କୋଲକାତା, ୨୭ ଅକ୍ଟୋବର (ହି.ସ.)। ପଶ୍ଚିମବଙ୍ଗର ଉତ୍ତର ୨୪ ପରଗଣା ଜିଲ୍ଲାର ଗାଇଘାଟାରେ ମଙ୍ଗଳବାର ଭୋର୍ ସମୟରେ ଜଣେ ୧୭ ବର୍ଷୀୟା ନାବାଳିକାଙ୍କୁ ଦୁଷ୍କର୍ମ ଓ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ପୁଲିସ ଏନ୍କାଉଣ୍ଟରରେ ନିହତ ହୋଇଛି। ଏହି ଘଟଣା ଚଳିତ ବର୍ଷ ଜୁଲାଇରେ ଦକ୍ଷିଣ ୨୪ ପରଗଣାର ବାରୁଇପୁରରେ ଘଟିଥିବା ପୁଲିସ ଏନ୍କାଉଣ୍ଟର ସହ ବେଶ୍ ସାମଞ୍ଜସ୍ୟ ରଖୁଛି। ପୁଲିସ ଏନ୍କାଉଣ୍ଟରର ଘଟଣାକ୍ରମ ମଧ୍ୟ ପୂର୍ବ ମାମଲା ସହ ସମାନ, ଯେଉଁଥିରେ ବିଳମ୍ବିତ ରାତିରେ ‘କ୍ରାଇମ୍ ସିନ୍ ରିକ୍ରିଏସନ୍’ (ଅପରାଧସ୍ଥଳର ପୁନଃନିର୍ମାଣ) କରାଯାଇଥିଲା।

ପୁଲିସ ସୂତ୍ର ଅନୁସାରେ, ଅଭିଯୁକ୍ତ ପ୍ରହ୍ଲାଦ ଦାସଙ୍କୁ ମଙ୍ଗଳବାର ଭୋର୍ ସମୟରେ ଘଟଣାସ୍ଥଳକୁ ଅପରାଧର ପୁନଃନିର୍ମାଣ ପାଇଁ ନିଆଯାଇଥିଲା। ଏହି ସ୍ଥାନ ବାଂଲାଦେଶ ସୀମାଠାରୁ ପ୍ରାୟ ୪ କିଲୋମିଟର ଦୂରରେ ଅବସ୍ଥିତ। ପୁଲିସର ଦାବି ଅନୁଯାୟୀ, ଏହି ସମୟରେ ପ୍ରହ୍ଲାଦ ହଠାତ୍ ଜଣେ ଅଧିକାରୀଙ୍କ ସର୍ଭିସ୍ ରିଭଲଭର ଛଡ଼ାଇ ନେଇ ଗୁଳି ଚଳାଇବା ଆରମ୍ଭ କରିଥିଲା। ସେ ତିନି ରାଉଣ୍ଡ ଗୁଳି ଚଳାଇଥିବା ବେଳେ ଏଥିରେ ଜଣେ ପୁଲିସ କର୍ମଚାରୀ ଆହତ ହୋଇଥିଲେ। ଏହାପରେ ଆତ୍ମରକ୍ଷା ପାଇଁ ପୁଲିସ ପକ୍ଷରୁ ପାଲଟା ଗୁଳିଚାଳନା କରାଯାଇଥିଲା। ପୁଲିସ ଚାରି ରାଉଣ୍ଡ ଗୁଳି ଚଳାଇଥିଲା। ଗୁଳିମାଡ଼ରେ ଗୁରୁତର ଆହତ ପ୍ରହ୍ଲାଦଙ୍କୁ ତୁରନ୍ତ ଚାନ୍ଦପଡ଼ା ଗ୍ରାମୀଣ ଡାକ୍ତରଖାନାକୁ ନିଆଯାଇଥିଲା। ସେଠାରେ ଡ୍ୟୁଟିରେ ଥିବା ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ପ୍ରହ୍ଲାଦ ପୀଡ଼ିତା ନାବାଳିକାଙ୍କ ପରିବାରର ଜଣେ ସମ୍ପର୍କୀୟ ବୋଲି କୁହାଯାଉଛି। ରବିବାର ଦିନ ଜଣେ ପଡ଼ୋଶୀଙ୍କ ଘର ପଛପଟୁ ନାବାଳିକାଙ୍କ ଉଲଗ୍ନ ଓ କ୍ଷତବିକ୍ଷତ ମୃତଦେହ ମିଳିବା ପରେ ପୁଲିସ ତାଙ୍କୁ ଗିରଫ କରିଥିଲା। ଏହି ନାବାଳିକା ଶନିବାର ରାତିରେ ନିଜ ପରିବାର ଓ ସାଙ୍ଗମାନଙ୍କ ସହ ଏକ ଜଳସା କାର୍ଯ୍ୟକ୍ରମ ଦେଖିବାକୁ ଯାଇଥିଲେ। ପରିବାର ସଦସ୍ୟଙ୍କ କହିବା ଅନୁସାରେ, ରାତି ପ୍ରାୟ ୧୧ଟା ୩୦ ମିନିଟ୍ରେ ତାଙ୍କ ନିକଟକୁ ଏକ ଫୋନ୍ କଲ୍ ଆସିଥିଲା। ଏହାପରେ ସେ କାର୍ଯ୍ୟକ୍ରମସ୍ଥଳରୁ ବାହାରି ଯାଇଥିଲେ ଏବଂ ନିଖୋଜ ହୋଇଯାଇଥିଲେ। ସାରା ରାତି ଧରି ଚାଲିଥିବା ଜୋରଦାର ଖୋଜାଖୋଜି ପରେ ରବିବାର ସକାଳେ ତାଙ୍କ ମୃତଦେହ ଉଦ୍ଧାର କରାଯାଇଥିଲା।

