ଜୟପୁର, , 21 ଅକ୍ଟୋବର (ହି.ସ.)ଆନ୍ଧ୍ର ପ୍ରଦେଶ ସରକାର ବିବାଦୀୟ କୋଟିଆ ଅଞ୍ଚଳରେ ପଞ୍ଚାୟତ ନିର୍ବାଚନ କରିବାକୁ ନିଷ୍ପତ୍ତି ନେଇଥିବା ସୂଚନା ପାଇବା ପରେ ବିରୋଧୀ, ଶାସକ ମୁହାଁ ମୁହିଁ ପରିସ୍ଥିତି ସୃଷ୍ଟି ହୋଇଛି l ରାଜ୍ୟ ସରକାର ସେଠାକାର ଗତିବିଧି ଉପରେ ନଜର ରଖିବା ଏବଂ ବିକାଶମୂଳକ କାର୍ଯ୍ୟର ସମୀକ୍ଷା କରିବା ପାଇଁ ରାଜ୍ୟ ସରକାର ସେଠାରେ ପୋଲିସ ଓ ରାଜସ୍ୱ ବିଭାଗର ଅଧିକାରୀଙ୍କୁ ନିୟୋଜିତ କରିବେ। ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଏହି ସୂଚନା ଦେଇଛନ୍ତି।

ଦୀର୍ଘଦିନ ଧରି ଚାଲିଆସୁଥିବା ଏହି ସୀମା ବିବାଦ ସମ୍ପର୍କରେ ଆଲୋଚନା କରିବା ପାଇଁ ମନ୍ତ୍ରୀ ପୂଜାରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ସମୀକ୍ଷା ବୈଠକରେ ଏହି ନିଷ୍ପତ୍ତି ନିଆଯାଇଥିବା ଜଣାଯାଇଛି । ଉଭୟ ବିଭାଗରୁ ଜଣେ ଲେଖାଏଁ ଅଧିକାରୀଙ୍କୁ କୋଟିଆରେ ମୁତୟନ କରାଯିବ। ସେମାନେ ସେହି ଅଞ୍ଚଳର ସ୍ଥିତି, ଆନ୍ଧ୍ର ପ୍ରଦେଶର କାର୍ଯ୍ୟକଳାପ ଏବଂ ଓଡ଼ିଶା ଦ୍ୱାରା ଚାଲୁ ରହିଥିବା ବିଭିନ୍ନ ପ୍ରକଳ୍ପ ସମ୍ପର୍କରେ ରାଜ୍ୟ ସରକାରଙ୍କୁ ନିୟମିତ ରିପୋର୍ଟ ପ୍ରଦାନ କରିବେ ବୋଲି ନିଦ୍ଦେଶ ରହିଛି l

ଏହି ବୈଠକରେ କୋରାପୁଟ ଜିଲ୍ଲାପାଳ ଓ ଆରକ୍ଷୀ ଅଧୀକ୍ଷକ , ଦକ୍ଷିଣାଞ୍ଚଳ ରାଜସ୍ୱ ବିଭାଗୀୟ କମିଶନର , ଆଡଭୋକେଟ୍ ଜେନେରାଲ୍, ଆଇନ ସଚିବ ଏବଂ ରାଜସ୍ୱ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।

ମନ୍ତ୍ରୀ ପୂଜାରୀ କହିଛନ୍ତି ଯେ, ଓଡ଼ିଶାର ଭୌଗୋଳିକ ସ୍ୱାର୍ଥ ରକ୍ଷା ପାଇଁ ରାଜ୍ୟ ସରକାର ସୁପ୍ରିମକୋର୍ଟରେ ଆଇନଗତ ପଦକ୍ଷେପ ଗ୍ରହଣ କରିବେ। ଏଥିପାଇଁ ପୂର୍ବରୁ ଲମ୍ବିତ ଥିବା 'ଅଦାଲତ ଅବମାନନା ମାମଲା' କୁ ପୁନର୍ଜୀବିତ କରାଯିବ କିମ୍ବା ଆବଶ୍ୟକ ପଡ଼ିଲେ ନୂତନ ମାମଲା ଦାୟର କରାଯିବ।

ଏହି ବିବାଦର ଆଇନଗତ ଇତିହାସ ଉପରେ ଆଲୋକପାତ କରି ସେ କହିଲେ ଯେ, ଓଡ଼ିଶା ୧୯୬୮ ମସିହାରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା। ଏହାପରେ କ ଅନ୍ୟପକ୍ଷରେ, ବିରୋଧୀ ଦଳ ବିଜେଡି ଦୃଢ଼ତାର ସହ କହିଛି ଯେ କୋଟିଆ ଓଡ଼ିଶାର ଅଟେ। ଏହା ସହ, ସାମ୍ପ୍ରତିକ ଘଟଣାକ୍ରମ ଉପରେ ଉପଯୁକ୍ତ ପ୍ରତିକ୍ରିୟା ଦେବାରେ ବିଜେପି ସରକାର ବିଫଳ ହୋଇଛନ୍ତି ବୋଲି ଦଳ ଅଭିଯୋଗ କରିଛି।

