- ଗବେଷଣାରେ ଆଇଆଇଟି ରୁଡ଼କୀର ଗୁରୁତ୍ୱପୂର୍ଣ୍ଣ ଅବଦାନ

ରୁଡ଼କୀ, ୨୨ ଅକ୍ଟୋବର (ହି.ସ.)- ଜର୍ମାନୀର ଡାର୍ମଷ୍ଟାଡ୍ସ୍ଥିତ ଜିଏସ୍ଆଇ/ଫେର୍ୟା ପ୍ରତିଷ୍ଠାନର ନେତୃତ୍ୱରେ ହୋଇଥିବା ଏକ ଅନ୍ତର୍ଜାତୀୟ ଗବେଷଣାରେ ପ୍ରଥମ ଥର ପାଇଁ ଏକ ଅତିଭାରୀ ମୌଳିକ ତତ୍ୱର ଯୌଗିକର ରାସାୟନିକ ସ୍ଥିରତା ମାପିବାରେ ସଫଳତା ମିଳିଛି। ଏହି ଗବେଷଣାରେ ଆଇଆଇଟି ରୁଡ଼କୀର ମଧ୍ୟ ଗୁରୁତ୍ୱପୂର୍ଣ୍ଣ ଅବଦାନ ରହିଛି। ଏହି ଗବେଷଣା ପ୍ରସିଦ୍ଧ ବୈଜ୍ଞାନିକ ପତ୍ରିକା ନେଚରରେ ପ୍ରକାଶିତ ହୋଇଛି।

ଆଇଆଇଟି ରୁଡ଼କୀ ପକ୍ଷରୁ ଜାରି ବିଜ୍ଞପ୍ତି ଅନୁଯାୟୀ, ଗବେଷକ ଦଳ ୧୦୬ ପରମାଣୁ ସଂଖ୍ୟା ବିଶିଷ୍ଟ ମୌଳିକ ତତ୍ୱ ସିବୋର୍ଗିୟମ୍ର ହେକ୍ସାକାର୍ବୋନିଲ୍ ଯୌଗିକ ଉପରେ ଅଧ୍ୟୟନ କରିଥିଲେ। ଗବେଷଣାରୁ ଜଣାପଡ଼ିଛି ଯେ ସିବୋର୍ଗିୟମ୍ ପରମାଣୁ ଏବଂ କାର୍ବନ ମନୋକ୍ସାଇଡ୍ ମଧ୍ୟରେ ଥିବା ରାସାୟନିକ ବନ୍ଧ ଆବର୍ତ ସାରଣୀରେ ଏହାର ସ୍ଥାନ ଅନୁଯାୟୀ ଯେତିକି ଦୃଢ଼ ହେବା କଥା, ତାହାଠାରୁ ଦୁର୍ବଳ। ଏହାର ମୁଖ୍ୟ କାରଣ ହେଉଛି ସାପେକ୍ଷତା ପ୍ରଭାବ।

୧୦୪ରୁ ୧୧୮ ପରମାଣୁ ସଂଖ୍ୟା ବିଶିଷ୍ଟ ମୌଳିକ ତତ୍ୱଗୁଡ଼ିକୁ ଅତିଭାରୀ ତତ୍ୱ କୁହାଯାଏ। ଏଗୁଡ଼ିକୁ କଣିକା ତ୍ୱରକରେ କୃତ୍ରିମ ଭାବେ ସୃଷ୍ଟି କରାଯାଏ। ଏହାର ଉତ୍ପାଦନ ହାର ଅତ୍ୟନ୍ତ କମ୍; ଦିନକୁ ମାତ୍ର ଅଳ୍ପ କେତୋଟି ପରମାଣୁ ସୃଷ୍ଟି ହୋଇଥାଏ। ଏହା ସହିତ, ଏହି ପରମାଣୁଗୁଡ଼ିକର ଅର୍ଦ୍ଧ-ଆୟୁ ଅଧା ସେକେଣ୍ଡରୁ ମଧ୍ୟ କମ୍। ତେଣୁ ଏଗୁଡ଼ିକର ରାସାୟନିକ ଅଧ୍ୟୟନ କରିବା ଅତ୍ୟନ୍ତ କଷ୍ଟକର।

