ରାଜନୈତିକ ବିରୋଧରେ ମର୍ଯ୍ୟାଦା ଭୁଲୁଛି କଂଗ୍ରେସ, ଜନାଦେଶର ଅପମାନ କରି ଜନସମର୍ଥନ ମିଳିପାରିବ ନାହିଁ
ଭୁବନେଶ୍ୱର, ୨୫ ଅକ୍ଟୋବର (ହି.ସ.)। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦିବଂଗତ ପିତାଙ୍କ ପ୍ରତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ଅଭଦ୍ର ମନ୍ତବ୍ୟକୁ ନେଇ ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି। ଏହା କଂଗ୍ରେସର ହତାଶାର ପରିଚୟ ବୋଲି ସେ କହିଛନ୍ତି।
ସାମାଜିକ ଗଣମାଧ୍ୟମରେ ନିଜର ପ୍ରତିକ୍ରିୟା ରଖି ଶ୍ରୀ ପ୍ରଧାନ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ପ୍ରତି କଂଗ୍ରେସର ଘୃଣାଭାବ ସମସ୍ତଙ୍କୁ ଜଣା। ଏହି ମାନସିକତାକୁ ଆଗକୁ ବଢ଼ାଇ ପ୍ରଧାନମନ୍ତ୍ରୀଙ୍କ ଦିବଂଗତ ପିତାଙ୍କୁ ନେଇ ଏଭଳି ଭାଷାର ପ୍ରୟୋଗ କରିବା ଦୁର୍ଭାଗ୍ୟଜନକ। ଗଣତାନ୍ତ୍ରିକ ମୂଲ୍ୟବୋଧ ଓ ସାର୍ବଜନୀନ ଶାଳୀନତା ବଜାୟ ରଖିବାର ଦାୟିତ୍ୱ ଥିବା ପଦବୀରେ ରହି ଏଭଳି ଭାଷା ବ୍ୟବହାର କରିବା ଅତ୍ୟନ୍ତ ନିନ୍ଦନୀୟ ବୋଲି ସେ ଉଲ୍ଲେଖ କରିଛନ୍ତି।
ରାଜନୈତିକ ବିରୋଧ କରିବା ସମୟରେ କଂଗ୍ରେସ ମର୍ଯ୍ୟାଦା ଭୁଲିଯାଇଛି ବୋଲି ଅଭିଯୋଗ କରି ଶ୍ରୀ ପ୍ରଧାନ କହିଛନ୍ତି ଯେ, ନୀତି ଓ ବିଚାର ଆଧାରରେ ମୁକାବିଲା କରିବା ପରିବର୍ତ୍ତେ ଦଳ ବ୍ୟକ୍ତିଗତ ଅପମାନକୁ ଆଶ୍ରୟ କରୁଛି। ପୂର୍ବରୁ ପ୍ରଧାନମନ୍ତ୍ରୀଙ୍କ ଦିବଂଗତ ମାତାଙ୍କ ପ୍ରତି ଆପତ୍ତିଜନକ ମନ୍ତବ୍ୟ ପରେ ଏବେ ତାଙ୍କ ପିତାଙ୍କୁ ନେଇ ଏଭଳି ଟିପ୍ପଣୀ କଂଗ୍ରେସର ରାଜନୈତିକ ଆଚରଣ ଉପରେ ଗମ୍ଭୀର ପ୍ରଶ୍ନ ଉଠାଉଛି।
ପ୍ରଧାନମନ୍ତ୍ରୀଙ୍କୁ ବିରୋଧ କରିବା ପାଇଁ କଂଗ୍ରେସ ପାଖରେ ପ୍ରସଙ୍ଗ ଓ ଯୁକ୍ତି ଶେଷ ହୋଇଯାଇଛି କି ବୋଲି ମଧ୍ୟ ସେ ପ୍ରଶ୍ନ କରିଛନ୍ତି। ଶ୍ରୀ ପ୍ରଧାନ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କ ପ୍ରତି ଜନସାଧାରଣଙ୍କ ସ୍ନେହ କଂଗ୍ରେସର ହତାଶା ବଢ଼ାଉଛି। କିନ୍ତୁ ଜନସାଧାରଣଙ୍କ ବିଶ୍ୱାସ କଂଗ୍ରେସର କୁଣ୍ଠାଠାରୁ ବଡ଼। ଗଣତନ୍ତ୍ରରେ ଜନାଦେଶକୁ ଅପମାନିତ କରି କେବେ ମଧ୍ୟ ଜନସମର୍ଥନ ହାସଲ କରାଯାଇପାରିବ ନାହିଁ ବୋଲି ସେ ନିଜ ପୋଷ୍ଟରେ କହିଛନ୍ତି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
