ନୂଆଦିଲ୍ଲୀ, ୨୨ ଅକ୍ଟୋବର (ହି.ସ.)- ଦିଲ୍ଲୀ ବିଶ୍ୱବିଦ୍ୟାଳୟ (ଡିୟୁ)ର ୧୦୩ତମ ଦୀକ୍ଷାନ୍ତ ସମାରୋହ ନଭେମ୍ବର ୨୦ ତାରିଖରେ ଆୟୋଜିତ ହେବ। ଏହି ସମାରୋହରେ କେନ୍ଦ୍ରୀୟ ଗୃହମନ୍ତ୍ରୀ ଅମିତ ଶାହ ମୁଖ୍ୟ ଅତିଥି ଭାବେ ଯୋଗଦେବେ। ଅନ୍ୟପକ୍ଷରେ, ଦିଲ୍ଲୀ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଯୋଗେଶ ସିଂହ ସମାରୋହରେ ଅଧ୍ୟକ୍ଷତା କରିବେ।

ଦୀକ୍ଷାନ୍ତ ସମାରୋହର ପ୍ରସ୍ତୁତି ସମ୍ପର୍କରେ କୁଳପତି ଗୁରୁବାର ସମ୍ପୃକ୍ତ ଅଧିକାରୀମାନଙ୍କ ସହ ଏକ ବୈଠକ କରି ବ୍ୟବସ୍ଥାଗୁଡ଼ିକର ସମୀକ୍ଷା କରିବା ସହ ଆବଶ୍ୟକ ନିର୍ଦ୍ଦେଶ ଦେଇଛନ୍ତି। ଏହି ବୈଠକରେ ବିଶ୍ୱବିଦ୍ୟାଳୟର କୁଳସଚିବ ଡକ୍ଟର ବିକାଶ ଗୁପ୍ତା, ପରୀକ୍ଷା ନିୟନ୍ତ୍ରକ ପ୍ରଫେସର ଗୁରପ୍ରୀତ ସିଂହ ଟୁଟେଜା, ସାଂସ୍କୃତିକ ପରିଷଦର ଅଧ୍ୟକ୍ଷ ତଥା ଜନସମ୍ପର୍କ ଅଧିକାରୀ ଅନୁପ ଲାଠର, ଶୈକ୍ଷିକ ବିଭାଗର ଡିନ୍ ପ୍ରଫେସର କେ. ରତ୍ନାବଳୀଙ୍କ ସମେତ ବିଭିନ୍ନ କମିଟିର ସଂଯୋଜକ ଓ ଅଧିକାରୀମାନେ ଉପସ୍ଥିତ ଥିଲେ।

କୁଳପତି ପ୍ରଫେସର ଯୋଗେଶ ସିଂହ କହିଛନ୍ତି ଯେ ବିଶ୍ୱବିଦ୍ୟାଳୟର ଇତିହାସରେ ପ୍ରଥମଥର ପାଇଁ ଛାତ୍ରଛାତ୍ରୀମାନେ ଯେଉଁ ବର୍ଷ ନିଜର ପାଠ୍ୟକ୍ରମ ସମାପ୍ତ କରିବେ, ସେହି ବର୍ଷ ହିଁ ସେମାନଙ୍କୁ ଡିଗ୍ରୀ ପ୍ରଦାନ କରାଯିବ। ଅନେକ ଛାତ୍ରଛାତ୍ରୀଙ୍କୁ ଉଚ୍ଚଶିକ୍ଷା ପାଇଁ ବିଦେଶ ଯିବା କିମ୍ବା ଚାକିରି ପାଇବା ନିମନ୍ତେ ଡିଗ୍ରୀର ଆବଶ୍ୟକତା ହୋଇଥାଏ। ତେଣୁ ସେମାନଙ୍କୁ ଠିକ୍ ସମୟରେ ଡିଗ୍ରୀ ଯୋଗାଇଦେବା ଏବଂ ସେମାନଙ୍କ ସୁବିଧାକୁ ଧ୍ୟାନରେ ରଖି ଏହି ନିଷ୍ପତି ନିଆଯାଇଛି।

ପ୍ରଫେସର ଯୋଗେଶ ସିଂହଙ୍କ ଅନୁଯାୟୀ, ଚଳିତ ବର୍ଷ ଦୀକ୍ଷାନ୍ତ ସମାରୋହରେ ୮୫,୨୩୧ ଜଣ ସ୍ନାତକ ଏବଂ ୭,୨୩୫ ଜଣ ସ୍ନାତକୋତର ଛାତ୍ରଛାତ୍ରୀଙ୍କୁ ଡିଗ୍ରୀ ପ୍ରଦାନ କରାଯିବ। ଏହା ବ୍ୟତୀତ ୪୦୦ରୁ ଅଧିକ ପିଏଚ୍ଡି ଗବେଷକଙ୍କୁ ମଧ୍ୟ ଉପାଧି ପ୍ରଦାନ କରାଯିବ।

ସମାରୋହ ଅବସରରେ ୧୬୩ ଜଣ ଛାତ୍ରଛାତ୍ରୀଙ୍କୁ ସ୍ୱର୍ଣ୍ଣ ପଦକ, ଜଣେ ଛାତ୍ରଙ୍କୁ ରୌପ୍ୟ ପଦକ ଏବଂ ୩୪ ଜଣ ଛାତ୍ରଛାତ୍ରୀଙ୍କୁ ବିଭିନ୍ନ ପୁରସ୍କାର ପ୍ରଦାନ କରି ସମ୍ମାନିତ କରାଯିବ।

----------------

ହିନ୍ଦୁସ୍ଥାନ ସମାଚାର / ଗଗନ