ଜିଏସ୍ଆଇ/ଫେର୍ୟାର ଡକ୍ଟର ଆଲେକ୍ଜାଣ୍ଡର ୟାକୁଶେଭ୍ କହିଛନ୍ତି ଯେ ପ୍ରଥମ ଥର ପାଇଁ ଏକ ଅତିଭାରୀ ମୌଳିକ ତତ୍ୱର ଯୌଗିକରେ ରାସାୟନିକ ବନ୍ଧର ଦୃଢ଼ତା ମାପିବାରେ ସେମାନେ ସଫଳ ହୋଇଛନ୍ତି। କ୍ରୋମିୟମ୍ରୁ ମଲିବ୍ଡେନମ୍ ଏବଂ ତା’ପରେ ଟଙ୍ଗଷ୍ଟନ୍ ପର୍ଯ୍ୟନ୍ତ ରାସାୟନିକ ବନ୍ଧର ଦୃଢ଼ତା ବୃଦ୍ଧି ପାଏ। କିନ୍ତୁ ସିବୋର୍ଗିୟମ୍ କ୍ଷେତ୍ରରେ ଏହି ପ୍ରବୃତିରେ ପରିବର୍ତନ ଘଟିଥାଏ। ଅଧିକ ପରମାଣୁ ସଂଖ୍ୟା ହେତୁ ଇଲେକ୍ଟ୍ରନ୍ର ଗଠନରେ ପରିବର୍ତନ ଆସେ, ଯାହା ଫଳରେ ରାସାୟନିକ ବନ୍ଧ ଦୁର୍ବଳ ହୋଇଯାଏ। ସମ୍ପ୍ରତି କରାଯାଇଥିବା କ୍ୱାଂଟମ୍ ରାସାୟନିକ ଗଣନା ମଧ୍ୟ ଏହି ପ୍ରଭାବକୁ ସମର୍ଥନ କରୁଛି।

ଏହି ଗବେଷଣାରେ ଆଇଆଇଟି ରୁଡ଼କୀର ପ୍ରଫେସର ମୌମିତା ମୈତୀ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛନ୍ତି। ପ୍ରଫେସର ମୈତୀଙ୍କ ଅନୁଯାୟୀ, ଅତିଭାରୀ ମୌଳିକ ତତ୍ୱଗୁଡ଼ିକର ଅଧ୍ୟୟନ ଅନେକ ଅସାଧାରଣ ଆହ୍ୱାନରେ ପରିପୂର୍ଣ୍ଣ। ଏଥିପାଇଁ ଅତ୍ୟନ୍ତ ସଠିକ୍ ପ୍ରଯୁକ୍ତି ଏବଂ ଅନ୍ତର୍ଜାତୀୟ ସହଯୋଗ ଆବଶ୍ୟକ। ଏହି ସହଯୋଗ ମାଧ୍ୟମରେ ବିଭିନ୍ନ ପ୍ରତିଷ୍ଠାନର ବିଶେଷଜ୍ଞତାକୁ ଏକାଠି କରାଯାଇପାରିଛି।

ପରୀକ୍ଷଣ ସମୟରେ ସିବୋର୍ଗିୟମ୍-୨୫୯ର ୭୫ଟି ପରମାଣୁ ଚିହ୍ନଟ କରାଯାଇଥିଲା। ସେଥିମଧ୍ୟରୁ ମାତ୍ର ୩ଟି ପରମାଣୁ ହେକ୍ସାକାର୍ବୋନିଲ୍ ଯୌଗିକ ଆକାରରେ ମିଳିଥିଲା। ଅନ୍ୟପକ୍ଷରେ, ଟଙ୍ଗଷ୍ଟନ୍ର ୧୭ ପ୍ରତିଶତ ପରମାଣୁ ଏହି ଯୌଗିକ ଗଠନ କରିଥିଲେ। ଏହି ତଥ୍ୟ ଆଧାରରେ ସିବୋର୍ଗିୟମ୍ର ରାସାୟନିକ ବନ୍ଧର ଦୃଢ଼ତା ପ୍ରତି ମୋଲ୍ରେ ୪ କିଲୋଜୁଲ୍ କମ୍ ବୋଲି ଆକଳନ କରାଯାଇଛି।

ଗବେଷକମାନେ କହିଛନ୍ତି ଯେ ବିଶ୍ୱସ୍ତରୀୟ ସହଯୋଗ ବିନା ଏହି ସଫଳତା ସମ୍ଭବ ହୋଇନଥାନ୍ତା। ବର୍ତମାନ ଗବେଷକ ଦଳ ସିବୋର୍ଗିୟମ୍ଠାରୁ ମଧ୍ୟ ଅଧିକ ଭାରୀ ମୌଳିକ ତତ୍ୱଗୁଡ଼ିକ ଉପରେ ପରୀକ୍ଷଣ କରିବା ପାଇଁ ପ୍ରସ୍ତୁତି ଚଳାଇଛନ୍ତି।

-----------------------

ହିନ୍ଦୁସ୍ଥାନ ସମାଚାର / ଗଗନ