ବିଜେଡି ମୁଖପାତ୍ର ଲେନିନ୍ ମହାନ୍ତି ଦାବି କରିଛନ୍ତି ଯେ, ୨୦୦୦ ରୁ ୨୦୨୪ ମଧ୍ୟରେ ପୂର୍ବ ସରକାର ଏହି ଅଞ୍ଚଳରେ ଯୋଗାଯୋଗ ବ୍ୟବସ୍ଥା ଏବଂ ଜନସେବାର ଉନ୍ନତି ପାଇଁ କ୍ରମାଗତ ଭାବେ ବିଭିନ୍ନ ବିକାଶମୂଳକ ପଦକ୍ଷେପ ଗ୍ରହଣ କରିଥିଲେ।

ସେ ଉଲ୍ଲେଖ କରିଛନ୍ତି ଯେ, କୋଟିଆକୁ କୁଣ୍ଡୁଲି, ଡୋଲିଆମ୍ବୋ-ନାରିଙ୍ଗିପଦର, ଦେଓମାଲି ଏବଂ ଅନ୍ୟାନ୍ୟ ଭିତର ଅଞ୍ଚଳ ସହ ସଂଯୋଗ କରୁଥିବା ରାସ୍ତା ପ୍ରକଳ୍ପଗୁଡ଼ିକ କାର୍ଯ୍ୟକାରୀ କରାଯାଇଥିଲା। ଏହା ବ୍ୟତୀତ, ସେଠାରେ ଏକ ଓଡ଼ିଶା ଆଦର୍ଶ ବିଦ୍ୟାଳୟ, ଆଦିବାସୀ ଛାତ୍ର ଓ ଛାତ୍ରୀଙ୍କ ପାଇଁ ଛାତ୍ରାବାସ, ଅଙ୍ଗନୱାଡ଼ି କେନ୍ଦ୍ର ଏବଂ ବିଦ୍ୟାଳୟ ଗୃହ ମଧ୍ୟ ନିର୍ମାଣ କରାଯାଇଥିଲା।

ଶ୍ରୀ ମହାନ୍ତି କହିଛନ୍ତି ଯେ, ଏକ ୧୦ ଶଯ୍ୟା ବିଶିଷ୍ଟ ଡାକ୍ତରଖାନା, ଉନ୍ନତ ସ୍ୱାସ୍ଥ୍ୟ ଉପ-କେନ୍ଦ୍ର ଏବଂ ଚଳନ୍ତି ଚିକିତ୍ସା କେନ୍ଦ୍ର ମାଧ୍ୟମରେ ସ୍ୱାସ୍ଥ୍ୟସେବା ଭିତ୍ତିଭୂମିର ସମ୍ପ୍ରସାରଣ କରାଯାଇଥିଲା। ଏହା ସହିତ, ସେଠାରେ ଏକ ଥାନା ସ୍ଥାପନ କରାଯିବା ସହ ବିଦ୍ୟୁତ୍, ପାନୀୟ ଜଳ ଏବଂ ମୋବାଇଲ୍ ଯୋଗାଯୋଗ ବ୍ୟବସ୍ଥାରେ ଉନ୍ନତି ଅଣାଯାଇଥିଲା।

ସେ ଆହୁରି ମଧ୍ୟ କହିଛନ୍ତି ଯେ, 'ବିଜୁ ପକ୍କା ଘର ଯୋଜନା' ଅଧୀନରେ ଶହ ଶହ ପରିବାରକୁ ପକ୍କା ଘର ଯୋଗାଇ ଦିଆଯାଇଛି।

କୋରାପୁଟ ଜିଲ୍ଲାର ଓଡ଼ିଶା-ଆନ୍ଧ୍ରପ୍ରଦେଶ ସୀମାରେ ଅବସ୍ଥିତ କୋଟିଆ, ଦୀର୍ଘ ଦଶନ୍ଧି ଧରି ଉଭୟ ରାଜ୍ୟ ମଧ୍ୟରେ ବିବାଦର କାରଣ ହୋଇ ରହିଆସିଛି। ଏହି ଅଞ୍ଚଳରେ ଆନ୍ଧ୍ରପ୍ରଦେଶ ଦ୍ୱାରା ପଞ୍ଚାୟତ ନିର୍ବାଚନ କରାଇବାକୁ ନିଆଯାଇଥିବା ପଦକ୍ଷେପ, ଓଡ଼ିଶାର ପ୍ରଶାସନିକ ଉପସ୍ଥିତି ଏବଂ ଭୌଗୋଳିକ ଦାବିକୁ ନେଇ ପୁଣି ଥରେ ଚିନ୍ତା ବଢିଥିବା ବେଳେ ରାଜ୍ୟ ସରକାର ଏହାକୁ କିପରି ମୁକାବିଲା କରିବେ ତାହା ଉପରେ ସମସ୍ତ ଙ୍କ ନଜର ରହିଛି l

---------------

ହିନ୍ଦୁସ୍ଥାନ ସମାଚାର / ପିକେପି