ତେଲ ଆଭିଭ୍ (ଇସ୍ରାଏଲ), ଅକ୍ଟୋବର ୨୮ (ହି.ସ.)। ଇସ୍ରାଏଲର ସଂସଦ (ନେସେଟ୍) ପାଇଁ ମଙ୍ଗଳବାର ଅନୁଷ୍ଠିତ ସାଧାରଣ ନିର୍ବାଚନରେ କୌଣସି ଦଳ ବହୁମତ ହାସଲ କରିବା ସ୍ଥିତିରେ ଦେଖାଯାଉନାହିଁ।
ଚ୍ୟାନେଲ୍ ୧୧, ଚ୍ୟାନେଲ୍ ୧୨ ଓ ଚ୍ୟାନେଲ୍ ୧୩ର ଏକ୍ଜିଟ୍ ପୋଲ୍ ଅନୁଯାୟୀ, ନିର୍ବାଚନରେ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁଙ୍କ ମେଣ୍ଟ ଏବଂ ତାଙ୍କୁ କ୍ଷମତାରୁ ହଟାଇବାକୁ ଉଦ୍ୟମ କରୁଥିବା ବିରୋଧୀ ମେଣ୍ଟ—ଉଭୟ ବହୁମତ ପାଇଁ ଆବଶ୍ୟକ ୬୧ଟି ଆସନର ସଂଖ୍ୟା ଛୁଇଁ ପାରିନାହାନ୍ତି। ଏକ୍ଜିଟ୍ ପୋଲ୍ ପ୍ରକାଶ ପାଇବା ପରେ ବିରୋଧୀ ମେଣ୍ଟ ନିଜର ବିଜୟ ଦାବି କରିଛି। ତେବେ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ଏପର୍ଯ୍ୟନ୍ତ ଏହି ପ୍ରସଙ୍ଗରେ କୌଣସି ମନ୍ତବ୍ୟ ଦେଇନାହାନ୍ତି।
‘ଦ ଜେରୁଜେଲମ୍ ପୋଷ୍ଟ’ ଏବଂ ‘ଦ ଟାଇମ୍ସ ଅଫ୍ ଇସ୍ରାଏଲ୍’ର ରିପୋର୍ଟ ଅନୁଯାୟୀ, ୟାଶାର, ବି-ୟାଚାଦ୍, ଇସ୍ରାଏଲ୍ ବେତେନୁ ଏବଂ ଡେମୋକ୍ରାଟ୍ସକୁ ନେଇ ଗଠିତ ବିରୋଧୀ ମେଣ୍ଟ ୫୦ରୁ ୫୩ଟି ଆସନ ଜିତିବାର ଅନୁମାନ କରାଯାଉଛି। ଅନ୍ୟପକ୍ଷରେ, ନେତନ୍ୟାହୁଙ୍କ ମେଣ୍ଟ ପ୍ରାୟ ୫୦ଟି ଆସନ ହାସଲ କରିପାରେ। ଏଭଳି ସ୍ଥିତିରେ କୌଣସି ପକ୍ଷ ପାଖରେ ମେଣ୍ଟ ସରକାର ଗଠନ କରିବା ପାଇଁ ସ୍ପଷ୍ଟ ରାସ୍ତା ଦେଖାଯାଉନାହିଁ। ତଥାପି ଏକ୍ଜିଟ୍ ପୋଲ୍ ପ୍ରକାଶ ପାଇବାର ତୁରନ୍ତ ପରେ ବିରୋଧୀ ମେଣ୍ଟ ନିଜର ବିଜୟ ଘୋଷଣା କରିଛି।
ଏକ୍ଜିଟ୍ ପୋଲ୍ରେ ଲିକୁଡ୍ ଦଳ ସବୁଠାରୁ ବଡ଼ ଦଳ ଭାବେ ଉଭା ହୋଇଛି। ଏଥିସହ ଆରବ ଦଳଗୁଡ଼ିକୁ ରେକର୍ଡ ସଂଖ୍ୟକ ଆସନ ମିଳିବାର ସମ୍ଭାବନା ରହିଛି।
ଆଇଜେନକୋଟ୍ ‘ଜନସାଧାରଣଙ୍କ ଇଚ୍ଛାକୁ କାର୍ଯ୍ୟକାରୀ କରିବା’ ଏବଂ ‘ସମସ୍ତଙ୍କ ପାଇଁ ବାଧ୍ୟତାମୂଳକ ସାମରିକ ସେବା ପ୍ରତି ପ୍ରତିବଦ୍ଧ ଏକ ଜାୟୋନିଷ୍ଟ ସରକାର’ ଗଠନ କରିବା ପାଇଁ ତୁରନ୍ତ ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଛନ୍ତି। ନେତନ୍ୟାହୁ ଏପର୍ଯ୍ୟନ୍ତ ଏହି ପ୍ରସଙ୍ଗରେ ନିରବ ରହିଛନ୍ତି।
ଚୂଡ଼ାନ୍ତ ନିର୍ବାଚନ ଫଳାଫଳ ଆସିବା ପରେ ଏବଂ ନେସେଟ୍ରେ ପ୍ରବେଶ କରିଥିବା ସମସ୍ତ ଦଳର ପ୍ରତିନିଧିଙ୍କ ସହ ଆଲୋଚନା କରିବା ପରେ ରାଷ୍ଟ୍ରପତି ହର୍ଜୋଗ୍ ସରକାର ଗଠନ ପାଇଁ ସବୁଠାରୁ ଉପଯୁକ୍ତ ବ୍ୟକ୍ତିଙ୍କୁ ଚୟନ କରିବେ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
