ଜେରୁଜେଲମ୍ (ଇସ୍ରାଏଲ) , ଅକ୍ଟୋବର ୨୮ (ହି.ସ.)। ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ବୁଧବାର ଭୋର୍ରେ ଏକ ଶକ୍ତିଶାଳୀ ଦକ୍ଷିଣପନ୍ଥୀ ସରକାର ଗଠନ ପାଇଁ ଆହ୍ୱାନ କରିଛନ୍ତି। ଆରବ ଦଳଗୁଡ଼ିକ ଉପରେ ନିର୍ଭର କରି ସରକାର ଗଠନ କରିବା ବିରୋଧରେ ସେ ଚେତାବନୀ ଦେଇଛନ୍ତି। ଏଠାରେ ଲିକୁଡ୍ ପାର୍ଟିର ନିର୍ବାଚନ ମୁଖ୍ୟାଳୟରେ ଦଳୀୟ କର୍ମୀ ଓ ସାମ୍ବାଦିକମାନଙ୍କ ସହ କଥା ହେବା ସମୟରେ ସେ କହିଛନ୍ତି ଯେ ଏକ୍ଜିଟ୍ ପୋଲ୍ରୁ ନିର୍ବାଚନ ଫଳାଫଳ ସ୍ପଷ୍ଟ ହୋଇନାହିଁ। ତେଣୁ ଚୂଡ଼ାନ୍ତ ଭୋଟ୍ ଗଣତିକୁ ଅପେକ୍ଷା କରିବା ଉଚିତ।
‘ଦ ଜେରୁଜେଲମ୍ ପୋଷ୍ଟ’ର ରିପୋର୍ଟ ଅନୁଯାୟୀ, ନେତନ୍ୟାହୁ କହିଛନ୍ତି, “ଲିକୁଡ୍ ଇସ୍ରାଏଲର ସବୁଠାରୁ ବଡ଼ ଦଳ।” ଯିହୁଦୀ ଓ ଜାୟୋନିଷ୍ଟ ଜନସାଧାରଣଙ୍କ ମଧ୍ୟରେ ଏବଂ ଯେଉଁମାନେ ଯିହୁଦୀ ରାଷ୍ଟ୍ରକୁ ସମର୍ଥନ କରନ୍ତି, ସେମାନଙ୍କ ମଧ୍ୟରେ ଦକ୍ଷିଣପନ୍ଥୀ ମେଣ୍ଟକୁ ନିର୍ଣ୍ଣାୟକ ବହୁମତର ସମର୍ଥନ ମିଳିଛି ବୋଲି ସେ ଦାବି କରିଛନ୍ତି। ନେତନ୍ୟାହୁ କହିଛନ୍ତି, “ଆମକୁ ଏକ ଶକ୍ତିଶାଳୀ, ଦକ୍ଷିଣପନ୍ଥୀ ଓ ରାଷ୍ଟ୍ରବାଦୀ ସରକାର ଗଠନ କରିବା ଉଚିତ।”
ନିଜ ମତରେ ‘ଜାୟୋନିଷ୍ଟ ବିରୋଧୀ’ ଆରବ ଦଳଗୁଡ଼ିକ ଉପରେ ନିର୍ଭରଶୀଳ ସରକାର ଗଠନ କରିବା ବିରୋଧରେ ସେ ଚେତାବନୀ ଦେଇଛନ୍ତି। ଏହି ଦଳଗୁଡ଼ିକ ଇସ୍ରାଏଲର ଅସ୍ତିତ୍ୱକୁ ବିରୋଧ କରିବା ସହ ଏହାର ସୈନିକମାନଙ୍କ ଉପରେ ଆକ୍ରମଣ କରୁଥିବା ସେ ଅଭିଯୋଗ କରିଛନ୍ତି। ସେନାରେ ସେବା ପ୍ରଦାନ କରୁଥିବା ଲୋକଙ୍କୁ ନେଇ ମେଣ୍ଟ ଗଠନ କରିବା ସପକ୍ଷରେ ମତ ଦେଉଥିବା ରାଜନେତାମାନଙ୍କୁ ସେ ଆହ୍ୱାନ ଦେଇ ପ୍ରଶ୍ନ କରିଛନ୍ତି ଯେ ସେମାନେ ଏହି ଆରବ ଦଳଗୁଡ଼ିକ ସହ କିପରି ସହଯୋଗ କରିବାକୁ ଚିନ୍ତା କରିପାରୁଛନ୍ତି।
