ମିଳିତ ଜାତିସଂଘ, ଅକ୍ଟୋବର ୨୮ (ହି.ସ)। କ୍ୟୁବା ଉପରେ ଆମେରିକା ଲଗାଇଥିବା ଆର୍ଥିକ, ବାଣିଜ୍ୟିକ ଓ ଆର୍ଥିକ କାରବାର ସମ୍ବନ୍ଧୀୟ କଟକଣା ହଟାଇବାକୁ ଦାବି କରୁଥିବା ମିଳିତ ଜାତିସଂଘ ମହାସଭାର ପ୍ରସ୍ତାବକୁ ଭାରତ ସମର୍ଥନ କରି ଭୋଟ୍ ଦେଇଛି। ଭାରତ କହିଛି ଯେ, ଅନ୍ୟ ଦେଶର ସାର୍ବଭୌମତ୍ୱ ଉପରେ ନକାରାତ୍ମକ ପ୍ରଭାବ ପକାଉଥିବା ଏବଂ ସେହି ଦେଶର ଲୋକଙ୍କ ପ୍ରଗତି ଓ ସମୃଦ୍ଧିରେ ବାଧା ସୃଷ୍ଟି କରୁଥିବା ଆଇନ ଓ ନିୟମଗୁଡ଼ିକୁ ବିରୋଧ କରାଯିବା ଉଚିତ।

ମିଳିତ ଜାତିସଂଘରେ ଭାରତର ସ୍ଥାୟୀ ମିଶନର କାଉନସେଲର ସୌମ୍ୟା ନାୟାର ମହାସଭାରେ କହିଛନ୍ତି ଯେ, ମିଳିତ ଜାତିସଂଘର ଚାର୍ଟର୍ ଏବଂ ଅନ୍ତର୍ଜାତୀୟ ଆଇନ ଅନୁଯାୟୀ ଏଭଳି ଆଇନ ଓ ପଦକ୍ଷେପଗୁଡ଼ିକୁ ପ୍ରତ୍ୟାହାର କରିବା ସହ ଅବୈଧ ଘୋଷଣା କରିବାକୁ ଭାରତ ପୁଣିଥରେ ଆହ୍ୱାନ ଜଣାଉଛି। ସେ କହିଛନ୍ତି ଯେ, ବହୁପକ୍ଷୀୟ ବ୍ୟବସ୍ଥା ପ୍ରତି ଭାରତର ବିଶ୍ୱାସ ଏହି ସିଦ୍ଧାନ୍ତ ଉପରେ ଆଧାରିତ ଯେ, ଅନ୍ତର୍ଜାତୀୟ ସମସ୍ୟାଗୁଡ଼ିକର ସମାଧାନ ଆଲୋଚନା ଓ କୂଟନୀତି ମାଧ୍ୟମରେ କରାଯିବା ଉଚିତ।

ଭାରତ ଆଶା ପ୍ରକାଶ କରିଛି ଯେ, କ୍ୟୁବା ଉପରେ ଲାଗୁ ହୋଇଥିବା କଟକଣା ଖୁବ୍ଶୀଘ୍ର ହଟାଯିବ। ଏହାଦ୍ୱାରା ସେଠାକାର ଲୋକମାନେ ଅନ୍ତର୍ଜାତୀୟ ସହଯୋଗରେ ଅଧିକ ଭାଗୀଦାର ହେବା ସହ ନିଜ ଦେଶର ବିକାଶ ସମ୍ପର୍କିତ ଆକାଂକ୍ଷା ପୂରଣ କରିବାର ସୁଯୋଗ ପାଇପାରିବେ।

ନାୟାର କଟକଣା ଯୋଗୁଁ କ୍ୟୁବାର ସ୍ୱାସ୍ଥ୍ୟ ବ୍ୟବସ୍ଥା ଉପରେ ପଡ଼ୁଥିବା ପ୍ରଭାବ ସମ୍ପର୍କରେ ମଧ୍ୟ ଉଲ୍ଲେଖ କରିଥିଲେ। ତାଙ୍କ ଅନୁଯାୟୀ, ଦେଶରେ ଆବଶ୍ୟକ ଔଷଧର ୬୦ ପ୍ରତିଶତରୁ ଅଧିକ ଅଭାବ ରହିଛି। ଏହା ସହିତ ଗତ ପାଞ୍ଚ ବର୍ଷ ମଧ୍ୟରେ ଖାଦ୍ୟ ଉତ୍ପାଦନରେ ୫୦ ପ୍ରତିଶତରୁ ଅଧିକ ହ୍ରାସ ଘଟିଛି।

ନିକଟରେ ଇନ୍ଧନ ରପ୍ତାନି ଉପରେ ଲଗାଯାଇଥିବା କଟକଣାକୁ ଆହୁରି କଡ଼ାକଡ଼ି କରାଯିବା ଫଳରେ ସ୍ୱାସ୍ଥ୍ୟସେବା, ଶିକ୍ଷା, ଜଳ ଯୋଗାଣ, ଖାଦ୍ୟ ବଣ୍ଟନ ଏବଂ ପରିବହନ ଭଳି ଅତ୍ୟାବଶ୍ୟକ ସେବା ମଧ୍ୟ ପ୍ରଭାବିତ ହୋଇଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା