ଅମ୍ମାନ (ଜୋର୍ଡାନ), ୨୭ ଅକ୍ଟୋବର (ହି.ସ.)। ଶୁକ୍ରବାର ଦିନ ଜୋର୍ଡାନର କରକ୍ ପ୍ରଦେଶର ଏକ ଚର୍ଚ୍ଚରେ ହୋଇଥିବା ଗୁଳିକାଣ୍ଡର ଜବାବରେ ଦେଶର ସଶସ୍ତ୍ର ବାହିନୀ ଦକ୍ଷିଣ-ପୂର୍ବ ସିରିଆରେ ଥିବା ସଶସ୍ତ୍ର ଗୋଷ୍ଠୀଗୁଡ଼ିକର ଠିକଣାକୁ ଟାର୍ଗେଟ୍ କରି ଆକ୍ରମଣ କରିଛି ବୋଲି ସୂଚନା ଦେଇଛି। ଏହି ଗୁଳିକାଣ୍ଡରେ ଅତି କମ୍ରେ ୯ ଜଣଙ୍କ ମୃତ୍ୟୁ ହୋଇଥିବା ବେଳେ ଅନେକ ଲୋକ ଆହତ ହୋଇଛନ୍ତି। ଜୋର୍ଡାନ ସେନା କହିଛି ଯେ, ସିରିଆରେ ଏହି ଆକ୍ରମଣଗୁଡ଼ିକ “ସିରିଆ ସରକାରଙ୍କ ସହ ସମନ୍ୱୟ ରକ୍ଷା କରି” କରାଯାଇଥିଲା।

ଅଲ୍ ଜଜିରାର ରିପୋର୍ଟ ଅନୁସାରେ, ସେନା କହିଛି ଯେ, ଏହି ଆକ୍ରମଣରେ ଆତଙ୍କବାଦୀ ଗୋଷ୍ଠୀଗୁଡ଼ିକର ଅନେକ ସଦସ୍ୟ ନିହତ କିମ୍ବା ଆହତ ହୋଇଛନ୍ତି ଏବଂ ସେମାନଙ୍କର ଅନେକ ଗାଡ଼ି ମଧ୍ୟ ନଷ୍ଟ ହୋଇଛି। ତେବେ ସିରିଆ ଜୋର୍ଡାନ ସହ କୌଣସି ପ୍ରକାର ସମନ୍ୱୟ ହୋଇଥିବା ଦାବିକୁ ଖଣ୍ଡନ କରିଛି। ସିରିଆ ସରକାର ଏକ ବିବୃତିରେ କହିଛନ୍ତି ଯେ, “କୌଣସି ପୂର୍ବ ସମନ୍ୱୟ କିମ୍ବା ସୂଚନା ବିନା ଏହି ସାମରିକ ଅଭିଯାନ ଚଳାଯାଇଥିଲା।” ଏହି ଘଟଣାର ତଦନ୍ତ ଆରମ୍ଭ କରାଯାଇଛି।

ସିରିଆର ସିଭିଲ୍ ଡିଫେନ୍ସ ସର୍ଭିସ୍ ସୂଚନା ଦେଇଛି ଯେ, ସୋମବାର ସନ୍ଧ୍ୟାରେ ଦାରା ଓ ସୁୱେଦା ପ୍ରଦେଶର ଗ୍ରାମାଞ୍ଚଳରେ ଅତି କମ୍ରେ ଚାରିଟି ସ୍ଥାନରେ ଆକ୍ରମଣ ହୋଇଥିଲା। ଉଦ୍ଧାରକାରୀ ଦଳ ସାତ ଜଣଙ୍କ ମୃତଦେହ ଉଦ୍ଧାର କରିଛି। ମୃତକଙ୍କ ମଧ୍ୟରେ ତିନି ଜଣ ପୁରୁଷ, ଜଣେ ମହିଳା ଓ ତିନି ଜଣ ଶିଶୁ ଅଛନ୍ତି।

ସିଭିଲ୍ ଡିଫେନ୍ସ ସର୍ଭିସ୍ ଅନୁସାରେ, ମୃତକଙ୍କ ମଧ୍ୟରୁ ପାଞ୍ଚ ଜଣ ଗୋଟିଏ ପରିବାରର ସଦସ୍ୟ। ଦାରା ପ୍ରଦେଶର ଅଲ୍-ତାଇ ଗ୍ରାମରେ ଏକ ତମ୍ବୁ ଉପରେ ହୋଇଥିବା ଆକ୍ରମଣରେ ସେମାନଙ୍କ ମୃତ୍ୟୁ ହୋଇଛି। ଏହି ପରିବାରର ଅନ୍ୟ ତିନି ଜଣ ସଦସ୍ୟ ମଧ୍ୟ ଆହତ ହୋଇଛନ୍ତି, ଯେଉଁମାନଙ୍କ ମଧ୍ୟରେ ଜଣେ ଶିଶୁ ଅଛନ୍ତି।

ଦ୍ୱିତୀୟ ଆକ୍ରମଣ ଦାରା ପ୍ରଦେଶର ଅଲ୍-ଶୈୟା ଅଞ୍ଚଳରେ ହୋଇଥିଲା। ଏଥିରେ ୮୦ ବର୍ଷୀୟ ଜଣେ ବୃଦ୍ଧଙ୍କ ମୃତ୍ୟୁ ଘଟିଛି। ତୃତୀୟ ଆକ୍ରମଣ ଦାରାର ଐନ୍ ଅଲ୍-ବସଲ୍ ଅଞ୍ଚଳର ମୁଜୈରିବ୍ଠାରେ ଥିବା ଏକ ଆବାସିକ କୋଠା ଉପରେ ହୋଇଥିଲା। ତେବେ ଏହି ଆକ୍ରମଣରେ କୌଣସି ଜୀବନହାନି ହୋଇନାହିଁ।

ହିନ୍ଦୁସ୍ଥାନ ସମାଚାର / ସ୍ୱାଗତିକା