ଜୟପୁର, ୨୩ ଅକ୍ଟୋବର(ହି.ସ.) – କୋରାପୁଟ ଜିଲ୍ଲା ବିବାଦୀୟ ସୀମାନ୍ତ ଅଂଚଳ କୋଟିଆରେ ଆନ୍ଧ୍ର ପ୍ରଦେଶ ପକ୍ଷରୁ ପଂଚାୟତ ନିର୍ବାଚନ କରାଯିବାକୁ ନେଇ ବିଜୁ ଜନତା ଦଳ ଶୁକ୍ରବାର ବିରୋଧ ପ୍ରଦର୍ଶନ କରିଛି।
କୋରାପୁଟରୁ ଯାଇଥିବା ବିଜେଡିର ଏକ ୧୬ ଜଣିଆ ପ୍ରତିନିଧି ଦଳ କୋଟିଆରେ ପହଂଚି ସ୍ଥିତି ଅନୁଧ୍ୟାନ କରିବା ସହ ସ୍ଥାନୀୟ ବାସିନ୍ଦାଙ୍କ ସହ ଆଲୋଚନା କରିଥିଲେ ଏବଂ ଆନ୍ଧ୍ର ପ୍ରଦେଶ ଦ୍ୱାରା ପରିଚାଳିତ ନିର୍ବାଚନ ପ୍ରକ୍ରିୟାକୁ ବିରୋଧ କରିଥିଲେ।
ଦଳୀୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ଗସ୍ତ ପରେ ପ୍ରତିନିଧି ଦଳ ଦଳର ମୁଖ୍ୟ ନବୀନ ପଟ୍ଟନାୟକଙ୍କ ନିକଟରେ ଏକ ରିପୋର୍ଟ ଦାଖଲ କରିବେ।
ବିଜେଡି ଅଭିଯୋଗ କରିଛି ଯେ, ପୂର୍ବରୁ ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ସରକାର ସମୟରେ କୋଟିଆର ବିକାଶ ପାଇଁ ଏବଂ ସେଠାକାର ବାସିନ୍ଦାଙ୍କୁ ବିଭିନ୍ନ ସୁବିଧା ଓ ସୁଯୋଗ ଯୋଗାଇ ଦେବା ପାଇଁ ଅନେକ ପଦକ୍ଷେପ ନିଆଯାଇଥିଲା। ତେବେ ବର୍ତମାନର ବିଜେପି ନେତୃତ୍ୱାଧୀନ ଓଡ଼ିଶା ସରକାର ଏହି ଅଂଚଳର ବିକାଶ ପାଇଁ ଯଥେଷ୍ଟ ଉଦ୍ୟମ କରିବାରେ ବିଫଳ ହୋଇଛନ୍ତି ବୋଲି ଦଳ ଅଭିଯୋଗ କରିଛି।
କୋଟିଆ ଓଡ଼ିଶାର ଏକ ଅବିଚ୍ଛେଦ୍ୟ ଅଙ୍ଗ ବୋଲି ପୁନର୍ବାର ଦୋହରାଇ, ଏହି ଆଂଚଳିକ ଦଳ କହିଛି ଯେ ସେମାନେ ଆନ୍ଧ୍ର ପ୍ରଦେଶର ନିର୍ବାଚନ ପ୍ରକ୍ରିୟାକୁ ବିରୋଧ କରିବେ ଏବଂ ସେଠାରେ ନିର୍ବାଚନ ହେବାକୁ ଦେବେ ନାହିଁ।
ବିଜେଡିର କହିବା ଅନୁଯାୟୀ, କୋଟିଆର ବାସିନ୍ଦାମାନେ ଓଡ଼ିଶା ସପକ୍ଷରେ ରହିଛନ୍ତି ଏବଂ ଆନ୍ଧ୍ର ପ୍ରଦେଶ ଦ୍ୱାରା କରାଯାଉଥିବା ପଂଚାୟତ ନିର୍ବାଚନରେ ଅଂଶଗ୍ରହଣ କରିବାକୁ ଚାହୁଁନାହାନ୍ତି।
କୋରାପୁଟ ଜିଲ୍ଲାର ସୀମାନ୍ତ ଗ୍ରାମଗୁଡ଼ିକୁ ନେଇ ଗଠିତ କୋଟିଆକୁ ନେଇ ଓଡ଼ିଶା ଓ ଆନ୍ଧ୍ର ପ୍ରଦେଶ ଉଭୟ ଦାବି କରିଆସୁଛନ୍ତି। ଏହି ଅଂଚଳର ଅଧିକାରକୁ ନେଇ ଉପୁଜିଥିବା ବିବାଦ ମଧ୍ୟରେ ଏହି ଗସ୍ତ ଅନୁଷ୍ଠିତ ହୋଇଥିବା ଜଣାଯାଇଛି।
.......................................
ହିନ୍ଦୁସ୍ଥାନ ସମାଚାର / ପିକେପି
