ରିୟାଦ, ଅକ୍ଟୋବର ୨୨ (ହି.ସ.)। ସାଉଦି ଆରବର ପୂର୍ବ ପ୍ରଦେଶରେ ଅବସ୍ଥିତ କିଙ୍ଗ ଫହଦ ଅନ୍ତର୍ଜାତୀୟ ବିମାନବନ୍ଦରରେ ବୁଧବାର ବିଳମ୍ବିତ ରାତିରେ ହୋଇଥିବା ଆକ୍ରମଣରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ୮ ଜଣ ଆହତ ହୋଇଛନ୍ତି। ସାଉଦି ଆରବର ନାଗରିକ ବିମାନ ଚଳାଚଳ କର୍ତ୍ତୃପକ୍ଷ (ଜିଏସିଏ) ଏହି ଘଟଣାର ପୁଷ୍ଟି କରିଛନ୍ତି।

ତୁର୍କିଏର ସରକାରୀ ସମ୍ବାଦ ସଂସ୍ଥା ଅନାଦୋଲୁ ପକ୍ଷରୁ କର୍ତ୍ତୃପକ୍ଷଙ୍କ ଉଦ୍ଧୃତି ଦେଇ କୁହାଯାଇଛି ଯେ, ସମସ୍ତ ଆହତଙ୍କୁ ତୁରନ୍ତ ଡାକ୍ତରଖାନାରେ ପହଞ୍ଚାଯାଇଛି। ଆହତଙ୍କ ମଧ୍ୟରୁ କେତେକଙ୍କୁ ସାମାନ୍ୟ ଆଘାତ ଲାଗିଥିବାବେଳେ ଅନ୍ୟ କେତେକ ଗୁରୁତର ଆହତ ହୋଇଛନ୍ତି। ଏହି ଆକ୍ରମଣରେ ସମ୍ପତ୍ତିର ମଧ୍ୟ କ୍ଷୟକ୍ଷତି ହୋଇଛି, ଯାହାର ଆକଳନ କରାଯାଉଛି। ଘଟଣା ସମ୍ପର୍କିତ ଅଧିକ ସୂଚନା ପରବର୍ତ୍ତୀ ସମୟରେ ଦିଆଯିବ ବୋଲି ଅଧିକାରୀମାନେ କହିଛନ୍ତି। ତେବେ ଆକ୍ରମଣର ପ୍ରକୃତି ସମ୍ପର୍କରେ ବର୍ତ୍ତମାନ ସୁଦ୍ଧା କୌଣସି ସୂଚନା ମିଳିନାହିଁ।

ଏହା ପୂର୍ବରୁ ବୁଧବାର ସାଉଦି ଆରବର ଶକ୍ତି ମନ୍ତ୍ରଣାଳୟ ପକ୍ଷରୁ କୁହାଯାଇଥିଲା ଯେ, ପୂର୍ବ ପ୍ରଦେଶର ଶାୟବା ତୈଳକ୍ଷେତ୍ରରେ ସାଉଦି ଆରାମକୋର ଏକ ପ୍ରତିଷ୍ଠାନକୁ ଟାର୍ଗେଟ କରି ପଠାଯାଇଥିବା ଏକ ଡ୍ରୋନ୍କୁ ବାୟୁ ପ୍ରତିରକ୍ଷା ପ୍ରଣାଳୀ ମାରି ଖସାଇ ଦେଇଥିଲା।

ମନ୍ତ୍ରଣାଳୟ ଅନୁଯାୟୀ, ଡ୍ରୋନ୍ର ଭଗ୍ନାବଶେଷ ପଡ଼ିବା ଫଳରେ ଜଣେ ଠିକାଦାରଙ୍କ ଗାଡ଼ିରେ ନିଆଁ ଲାଗିଯାଇଥିଲା। ଏହି ଘଟଣାରେ ଦୁଇ ଜଣଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ଦୁଇ ଜଣ ଆହତ ହୋଇଥିଲେ। ତେବେ ଏହାର ପ୍ରଭାବ ତୈଳକ୍ଷେତ୍ରର କାର୍ଯ୍ୟକଳାପ ଉପରେ ପଡ଼ିନଥିଲା।

ସାଉଦି ଆରବର ନେତୃତ୍ୱାଧୀନ ମେଣ୍ଟ ମଧ୍ୟ ବୁଧବାର ଦାବି କରିଥିଲା ଯେ, ଦେଶ ଆଡ଼କୁ ପଠାଯାଇଥିବା ପାଞ୍ଚଟି ଡ୍ରୋନ୍କୁ ଅଟକାଇ ନଷ୍ଟ କରାଯାଇଛି। ଏହି ଡ୍ରୋନ୍ଗୁଡ଼ିକ ମଧ୍ୟରେ ପୂର୍ବ ପ୍ରଦେଶ ଏବଂ ମଦିନା ଅଞ୍ଚଳ ଆଡ଼କୁ ପଠାଯାଇଥିବା ଡ୍ରୋନ୍ ମଧ୍ୟ ସାମିଲ ଥିଲା।

ହିନ୍ଦୁସ୍ଥାନ ସମାଚାର / ସ୍ୱାଗତିକା