ଗାଇଘାଟାର ଏହି ଏନ୍କାଉଣ୍ଟର ସାଢ଼େ ତିନି ମାସ ପୂର୍ବେ ବାରୁଇପୁରରେ ଘଟିଥିବା ସମାନ ଘଟଣାକୁ ପୁଣି ମନେ ପକାଇ ଦେଇଛି। ସେଠାରେ ମଧ୍ୟ ଜଣେ ନାବାଳିକାଙ୍କ ସହ ଗଣଦୁଷ୍କର୍ମ ଓ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ପ୍ରଭାସ ମଣ୍ଡଳ ପୁଲିସ ଗୁଳିରେ ନିହତ ହୋଇଥିଲା। ଜୁଲାଇ ମାସର ସେହି ଘଟଣାରେ ମଧ୍ୟ ପୁଲିସ ଠିକ୍ ଏହିଭଳି ଦାବି କରିଥିଲା ଯେ, ବିଳମ୍ବିତ ରାତିରେ ଅପରାଧସ୍ଥଳର ପୁନଃନିର୍ମାଣ ସମୟରେ ଅଭିଯୁକ୍ତ ପୁଲିସର ଅସ୍ତ୍ର ଛଡ଼ାଇ ନେଇ ଖସିଯିବାକୁ ଚେଷ୍ଟା କରିଥିଲା। ଏହାପରେ ଆତ୍ମରକ୍ଷା ପାଇଁ ପୁଲିସ ଚଳାଇଥିବା ପାଲଟା ଗୁଳିରେ ତା’ର ମୃତ୍ୟୁ ହୋଇଥିଲା।

ବାରୁଇପୁରର ସେହି ଏନ୍କାଉଣ୍ଟରକୁ ନେଇ ବ୍ୟାପକ ବିବାଦ ସୃଷ୍ଟି ହୋଇଥିଲା। କଲିକତା ହାଇକୋର୍ଟ ଏହି ମାମଲାରେ କଡ଼ା ଆଭିମୁଖ୍ୟ ଗ୍ରହଣ କରି ପୁଲିସକୁ ବିସ୍ତୃତ ରିପୋର୍ଟ ଦାଖଲ କରିବାକୁ କହିଥିଲେ। ଏଥିସହ ଘଟଣା ସହ ଜଡ଼ିତ ସିସିଟିଭି ଫୁଟେଜ୍କୁ ସୁରକ୍ଷିତ ରଖିବା ପାଇଁ ମଧ୍ୟ ଅଦାଲତ ନିର୍ଦ୍ଦେଶ ଦେଇଥିଲେ। ସେହି ମାମଲା ଏବେ ବି ଅଦାଲତରେ ବିଚାରାଧୀନ ରହିଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା