ନୂଆଦିଲ୍ଲୀ, ୨୨ ଅକ୍ଟୋବର (ହି.ସ.)। ଦିଲ୍ଲୀର ଜନ୍ତରମନ୍ତରରେ କଥିତ ଅନଧିକୃତ ପ୍ରବେଶ ଏବଂ ସରକାରୀ ଆଦେଶ ଉଲ୍ଲଂଘନ ସହ ଜଡ଼ିତ ମାମଲାରେ କ୍ରାଇମ୍ ବ୍ରାଞ୍ଚ କକ୍ରୋଚ୍ ଜନତା ପାର୍ଟି (ସିଜେପି)ର ନେତା ସୌରଭ ଦାସ, ଆଶୁତୋଷ ରାଙ୍କା ଏବଂ ଅଜିଙ୍କ୍ୟ ସିନ୍ଦେଙ୍କୁ ସମନ ଜାରି କରିଛି।

ପ୍ରାଥମିକ ସୂଚନା ଅନୁଯାୟୀ, ଏହି ମାମଲା ଅକ୍ଟୋବର ୧୩ ତାରିଖରେ ଜନ୍ତରମନ୍ତରରେ ହୋଇଥିବା ବିରୋଧ ପ୍ରଦର୍ଶନ ସହ ଜଡ଼ିତ। ଏହା ପରେ ଦିଲ୍ଲୀ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ଦୁଇଟି ଏଫ୍ଆଇଆର୍ ରୁଜୁ କରିଥିଲା। ବର୍ତ୍ତମାନ ଏହି ମାମଲାର ତଦନ୍ତ କ୍ରାଇମ୍ ବ୍ରାଞ୍ଚ କରୁଛି।

ଉଲ୍ଲେଖଯୋଗ୍ୟ ଯେ, ଗତ ଅକ୍ଟୋବର ୧୩ ତାରିଖରେ ସୌରଭ ଦାସ, ଆଶୁତୋଷ ରାଙ୍କା, ଅଜିଙ୍କ୍ୟ ସିନ୍ଦେ ଏବଂ ସିଜେପିର ଅନ୍ୟ ୧୧ ଜଣ ସଦସ୍ୟ ଜନ୍ତରମନ୍ତରରେ ପହଞ୍ଚିଥିଲେ। ପୁଲିସର ଅଭିଯୋଗ ଅନୁଯାୟୀ, ପ୍ରଦର୍ଶନକାରୀମାନେ ଏକ ଘରୋଇ ପରିସର ଦେଇ ସେହି ସ୍ଥାନକୁ ପ୍ରବେଶ କରିଥିଲେ, ଯାହାକୁ ଆନୁଷ୍ଠାନିକ ଭାବେ ପ୍ରଦର୍ଶନ ସ୍ଥଳ ଭାବେ ଘୋଷଣା କରାଯାଇ ନଥିଲା। ପୁଲିସ କର୍ମଚାରୀମାନେ ସେମାନଙ୍କୁ ଅଟକାଇବାକୁ ଚେଷ୍ଟା କରିଥିଲେ। କିନ୍ତୁ ପୁଲିସର କହିବା ଅନୁଯାୟୀ, ପ୍ରଦର୍ଶନକାରୀମାନେ ବ୍ୟାରିକେଡ୍ ଡେଇଁଥିଲେ ଏବଂ ଅଧିକାରୀମାନଙ୍କୁ ସେମାନଙ୍କ କର୍ତ୍ତବ୍ୟ ସମ୍ପାଦନରେ ବାଧା ଦେଇଥିବା ଅଭିଯୋଗ ହୋଇଛି। ଏହି ସମୟରେ ପ୍ରଦର୍ଶନକାରୀମାନେ ତ୍ରିରଙ୍ଗା ଉତ୍ତୋଳନ କରିବା ସହ ସ୍ଲୋଗାନ ଦେଇଥିଲେ। ଏହି ଘଟଣା ପରେ ସମସ୍ତ ୧୪ ଜଣଙ୍କୁ ପୁଲିସ ହେପାଜତକୁ ନେଇଥିଲା। ପୁଲିସ ଦୁଇଟି ପୃଥକ୍ ଏଫ୍ଆଇଆର୍ ରୁଜୁ କରିଥିଲା।

ଏହି ମାମଲାରେ ପ୍ରଥମ ଏଫ୍ଆଇଆର୍ ନୂଆଦିଲ୍ଲୀର କନଟ୍ ପ୍ଲେସ୍ ଥାନାରେ ରୁଜୁ ହୋଇଥିଲା। ଏଥିରେ ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ଧାରା ୨୨୩ ଅନୁଯାୟୀ ସରକାରୀ କର୍ମଚାରୀଙ୍କ ବୈଧ ଆଦେଶ ଅବମାନନା, ଧାରା ୩୩୨ ଅନୁଯାୟୀ ଅପରାଧ କରିବା ଉଦ୍ଦେଶ୍ୟରେ ଗୃହ ଅନଧିକାର ପ୍ରବେଶ ଏବଂ ଧାରା ୬୧(୨) ଅନୁଯାୟୀ ଅପରାଧିକ ଷଡ଼ଯନ୍ତ୍ର ସମ୍ବନ୍ଧୀୟ ଅଭିଯୋଗ ରହିଛି।

ଅନ୍ୟପକ୍ଷରେ, ଦ୍ୱିତୀୟ ଏଫ୍ଆଇଆର୍ ସଂସଦ ମାର୍ଗ ଥାନାରେ ରୁଜୁ ହୋଇଥିଲା। ଏହି ମାମଲା ପୁଲିସ କର୍ମଚାରୀଙ୍କ କାର୍ଯ୍ୟରେ ବାଧା ସୃଷ୍ଟି କରିବା, ସେମାନଙ୍କ ଉପରେ ଆକ୍ରମଣ କରିବା ଏବଂ ଆଘାତ ପହଞ୍ଚାଇବା ଭଳି ଅଭିଯୋଗ ସହ ଜଡ଼ିତ।

ଦିଲ୍ଲୀ ପୁଲିସ ଉଭୟ ମାମଲାର ତଦନ୍ତ ଦାୟିତ୍ୱ କ୍ରାଇମ୍ ବ୍ରାଞ୍ଚକୁ ହସ୍ତାନ୍ତର କରିଛି। ତଦନ୍ତ ଅଧୀନରେ ଘଟଣା ସମୟରେ ହୋଇଥିବା କାର୍ଯ୍ୟକଳାପ ଏବଂ ସମ୍ପୃକ୍ତ ଅଭିଯୋଗଗୁଡ଼ିକର ଯାଞ୍ଚ କରାଯାଉଛି।

ଏହା ପୂର୍ବରୁ ଅକ୍ଟୋବର ୧୦ ତାରିଖରେ ମଧ୍ୟ ଏକ ବିରୋଧ ପ୍ରଦର୍ଶନ ସମ୍ପର୍କରେ ସୌରଭ ଦାସ ଏବଂ ଆଶୁତୋଷ ରାଙ୍କାଙ୍କୁ ହେପାଜତକୁ ନିଆଯାଇଥିଲା। ଶାନ୍ତି ବଜାୟ ରଖିବା ପାଇଁ ଉଭୟ ଏକ ବର୍ଷ ଅବଧିର ବଣ୍ଡ୍ରେ ସ୍ୱାକ୍ଷର କରିଥିଲେ।

ଅକ୍ଟୋବର ୧୩ ତାରିଖର ଘଟଣା ପରେ ପୁଲିସ ଅଭିଯୋଗ କରିଥିଲା ଯେ ଉଭୟ ନେତା ପୂର୍ବରୁ ଦେଇଥିବା ଆଶ୍ୱାସନାର ଉଲ୍ଲଂଘନ କରିଛନ୍ତି। ଏହା ପରେ ଅକ୍ଟୋବର ୧୪ ତାରିଖରେ ଉଭୟଙ୍କୁ ପାଞ୍ଚ ଦିନ ପାଇଁ ନ୍ୟାୟିକ ହେପାଜତକୁ ପଠାଯାଇଥିଲା। ପରେ ସେମାନଙ୍କ ହେପାଜତ ଅବଧି ଆଉ ଦୁଇ ଦିନ ବୃଦ୍ଧି କରାଯାଇଥିଲା। ଅନ୍ୟପକ୍ଷରେ, ଅଜିଙ୍କ୍ୟ ସିନ୍ଦେଙ୍କୁ ୫,୦୦୦ ଟଙ୍କାର ମୁଚାଲିକା ବଦଳରେ ମୁକ୍ତ କରାଯାଇଥିଲା। ତାଙ୍କ କ୍ଷେତ୍ରରେ ଶାନ୍ତି ବଜାୟ ରଖିବା ସମ୍ବନ୍ଧୀୟ କେତେକ ସର୍ତ୍ତ ଲାଗୁ କରାଯାଇଥିଲା।

ସିଜେପି ପକ୍ଷରୁ ଗିରଫଦାରୀ ଏବଂ ହେପାଜତକୁ ନେବା ପ୍ରକ୍ରିୟାକୁ ବେଆଇନ ବୋଲି କୁହାଯାଇଛି। ଜାମିନଦାରଙ୍କ ସମ୍ପର୍କିତ ପ୍ରକ୍ରିୟା ଉପରେ ମଧ୍ୟ ଦଳ ପ୍ରଶ୍ନ ଉଠାଇଥିଲା ଏବଂ ଅଦାଲତଙ୍କ ଆଦେଶକୁ ଚ୍ୟାଲେଞ୍ଜ କରିବାକୁ କହିଥିଲା। ତେବେ ପୁଲିସର କହିବା ଅନୁଯାୟୀ, ଆଇନଶୃଙ୍ଖଳା ବଜାୟ ରଖିବା ଏବଂ କଥିତ ଉଲ୍ଲଂଘନକୁ ଦୃଷ୍ଟିରେ ରଖି ଏହି କାର୍ଯ୍ୟାନୁଷ୍ଠାନ ନିଆଯାଇଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା