କାଠମାଣ୍ଡୁ,
୩୦ ଅକ୍ଟୋବର (ହି.ସ.): ନେପାଳ ଓ ଭାରତ ମଧ୍ୟରେ ସୀମା ସୁରକ୍ଷା, ପ୍ରଯୁକ୍ତିଭିତ୍ତିକ
ପରିଚାଳନା ଏବଂ ଦ୍ୱିପାକ୍ଷିକ ସହଯୋଗକୁ ଆହୁରି ସୁଦୃଢ଼ କରିବା ନେଇ ସହମତି ପ୍ରକାଶ ପାଇଛି।
କାଠମାଣ୍ଡୁଠାରେ ଅକ୍ଟୋବର ୨୮ ଓ ୨୯ ତାରିଖରେ ଆୟୋଜିତ ନେପାଳ-ଭାରତ ଦଶମ ସମନ୍ୱୟ ବୈଠକରେ
ଏହି ସହମତି ହୋଇଛି। ସଶସ୍ତ୍ର ପ୍ରହରୀ ବଳ ନେପାଳର ମହାନିରୀକ୍ଷକ ନାରାୟଣଦତ୍ତ ପୌଡେଲ ଏବଂ
ଭାରତର ସଶସ୍ତ୍ର ସୀମା ବଳ (ଏସ୍ଏସ୍ବି)ର ମହାନିର୍ଦ୍ଦେଶକ ସଞ୍ଜୟ ସିଂଘଲ ନିଜ ନିଜ
ପ୍ରତିନିଧିମଣ୍ଡଳୀର ନେତୃତ୍ୱ ନେଇଥିଲେ।
ବୈଠକରେ ନବମ ସମନ୍ୱୟ ବୈଠକର ନିଷ୍ପତ୍ତିଗୁଡ଼ିକର ଅଗ୍ରଗତି ସମୀକ୍ଷା କରାଯାଇଥିଲା। ଏଥିସହ
ସୀମାନ୍ତ ଅଞ୍ଚଳରେ ବେଆଇନ କାର୍ଯ୍ୟକଳାପ ଓ ସୀମାପାର ଅପରାଧ ନିