ଭୁବନେଶ୍ୱର, 21 ଅକ୍ଟୋବର (ହି.ସ.) ସିଜେପି ପ୍ରସଙ୍ଗରେ ନବୀନ ପଟ୍ଟନାୟକଙ୍କୁ ଟାର୍ଗେଟ୍ କରିବା ଦୁର୍ଭାଗ୍ୟଜନକ: ରାଜନୈତିକ ଆକ୍ଷେପ ନୁହେଁ, ଯୁକ୍ତି ଓ ତଥ୍ୟ ଆଧାରରେ ଆଲୋଚନା କରୁ ସରକାରୀ ଦଳ ବୋଲି କହିଛନ୍ତି ବରିଷ୍ଠ ନେତା ସଞ୍ଜୟ ଦାସବର୍ମା।

ଶ୍ରୀ ଦାସବର୍ମା କହିଛନ୍ତି ସିଜେପି ନେତା ସୌରଭ ଦାସ ଓ ଆଶୁତୋଷ ରାଙ୍କାଙ୍କୁ ଅଟକ ରଖିବା ଘଟଣା ଗଣତାନ୍ତ୍ରିକ ଅଧିକାର ଓ ମତପ୍ରକାଶର ସ୍ୱାଧୀନତାକୁ ନେଇ ଅନେକ ପ୍ରଶ୍ନ ଉଠାଇଛି। ଏହି ଘଟଣାରେ ନିରପେକ୍ଷ ତଦନ୍ତ ସହ ସତ୍ୟ ସାମ୍ନାକୁ ଆସିବା ଆବଶ୍ୟକ। ଗଣତନ୍ତ୍ରରେ ଆଇନର ଶାସନ ଓ ନାଗରିକଙ୍କ ଅଧିକାରର ସୁରକ୍ଷା ସର୍ବୋପରି।

ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ସିଜେପି ପ୍ରସଙ୍ଗରେ ଆଭିମୁଖ୍ୟକୁ ନେଇ ବିଜେପି ରାଜ୍ୟ ସଭାପତି ମନମୋହନ ସାମଲ ଯେଉଁଭଳି ଭାଷାରେ ସମାଲୋଚନା କରିଛନ୍ତି, ତାହା ରାଜନୈତିକ ଶିଷ୍ଟାଚାର ଓ ଗଣତାନ୍ତ୍ରିକ ମୂଲ୍ୟବୋଧକୁ ନେଇ ଗମ୍ଭୀର ପ୍ରଶ୍ନ ଉଠାଉଛି। ଜଣେ ବିରୋଧୀ ଦଳ ନେତାଙ୍କ ମତାମତ ସହ ସହମତ ନହେବା ସରକାରୀ ଦଳର ଅଧିକାର, କିନ୍ତୁ ତାହାର ଜବାବ ଯୁକ୍ତି ଓ ତଥ୍ୟ ମାଧ୍ୟମରେ ଦେବା ପରିବର୍ତ୍ତେ ବ୍ୟକ୍ତିଗତ ଆକ୍ଷେପ କରିବା ଆଦୌ ଗ୍ରହଣୀୟ ନୁହେଁ।

ନବୀନ ପଟ୍ଟନାୟକଙ୍କୁ ଦିଗହରା କହିବା ପୂର୍ବରୁ ରାଜ୍ୟ ସରକାର ନିଜ ଦିଗ ଓ ନୀତି ସମ୍ପର୍କରେ ଜନସାଧାରଣଙ୍କୁ ସ୍ପଷ୍ଟ ଉତ୍ତର ଦେବା ଆବଶ୍ୟକ। ଗଣତନ୍ତ୍ରରେ ବିରୋଧୀ ଦଳର କାମ ହେଉଛି ସରକାରଙ୍କୁ ପ୍ରଶ୍ନ କରିବା, ସରକାରଙ୍କ ନୀତିକୁ ସମୀକ୍ଷା କରିବା ଏବଂ ଜନସାଧାରଣଙ୍କ ସ୍ୱାର୍ଥର ସୁରକ୍ଷା କରିବା। ଏହାକୁ ଦେଶବିରୋଧୀ ମାନସିକତା ସହ ଯୋଡ଼ିବା ଅର୍ଥ ଗଣତାନ୍ତ୍ରିକ ମତଭେଦକୁ ଅସହିଷ୍ଣୁତାର ଚଷମାରେ ଦେଖିବା।

ଦେଶର ସ୍ୱାର୍ଥ ଓ ସମ୍ବିଧାନର ମର୍ଯ୍ୟାଦା ସମସ୍ତଙ୍କ ପାଇଁ ସମାନ। କିନ୍ତୁ ଦେଶପ୍ରେମର ପ୍ରମାଣପତ୍ର ବାଣ୍ଟିବାର ଅଧିକାର କୌଣସି ରାଜନୈତିକ ଦଳର ଏକଚାଟିଆ ନୁହେଁ। କୌଣସି ନେତାଙ୍କ ମତ ସହ ଅସହମତି ଥିଲେ, ତାହାର ଉତ୍ତର ଯୁକ୍ତି ଓ ତଥ୍ୟରେ ଦିଆଯାଉ। କେବଳ ରାଜନୈତିକ ଫାଇଦା ପାଇଁ ଜାତୀୟତାବାଦର ଆଢ଼ୁଆଳରେ ବିରୋଧୀଙ୍କୁ ଟାର୍ଗେଟ୍ କରିବା ବନ୍ଦ ହେଉ।

