଭକ୍ତଙ୍କ ପାଇଁ ଖୋଲାଯାଏ। ତେବେ କରୋନା ମହାମାରୀ ଯୋଗୁଁ ୨୦୨୦ରେ ମନ୍ଦିରକୁ ସାଧାରଣ ଲୋକଙ୍କ ପାଇଁ ଖୋଲାଯାଇନଥିଲା।
ଆଶ୍ୱିନ ଶୁକ୍ଳ ନବମୀ ଅର୍ଥାତ୍ ମହାନବମୀ ଦିନ ଖୋଲୁଥିବା ଏହି ମନ୍ଦିରରେ ପ୍ରତିବର୍ଷ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥାଏ। ନେପାଳ ପଞ୍ଚାଙ୍ଗ ନିର୍ଣ୍ଣାୟକ ବିକାଶ ସମିତି ପକ୍ଷରୁ ନିର୍ଦ୍ଧାରିତ ଶୁଭ ମୁହୂର୍ତ୍ତ ଅନୁଯାୟୀ, ଗତ ଶନିବାର ସକାଳ ୭ଟା ୩୭ ମିନିଟ୍ରେ ତୁଲଜା ଭବାନୀଙ୍କୁ ହନୁମାନଢୋକା ଦରବାର ଅଞ୍ଚଳର ମୂଳଚୋକକୁ ଅଣାଯାଇଥିଲା। ସେହିଦିନ ସକାଳ ୧୦ଟା ୩୯ ମିନିଟ୍ରେ ଦେବୀଙ୍କୁ ନିର୍ଦ୍ଧାରିତ ଆସନରେ ବିରାଜମାନ କରାଯାଇଥିଲା।
ମୂଳଚୋକରେ ତଲେଜୁ ଭବାନୀଙ୍କୁ ବିରାଜମାନ କରାଯିବା ପରେ ମହାଅଷ୍ଟମୀ ରାତିରେ କାଳରାତ୍ରି ପୂଜା କରାଯାଇଥିଲା। ମନ୍ଦିର ପରିଚାଳନା କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ, ଏହି ପୂଜା ସମୟରେ ୫୪ଟି ଛେଳି ଓ ୫୪ଟି ମଇଁଷି ବଳି ଦିଆଯାଇ ଦେବୀଙ୍କ ଆରାଧନା କରାଯାଇଥିଲା।
ବିଜୟାଦଶମୀ ପର୍ଯ୍ୟନ୍ତ ତଲେଜୁ ଭବାନୀଙ୍କୁ ମୂଳଚୋକରେ ରଖି ପୂଜାର୍ଚ୍ଚନା କରାଯିବ। ବୁଧବାର ବିଜୟାଦଶମୀ ଦିନ ସମିତି ପକ୍ଷରୁ ନିର୍ଦ୍ଧାରିତ ଶୁଭ ମୁହୂର୍ତ୍ତ ଅନୁଯାୟୀ, ସକାଳ ୧୦ଟା ୫୧ ମିନିଟ୍ରେ ଦେବୀଙ୍କ ଶୋଭାଯାତ୍ରା ବାହାରିବ। ଏହାପରେ ସକାଳ ୧୧ଟା ୫୨ ମିନିଟ୍ରେ ତଲେଜୁ ଭବାନୀଙ୍କୁ ତାଙ୍କ ମୂଳ ମନ୍ଦିରରେ ପୁନର୍ବାର ନିର୍ଦ୍ଧାରିତ ଆସନରେ ବିରାଜମାନ କରାଯିବ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