ନେତନ୍ୟାହୁ ନିଜ ସରକାରର ସାମରିକ ସଫଳତା ଏବଂ ଅଧୂରା କାର୍ଯ୍ୟଗୁଡ଼ିକ ବିଷୟରେ ମଧ୍ୟ ଉଲ୍ଲେଖ କରିଛନ୍ତି। ଇରାନର ବିପଦକୁ ଦୂର କରିବା ପାଇଁ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ମିଶି କାମ କରିବାର ଏକ ସୁଯୋଗ ବିଷୟରେ ସେ କହିଛନ୍ତି।
ଏହି ସମୟରେ ଲିକୁଡ୍ ପାର୍ଟିର ନେସେଟ୍ ସାଂସଦ ଆମିତ ହାଲେଭି ନେତନ୍ୟାହୁଙ୍କ ମେଣ୍ଟକୁ ପ୍ରାରମ୍ଭିକ ଆକଳନରେ ମିଳିଥିବା ୫୦ଟି ଆସନକୁ ନେଇ ପ୍ରଶ୍ନ ଉଠାଇଛନ୍ତି। ଏହି ଆକଳନ ତାଙ୍କ ମେଣ୍ଟର ସମର୍ଥନକୁ କମ୍ କରି ଦର୍ଶାଉଛି ଏବଂ ଏହା ଚୂଡ଼ାନ୍ତ ଫଳାଫଳ ହେବ ନାହିଁ ବୋଲି ସେ ଯୁକ୍ତି ଦେଇଛନ୍ତି। ଅକ୍ଟୋବର ୭ର ଆକ୍ରମଣ ଏବଂ ତିନି ବର୍ଷର ଯୁଦ୍ଧ ପ୍ରତି ଇସ୍ରାଏଲ ସମାଜର ପ୍ରତିକ୍ରିୟା ଭାବେ ସେ ଏହି ନିର୍ବାଚନକୁ ବର୍ଣ୍ଣନା କରିଛନ୍ତି।
ହାଲେଭି ଆରବ ଦଳଗୁଡ଼ିକର ସମ୍ଭାବ୍ୟ ରାଜନୈତିକ ଶକ୍ତି ଆଡ଼କୁ ମଧ୍ୟ ଇଙ୍ଗିତ କରିଛନ୍ତି। ସେ କହିଛନ୍ତି ଯେ ଏହି ଦଳଗୁଡ଼ିକର ରାଜନୈତିକ ପ୍ରଭାବକୁ ନେଇ ତାଙ୍କର ଆପତ୍ତି ସେମାନଙ୍କ ଜାତିଗତ ପରିଚୟକୁ ନେଇ ନୁହେଁ, ବରଂ ସେମାନଙ୍କର ‘କଠୋରପନ୍ଥୀ ବିଚାରଧାରା’କୁ ନେଇ।
ଏହି ସମୟରେ ଲିକୁଡ୍ ଦଳର ପୁରୁଣା ସଦସ୍ୟ ମୀର କୋହେନଙ୍କୁ ପଚରାଯାଇଥିଲା ଯେ ନେତନ୍ୟାହୁ ଏହି ଅନିଶ୍ଚିତତାର ସମାଧାନ କିପରି କରିବେ ଏବଂ ସରକାର କିପରି ଗଠନ କରିବେ। ଏହାର ଉତ୍ତରରେ ସେ କହିଥିଲେ, “ମୋର ନେତନ୍ୟାହୁଙ୍କ ଉପରେ ଭରସା ଅଛି।”
--------
ହିନ୍ଦୁସ୍ଥାନ ସମାଚାର / ସ୍ୱାଗତିକା
