ନୂଆଦିଲ୍ଲୀ, ୨୯ ଅକ୍ଟୋବର (ହି.ସ.) – ଭାରତୀୟ ଜନତା ପାର୍ଟି (ବିଜେପି) ମୁଖ୍ୟାଳୟରେ ଗୁରୁବାର ଦଳର ମହାସଚିବମାନଙ୍କ ବୈଠକ ସହିତ ‘ଗଣତନ୍ତ୍ର ବଞ୍ଚାଅ, ଅରାଜକତା ହଟାଅ’ ଅଭିଯାନକୁ ନେଇ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଛି। ବିଜେପିର ଜାତୀୟ ଅଧ୍ୟକ୍ଷ ନିତିନ ନବୀନଙ୍କ ଅଧ୍ୟକ୍ଷତାରେ ହୋଇଥିବା ଏହି ବୈଠକରେ କେନ୍ଦ୍ରମନ୍ତ୍ରୀ ଶିବରାଜ ସିଂହ ଚୌହାନ, ପୀୟୂଷ ଗୋୟଲ, କିରେନ ରିଜିଜୁ ଓ ମନସୁଖ ମାଣ୍ଡବ୍ୟଙ୍କ ସମେତ ଦଳର ଅନେକ ବରିଷ୍ଠ ନେତା ଯୋଗ ଦେଇଥିଲେ।
ପ୍ରାୟ ଦୁଇ ଘଣ୍ଟା ଧରି ଚାଲିଥିବା ଏହି ବୈଠକରେ ନଭେମ୍ବର ୧ ତାରିଖରେ ଦିଲ୍ଲୀର ରାମଲୀଳା ମଇଦାନରେ ଇଣ୍ଡି ମେଣ୍ଟ ପକ୍ଷରୁ ହେବାକୁ ଥିବା ରାଲିକୁ ଦୃଷ୍ଟିରେ ରଖି ଦଳର ସାଂଗଠନିକ ପ୍ରସ୍ତୁତି ଓ ବିରୋଧୀଙ୍କ ଅଭିଯୋଗର ଜବାବ ଦେବା ପାଇଁ ରଣନୀତି ଉପରେ ଆଲୋଚନା ହୋଇଥିଲା।
ସୂତ୍ରଙ୍କ ଠାରୁ ପ୍ରକାଶ ଯେ ନିର୍ବାଚନ ଆୟୋଗଙ୍କ ପକ୍ଷରୁ କରାଯାଉଥିବା ଭୋଟର ତାଲିକାର ସ୍ୱତନ୍ତ୍ର ଗଭୀର ସଂଶୋଧନ (ଏସ୍ଆଇଆର୍)କୁ ନେଇ ବିଜେପିର ରଣନୀତିର ସମୀକ୍ଷା କରାଯାଇଥିଲା। ଏହା ସହିତ ଦଳର ‘ଗଣତନ୍ତ୍ର ବଞ୍ଚାଅ, ଅରାଜକତା ହଟାଅ’ ଅଭିଯାନର ରୂପରେଖ ଓ ଏହାକୁ ତୃଣମୂଳ ସ୍ତରରେ କିପରି ଆଗକୁ ବଢ଼ାଯିବ, ସେ ସମ୍ପର୍କରେ ମଧ୍ୟ ବିଚାରବିମର୍ଶ ହୋଇଥିଲା।
ଉଲ୍ଲେଖଯୋଗ୍ୟ, ଏସ୍ଆଇଆର୍କୁ ନେଇ ବିରୋଧୀ ଦଳଗୁଡ଼ିକ ଉଠାଉଥିବା ପ୍ରଶ୍ନର ଜବାବ ଦେବା ସହ ଭୋଟର ତାଲିକାର ଶୁଦ୍ଧୀକରଣ ସପକ୍ଷରେ ନିଜର ମତ ଜନସାଧାରଣଙ୍କ ନିକଟରେ ପହଞ୍ଚାଇବା ଉଦ୍ଦେଶ୍ୟରେ ବିଜେପି ବୁଧବାରଠାରୁ ଦେଶବ୍ୟାପୀ ଅଭିଯାନ ଆରମ୍ଭ କରିଛି। ଦିଲ୍ଲୀର ଚାନ୍ଦନୀ ଚୌକ୍ରୁ ଆରମ୍ଭ ହୋଇଥିବା ଏହି ଅଭିଯାନର ନେତୃତ୍ୱ ଦଳର ଜାତୀୟ ଅଧ୍ୟକ୍ଷ ନିତିନ ନବୀନ ନେଇଥିଲେ।
ବୈଠକରେ ଭୋଟରମାନଙ୍କ ସହ ଜନସମ୍ପର୍କ ବଢ଼ାଇବା ଏବଂ ନିର୍ବାଚନ ପ୍ରକ୍ରିୟା ସହ ଜଡ଼ିତ ବିଭିନ୍ନ ବିଷୟରେ ଜନସାଧାରଣଙ୍କୁ ସଚେତନ କରିବା ପାଇଁ ଯୋଜନା ଉପରେ ମଧ୍ୟ ଆଲୋଚନା ହୋଇଥିଲା। ଏସ୍ଆଇଆର୍କୁ ନେଇ ସରକାର ଓ ନିର୍ବାଚନ ଆୟୋଗଙ୍କ ପକ୍ଷର ତଥ୍ୟ ଲୋକଙ୍କ ନିକଟରେ ପହଞ୍ଚାଇବା ପାଇଁ ସାଂଗଠନିକ ସ୍ତରରେ ପ୍ରୟାସ ତ୍ୱରାନ୍ୱିତ କରିବାକୁ ଦଳୀୟ ନେତୃତ୍ୱ ଗୁରୁତ୍ୱ ଦେଇଥିଲେ।
ନିର୍ବାଚନରେ ପରାଜୟ ପରେ ବିରୋଧୀ ଦଳଗୁଡ଼ିକ ସାମ୍ବିଧାନିକ ସଂସ୍ଥାଗୁଡ଼ିକ ଉପରେ ପ୍ରଶ୍ନ ଉଠାଉଥିବା ନେଇ ଶିବରାଜ ସିଂହ ଚୌହାନଙ୍କ ସମେତ ବିଜେପିର ଅନେକ ନେତା ସମାଲୋଚନା କରିଆସୁଛନ୍ତି। ଏଭଳି ପରିସ୍ଥିତିରେ ଏହି ବୈଠକକୁ ଦଳର ରାଜନୈତିକ ଓ ସାଂଗଠନିକ ରଣନୀତିକୁ ଅଧିକ ସୁଦୃଢ଼ କରିବାର ଏକ ପ୍ରୟାସ ଭାବେ ଦେଖାଯାଉଛି।
ହିନ୍ଦୁସ୍ଥାନ ସମାଚାର / ସମନ୍ୱୟ
