ନୂଆଦିଲ୍ଲୀ, ୨୨ ଅକ୍ଟୋବର (ହି.ସ.)। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର କହିଛନ୍ତି ଯେ, ଭାରତ ଓ ପୋଲାଣ୍ଡ ପ୍ରତିରକ୍ଷା, ମହାକାଶ ଏବଂ ଆଣବିକ ଶକ୍ତି ଭଳି ରଣନୈତିକ କ୍ଷେତ୍ରରେ ସହଯୋଗକୁ ଆହୁରି ମଜବୁତ କରିବାକୁ ସହମତ ହୋଇଛନ୍ତି। ଏହି କ୍ଷେତ୍ରଗୁଡ଼ିକରେ ମିଳିତ ବିକାଶ ଓ ମିଳିତ ଉତ୍ପାଦନ ପାଇଁ ସେ ପୋଲାଣ୍ଡର କମ୍ପାନୀଗୁଡ଼ିକୁ ଭାରତ ସହ ଭାଗୀଦାର ହେବାକୁ ଆମନ୍ତ୍ରଣ କରିଛନ୍ତି।
ପ୍ରଧାନମନ୍ତ୍ରୀ ମୋଦୀ ଓ ପୋଲାଣ୍ଡର ପ୍ରଧାନମନ୍ତ୍ରୀ ଡୋନାଲ୍ଡ ଟସ୍କଙ୍କ ମଧ୍ୟରେ ଗୁରୁବାର ଦିଲ୍ଲୀର ହାଇଦ୍ରାବାଦ ହାଉସ୍ରେ ଆଲୋଚନା ହୋଇଥିଲା। ଆଲୋଚନା ପରେ ଉଭୟ ନେତା ମିଳିତ ସାମ୍ବାଦିକ ବିବୃତି ଦେଇଥିଲେ। ମୋଦୀ କହିଥିଲେ ଯେ, ଭାରତ ଓ ୟୁରୋପୀୟ ସଂଘ ମଧ୍ୟରେ ମୁକ୍ତ ବାଣିଜ୍ୟ ଚୁକ୍ତି ଦ୍ୱିପାକ୍ଷିକ ଆର୍ଥିକ ସହଯୋଗ ପାଇଁ ନୂତନ ସୁଯୋଗର ପରିସରକୁ ବ୍ୟାପକ କରିଛି।
ପୋଲାଣ୍ଡର ପ୍ରଧାନମନ୍ତ୍ରୀଙ୍କୁ ଭାରତରେ ସ୍ୱାଗତ କରି ମୋଦୀ କହିଥିଲେ ଯେ, ୨୦୨୪ ମସିହାରେ ତାଙ୍କ ପୋଲାଣ୍ଡ ଗସ୍ତ ସମୟରେ ଉଭୟ ଦେଶ ନିଜ ସମ୍ପର୍କକୁ ରଣନୈତିକ ଭାଗୀଦାରିର ମାନ୍ୟତା ଦେଇଥିଲେ। ଏହି ମଜବୁତ ଭିତ୍ତିଭୂମି ଉପରେ ଗତ ଦୁଇ ବର୍ଷ ମଧ୍ୟରେ ଦ୍ୱିପାକ୍ଷିକ ଭାଗୀଦାରି ନୂତନ ଗତି ହାସଲ କରିଛି। ଭାରତର ବଢ଼ୁଥିବା ଆର୍ଥିକ ଶକ୍ତି ମଧ୍ୟ ଦୁଇ ଦେଶ ମଧ୍ୟରେ ସହଯୋଗର ନୂଆ ସମ୍ଭାବନା ସୃଷ୍ଟି କରିଛି।
ମୋଦୀ କହିଥିଲେ ଯେ, ଭାରତ ଓ ପୋଲାଣ୍ଡର ସମ୍ପର୍କ କେବଳ କୂଟନୈତିକ ଯୋଗାଯୋଗ ମଧ୍ୟରେ ସୀମିତ ନୁହେଁ, ବରଂ ଏହା ମାନବିକତା ଓ ସମ୍ବେଦନଶୀଳତାର ଏକ ସାଧାରଣ ଐତିହ୍ୟ ଉପରେ ଆଧାରିତ। ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଜାମନଗର ଓ କୋହ୍ଲାପୁରର ରାଜପରିବାରଗୁଡ଼ିକ ପୋଲାଣ୍ଡର ହଜାର ହଜାର ଶିଶୁ ଓ ପରିବାରକୁ ଭାରତରେ ଆଶ୍ରୟ ଦେଇଥିଲେ। ସେ ସାଂସ୍କୃତିକ ଓ ଜନସାଧାରଣଙ୍କ ମଧ୍ୟରେ ସମ୍ପର୍କକୁ ଦୁଇ ଦେଶର ଭାଗୀଦାରିର ସବୁଠାରୁ ବଡ଼ ଶକ୍ତି ବୋଲି କହିଥିଲେ।
ସେ ଆହୁରି କହିଥିଲେ ଯେ, ପୋଲାଣ୍ଡରେ ସଂସ୍କୃତ ଅଧ୍ୟୟନ ଓ ଭାରତବିଦ୍ୟାର ଏକ ସମୃଦ୍ଧ ପରମ୍ପରା ରହିଛି। କ୍ରାକୋଭ୍ ସହରରେ ଭାରତୀୟ ଅଧ୍ୟୟନ ପୀଠ ପ୍ରତିଷ୍ଠା କରିବା ମଧ୍ୟ ଏହି ସାଂସ୍କୃତିକ ସମ୍ପର୍କକୁ ଆଗକୁ ବଢ଼ାଇବାର ଏକ ପ୍ରୟାସ। ଭାରତ ଓ ପୋଲାଣ୍ଡ ଗଣତାନ୍ତ୍ରିକ ମୂଲ୍ୟବୋଧ ଏବଂ ଆଇନର ଶାସନ ଉପରେ ବିଶ୍ୱାସ କରନ୍ତି। ବିଶ୍ୱସ୍ତରୀୟ ଶାସନ ବ୍ୟବସ୍ଥାର ସଂସ୍ଥାଗୁଡ଼ିକୁ ଅଧିକ ସଶକ୍ତ ଓ ପ୍ରଭାବଶାଳୀ କରିବା ପାଇଁ ସେଥିରେ ସଂସ୍କାର ଆଣିବା ଆବଶ୍ୟକ ବୋଲି ଉଭୟ ଦେଶ ମତ ପୋଷଣ କରନ୍ତି।
ୟୁକ୍ରେନ୍ ଓ ପଶ୍ଚିମ ଏସିଆର ପରିସ୍ଥିତି ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ କହିଥିଲେ ଯେ, ଶାନ୍ତି ପ୍ରତିଷ୍ଠା ଦିଗରେ କରାଯାଉଥିବା ପ୍ରତ୍ୟେକ ସାର୍ଥକ ପ୍ରୟାସକୁ ଭାରତ ସମର୍ଥନ ଜାରି ରଖିବ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
