ରାୟପୁର, ୨୨ ଅକ୍ଟୋବର (ହି.ସ.)- ରାଷ୍ଟ୍ରପତି ଦ୍ରୌପଦୀ ମୁର୍ମୁ ଗୁରୁବାର ଲୋକଭବନର ଛତିଶଗଡ଼ ମଣ୍ଡପମ୍ରେ ହାସୀ ଦେବୀଙ୍କ ସମ୍ମାନରେ ୨୦୦ ଟଙ୍କିଆ ସ୍ମାରକ ମୁଦ୍ରା ଜାରି କରିଛନ୍ତି। ଏହି ଅବସରରେ ରାଜ୍ୟପାଳ ରମେନ ଡେକା ଏବଂ ମୁଖ୍ୟମନ୍ତ୍ରୀ ବିଷ୍ଣୁ ଦେଓ ସାଏଙ୍କ ସମେତ ଅନ୍ୟାନ୍ୟ ଅତିଥି ଉପସ୍ଥିତ ଥିଲେ।

ରାୟପୁରର ଶଦାଣୀ ଦରବାରର ପଂଚମ ପୀଠାଧୀଶ ମାତା ସାହିବ ହାସୀ ଦେବୀଙ୍କ ୨୦୦ତମ ଜୟନ୍ତୀ ଅବସରରେ ଆଜି ୨୦୦ ଟଙ୍କିଆ ସ୍ମାରକ ମୁଦ୍ରା ସହିତ ଏକ ସ୍ୱତନ୍ତ୍ର ଡାକ ଟିକଟ ମଧ୍ୟ ଜାରି କରାଯାଇଛି।

ସିନ୍ଧୀ ସମାଜର ଏହି ମହାନ ବ୍ୟକ୍ତିତ୍ୱଙ୍କ ସମ୍ମାନରେ ସ୍ମାରକ ମୁଦ୍ରା ଜାରି ହେବା ସମାଜ ପାଇଁ ଏକ ଐତିହାସିକ ମୁହୂର୍ତ ଥିଲା। ଏହା ଦେଶ-ବିଦେଶରେ ବସବାସ କରୁଥିବା କୋଟି କୋଟି ସିନ୍ଧୀ ସମ୍ପ୍ରଦାୟର ଲୋକଙ୍କ ପାଇଁ ଗର୍ବର ବିଷୟ। ସ୍ମାରକ ମୁଦ୍ରାର ଉନ୍ମୋଚନ ପରେ ଶ୍ରଦ୍ଧାଳୁ ଏବଂ ମୁଦ୍ରା ସଂଗ୍ରହକାରୀମାନେ ଶଦାଣୀ ଦରବାରର ବିଭିନ୍ନ ଶାଖା ମାଧ୍ୟମରେ ଏହାକୁ ବୁକ୍ କରିପାରିବେ।

ଉଲ୍ଲେଖଯୋଗ୍ୟ ଯେ, ଭାରତ ସରକାରଙ୍କ ଦ୍ୱାରା ଜାରି ଏହି ସ୍ୱତନ୍ତ୍ର ମୁଦ୍ରାରେ ମାତା ହାସୀ ଦେବୀଙ୍କ ପ୍ରତିଛବି ଅଙ୍କିତ ହୋଇଛି। ମୁଦ୍ରାର ଗୋଟିଏ ପାର୍ଶ୍ୱରେ ଅଶୋକ ସ୍ତମ୍ଭର ସିଂହ ଶୀର୍ଷ ଏବଂ ୨୦୦ ଟଙ୍କାର ମୂଲ୍ୟବର୍ଗ ଦର୍ଶାଯାଇଛି। ଏହି ସ୍ମାରକ ମୁଦ୍ରା ମାଧ୍ୟମରେ ତାଙ୍କ ଜୀବନ, ବିଚାରଧାରା ଏବଂ ଆଧ୍ୟାତ୍ମିକ ଅବଦାନକୁ ଭବିଷ୍ୟତ ପିଢ଼ି ପର୍ଯ୍ୟନ୍ତ ପହଂଚାଇବାକୁ ପ୍ରୟାସ କରାଯାଇଛି।

କାର୍ଯ୍ୟକ୍ରମରେ ସ୍ୱାଗତ ଅଭିଭାଷଣ ଶଦାଣୀ ଦରବାର, ରାୟପୁରର ପୀଠାଧୀଶ ସନ୍ଥ ଡକ୍ଟର ଯୁଧିଷ୍ଠିର ଲାଲ ପ୍ରଦାନ କରିଥିଲେ।

ଏହି ଅବସରରେ ରାଜ୍ୟର ପ୍ରଥମ ମହିଳା ରାଣୀ ଡେକା କାକୋଟି, ସାଂସଦ ବୃଜମୋହନ ଅଗ୍ରୱାଲ, ବିଧାୟକ ପୁରନ୍ଦର ମିଶ୍ର, ସୁନୀଲ ସୋନୀ, ମୋତିଲାଲ ସାହୁ, ମୁଖ୍ୟ ଶାସନ ସଚିବ ବିକାଶଶୀଳ, ପୁଲିସ ମହାନିର୍ଦ୍ଦେଶକ ଅରୁଣ ଦେବ ଗୌତମ, ରାଜ୍ୟପାଳଙ୍କ ସଚିବ ଡକ୍ଟର ସି. ଆର ପ୍ରସନ୍ନାଙ୍କ ସମେତ ବହୁ ବରିଷ୍ଠ ଅଧିକାରୀ, ଶଦାଣୀ ଦରବାରର ସଦସ୍ୟ, ଦେଶର ବିଭିନ୍ନ ସ୍ଥାନରୁ ଆସିଥିବା ଜନପ୍ରତିନିଧି ଏବଂ ସିନ୍ଧୀ ସମାଜର ପ୍ରତିନିଧିମାନେ ଉପସ୍ଥିତ ଥିଲେ।

---------------

ହିନ୍ଦୁସ୍ଥାନ ସମାଚାର / ଗଗନ