ଜୟପୁର, ୨୯ ଅକ୍ଟୋବର (ହି.ସ.)- ବାତ୍ୟା ‘ଅର୍ଣ୍ଣବ’ ପ୍ରଭାବରେ ହୋଇଥିବା ପ୍ରାୟ ୫୫୦ ମିଲିମିଟର ବର୍ଷା ଯୋଗୁଁ ଗଞ୍ଜାମ ଜିଲ୍ଲାର ବାହୁଦା ନଦୀରେ ଜଳସ୍ତର ହଠାତ୍ ବୃଦ୍ଧି ପାଇଛି। ପ୍ରବଳ ବର୍ଷା କାରଣରୁ ବାହୁଦା ନଦୀସ୍ଥିତ ବଘଲାଟି ବନ୍ଧରେ ଜଳସ୍ତର ବିପଦ ସଙ୍କେତ ଅତିକ୍ରମ କରିଯାଇଛି। ଏହାର ପ୍ରଭାବରେ ଇଚ୍ଛାପୁରମ ଏବଂ ଝାଡୁପୁଡ଼ି ମଧ୍ୟରେ ଥିବା ରେଳ ସେତୁ ନିକଟରେ ମଧ୍ୟ ଜଳସ୍ତର ବୃଦ୍ଧି ପାଇ ବିପଦ ସଙ୍କେତ ଟପିଯାଇଛି।ବର୍ତ୍ତମାନର ପରିସ୍ଥିତିକୁ ଦୃଷ୍ଟିରେ ରଖି, ଇଷ୍ଟ କୋଷ୍ଟ ରେଲୱେ ଯାତ୍ରୀଙ୍କ ସୁରକ୍ଷା ସୁନିଶ୍ଚିତ କରିବା ଏବଂ ଯେକୌଣସି ଅଘଟଣକୁ ଏଡ଼ାଇବା ପାଇଁ ବିଭିନ୍ନ ସତର୍କତାମୂଳକ ପଦକ୍ଷେପ ଗ୍ରହଣ କରିଛି। ବିଭିନ୍ନ ଷ୍ଟେସନରେ ଯାତ୍ରୀଙ୍କ ସୁରକ୍ଷା ଉପରେ ବିଶେଷ ଧ୍ୟାନ ଦିଆଯାଉଛି ଏବଂ ପରିସ୍ଥିତିକୁ ବିଚାରକୁ ନେଇ ହାୱଡ଼ା-ଚେନ୍ନାଇ ମାର୍ଗରେ ଚଳାଚଳ କରୁଥିବା କିଛି ଟ୍ରେନ୍ ର ଗତିପଥ ପରିବର୍ତ୍ତନ କରାଯାଇଛି। ଜଳସ୍ତର ସମ୍ପର୍କରେ ନିୟମିତ ତଥ୍ୟ ପାଇବା ଏବଂ ପରିସ୍ଥିତିର ସମୀକ୍ଷା କରିବା ପାଇଁ ଇଷ୍ଟ କୋଷ୍ଟ ରେଲୱେ ଜିଲ୍ଲା ପ୍ରଶାସନ ସହ ନିରନ୍ତର ଯୋଗାଯୋଗରେ ରହିଛି। ରେଳ ପରିଚାଳନା ଓ ଯାତ୍ରୀଙ୍କ ସୁରକ୍ଷା ସୁନିଶ୍ଚିତ କରିବା ନିମନ୍ତେ ଆବଶ୍ୟକୀୟ ପଦକ୍ଷେପ ଗ୍ରହଣ କରିବା ପାଇଁ ରାଜ୍ୟ ସରକାରଙ୍କ ସହ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି।ଟ୍ରେନ୍ ଚଳାଚଳ ବାଧାପ୍ରାପ୍ତ ହେବା କାରଣରୁ ବିଭିନ୍ନ ସ୍ଥାନରେ ଯାତ୍ରୀମାନେ ଅଟକି ରହିଛନ୍ତି। ଏହାକୁ ଦୃଷ୍ଟିରେ ରଖି ଇଷ୍ଟ କୋଷ୍ଟ ରେଲୱେ ପକ୍ଷରୁ ଖାଦ୍ୟ ଓ ପାନୀୟ ଜଳ ସମେତ ଅନ୍ୟାନ୍ୟ ଅତ୍ୟାବଶ୍ୟକ ସହାୟତା ଯୋଗାଇ ଦେବାର ବ୍ୟବସ୍ଥା କରାଯାଉଛି। ଯାତ୍ରୀମାନଙ୍କୁ ମାର୍ଗଦର୍ଶନ କରିବା, ସେମାନଙ୍କ ଅଭିଯୋଗ ଶୁଣିବା ଏବଂ ଆବଶ୍ୟକୀୟ ସହାୟତା ପ୍ରଦାନ କରିବା ପାଇଁ ଅତିରିକ୍ତ କର୍ମଚାରୀ, ରେଳ ସୁରକ୍ଷା ବଳ ଏବଂ ଟ୍ରାଭେଲିଂ ଟିକେଟ୍ ପରୀକ୍ଷକ ମାନଙ୍କୁ ନିୟୋଜିତ କରାଯାଇଛି। ଯାତ୍ରୀଙ୍କ ଅଭିଯୋଗ ଉପରେ ନଜର ରଖି ଯାତ୍ରୀମାନଙ୍କୁ ପରାମର୍ଶ ଦିଆଯାଇଛି ଯେ, ସେମାନେ ଯାତ୍ରା ଆରମ୍ଭ କରିବା ପୂର୍ବରୁ ଟ୍ରେନ୍ ର ସର୍ବଶେଷ ସ୍ଥିତି ଯାଞ୍ଚ କରନ୍ତୁ ଏବଂ ଅଧିକ ସୂଚନା ପାଇଁ ସରକାରୀ ସୋସିଆଲ ମିଡିଆ ହ୍ୟାଣ୍ଡେଲ୍ ସହିତ ଯୋଡ଼ି ରୁହନ୍ତୁ।

ହିନ୍ଦୁସ୍ଥାନ ସମାଚାର / ପିକେପି