ବିଜେପି ନେତୃତ୍ୱଙ୍କୁ ଆମର ସ୍ପଷ୍ଟ ପ୍ରଶ୍ନ— ଆପଣମାନେ କ’ଣ ଚାହୁଁଛନ୍ତି ଯେ ବିରୋଧୀ ଦଳ ସରକାରଙ୍କ ପ୍ରତ୍ୟେକ କଥାରେ ହଁ ଭରନ୍ତୁ? ଯଦି ନୁହେଁ, ତେବେ ବିରୋଧୀଙ୍କ ପ୍ରତ୍ୟେକ ମତକୁ ନେଇ ଏଭଳି ଭାଷା କାହିଁକି? ଗଣତନ୍ତ୍ରରେ ପ୍ରଶ୍ନ କରିବା ଅପରାଧ ନୁହେଁ, ବରଂ ଏହା ଏକ ଦାୟିତ୍ୱ।

ନବୀନ ପଟ୍ଟନାୟକ ଦୀର୍ଘବର୍ଷ ଧରି ଓଡ଼ିଶାର ରାଜନୀତିରେ ଏକ ପରିଚିତ ନେତୃତ୍ୱ ଭାବେ କାର୍ଯ୍ୟ କରିଛନ୍ତି। ତାଙ୍କ ରାଜନୈତିକ ମତ ଓ ଆଭିମୁଖ୍ୟକୁ ନେଇ ତର୍କ ହୋଇପାରେ, ସମାଲୋଚନା ମଧ୍ୟ ହୋଇପାରେ। କିନ୍ତୁ ତାଙ୍କୁ ଅପମାନିତ କରିବା କିମ୍ବା ଦେଶର ସ୍ୱାର୍ଥ ବିରୋଧରେ ଥିବା ଭଳି ଚିତ୍ରଣ କରିବା ପୂର୍ବରୁ ସମ୍ପୃକ୍ତ ମତ ଓ ତାହାର ପ୍ରକୃତ ପ୍ରସଙ୍ଗକୁ ନେଇ ତଥ୍ୟଭିତ୍ତିକ ଆଲୋଚନା ହେବା ଦରକାର।

୧୩ କୋଟି ଭାରତୀୟ ଓ ୨୭ ଲକ୍ଷ ଓଡ଼ିଆ ଭୋଟ ଦେବାରୁ ବଞ୍ଚିତ ହୋଇଥିବା ଦାବି ଗଣତାନ୍ତ୍ରିକ ଅଧିକାର ଓ ନିର୍ବାଚନୀ ପ୍ରକ୍ରିୟାକୁ ନେଇ ଅନେକ ପ୍ରଶ୍ନ ଉଠାଉଛି। ପ୍ରତ୍ୟେକ ଯୋଗ୍ୟ ନାଗରିକଙ୍କ ଭୋଟ ମୂଲ୍ୟବାନ। ଭୋଟର ତାଲିକାର ସ୍ୱଚ୍ଛତା, ସଠିକତା ଏବଂ ସମସ୍ତ ଯୋଗ୍ୟ ଭୋଟରଙ୍କ ଅଧିକାର ସୁରକ୍ଷା ନିଶ୍ଚିତ ହେବା ଆବଶ୍ୟକ।

ଆଜି ଓଡ଼ିଶାବାସୀ ରାଜନୈତିକ ବୟାନବାଜି ନୁହେଁ, ବରଂ ରୋଜଗାର, ଚାଷୀଙ୍କ ସମସ୍ୟା, ମହିଳାଙ୍କ ସୁରକ୍ଷା, ଯୁବକଙ୍କ ଭବିଷ୍ୟତ ଓ ରାଜ୍ୟର ବିକାଶ ଉପରେ ଉତ୍ତର ଚାହୁଁଛନ୍ତି। ଏହି ମୂଳ ପ୍ରସଙ୍ଗରୁ ଜନସାଧାରଣଙ୍କ ଧ୍ୟାନ ହଟାଇବା ପରିବର୍ତ୍ତେ ସରକାରୀ ଦଳ ନିଜର କାର୍ଯ୍ୟ ଓ ନୀତିର ହିସାବ ଦେଉ।

ରାଜନୈତିକ ଆକ୍ଷେପ ଓ ବ୍ୟକ୍ତିଗତ ସମାଲୋଚନା ବନ୍ଦ କରି ରାଜ୍ୟର ଜନସ୍ୱାର୍ଥ ସମ୍ପର୍କିତ ପ୍ରସଙ୍ଗରେ ଖୋଲା ବିତର୍କ କରାଯାଉ। ଗଣତନ୍ତ୍ରରେ ସରକାର ଓ ବିରୋଧୀ ପରସ୍ପରର ଶତ୍ରୁ ନୁହନ୍ତି; ସେମାନେ ଜନସାଧାରଣଙ୍କ ପ୍ରତି ଉତ୍ତରଦାୟୀ। ଏହି ସତ୍ୟକୁ ବିଜେପି ନେତୃତ୍ୱ ମନେ ରଖିବା ଆବଶ୍ୟକ।

ଜନସାଧାରଣ ସବୁ ଦେଖୁଛନ୍ତି, ସବୁ ବୁଝୁଛନ୍ତି। ରାଜନୈତିକ ଆକ୍ଷେପ ନୁହେଁ, କାର୍ଯ୍ୟ ଓ ନୀତି ହିଁ ଜନସାଧାରଣଙ୍କ ବିଶ୍ୱାସର ମାପକାଠି।

---------------

ହିନ୍ଦୁସ୍ଥାନ ସମାଚାର / ରଶ୍ମିତା