ଦୋହା, ୨୨ ଅକ୍ଟୋବର (ହି.ସ.)। ପାକିସ୍ତାନ, ତୁର୍କୀ, କତାର ଓ ଇଣ୍ଡୋନେସିଆ ନିଜର ପ୍ରତିରକ୍ଷା ସହଯୋଗକୁ ସୁଦୃଢ଼ କରିବା ଏବଂ ସାମରିକ କ୍ଷମତା ବୃଦ୍ଧି କରିବା ଉଦ୍ଦେଶ୍ୟରେ ବୁଧବାର ‘ବଦ୍ର ମେମୋରାଣ୍ଡମ୍ ଅଫ୍ ଅଣ୍ଡରଷ୍ଟାଣ୍ଡିଂ’ (ବୁଝାମଣାପତ୍ର) ଉପରେ ସ୍ୱାକ୍ଷର କରିଛନ୍ତି। କତାରର ରାଜଧାନୀ ଦୋହାରେ ସ୍ୱାକ୍ଷରିତ ଏହି ଚୁକ୍ତିର ମୁଖ୍ୟ ଉଦ୍ଦେଶ୍ୟ ହେଉଛି ସାମରିକ ଉତ୍ପାଦନ, ପ୍ରତିରକ୍ଷା ପ୍ରଯୁକ୍ତିବିଦ୍ୟା, ପ୍ରଶିକ୍ଷଣ ଏବଂ ଗବେଷଣା ଓ ବିକାଶ (ଆର୍ ଆଣ୍ଡ୍ ଡି) କ୍ଷେତ୍ରରେ ଚାରିଟି ଦେଶ ମଧ୍ୟରେ ସହଯୋଗ ବୃଦ୍ଧି କରିବା।

ପାକିସ୍ତାନର ଉର୍ଦ୍ଦୁ ଟେଲିଭିଜନ୍ ଚ୍ୟାନେଲ୍ ଦୁନିଆ ନ୍ୟୁଜ୍ ଏବଂ ଅନ୍ତର୍ଜାତୀୟ ଗଣମାଧ୍ୟମ ଜିଓ ନ୍ୟୁଜ୍ର ରିପୋର୍ଟ ଅନୁଯାୟୀ, ତୁର୍କୀର ଜାତୀୟ ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ଏହି ଚୁକ୍ତି ଚାରିଟି ଦେଶର ପ୍ରତିରକ୍ଷା ଶିଳ୍ପ ମଧ୍ୟରେ ସହଭାଗିତାକୁ ଅଧିକ ମଜଭୁତ କରିବା ସହ ସେମାନଙ୍କ ଶିଳ୍ପଗତ କ୍ଷମତାର ବିକାଶ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହି ପଦକ୍ଷେପ ଦ୍ୱାରା ପ୍ରତ୍ୟେକ ଦେଶର ପ୍ରତିରକ୍ଷା ଉତ୍ପାଦନ କ୍ଷେତ୍ରରେ ଥିବା ଦକ୍ଷତାର ଉପଯୋଗ, ମିଳିତ ପ୍ରକଳ୍ପକୁ ପ୍ରୋତ୍ସାହନ ଏବଂ ମିତ୍ର ଦେଶଗୁଡ଼ିକର ପ୍ରତିରକ୍ଷା ଆବଶ୍ୟକତା ପୂରଣ କରିବାରେ ସହାୟତା ମିଳିପାରିବ।

ଏହି ବୁଝାମଣାପତ୍ର ସ୍ୱାକ୍ଷର ସମାରୋହରେ ଚାରିଟି ଦେଶର ବରିଷ୍ଠ ପ୍ରତିରକ୍ଷା ପ୍ରତିନିଧିମାନେ ଉପସ୍ଥିତ ଥିଲେ। ତୁର୍କୀର ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ପାକିସ୍ତାନ ପକ୍ଷରୁ ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ୍, ତୁର୍କୀ ପକ୍ଷରୁ ପ୍ରତିରକ୍ଷା ମନ୍ତ୍ରୀ ୟାସର ଗୁଲର, କତାର ପକ୍ଷରୁ ଉପପ୍ରଧାନମନ୍ତ୍ରୀ ତଥା ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ଶେଖ୍ ସାଉଦ୍ ବିନ୍ ଅବଦୁଲ୍ ରହମାନ ଏବଂ ଇଣ୍ଡୋନେସିଆ ପକ୍ଷରୁ ଉପପ୍ରତିରକ୍ଷା ମନ୍ତ୍ରୀ ୟୁସୁଫ୍ ଜୌହରୀ ଏଥିରେ ଯୋଗ ଦେଇଥିଲେ। ଏହି ସମାରୋହରେ ତୁର୍କୀର ପ୍ରତିରକ୍ଷା ଶିଳ୍ପ ସଚିବାଳୟର ମୁଖ୍ୟ ହାଲୁକ୍ ଗୋରଗୁନ୍ ମଧ୍ୟ ଉପସ୍ଥିତ ଥିଲେ।

ହିନ୍ଦୁସ୍ଥାନ ସମାଚାର / ସ୍ୱାଗତିକା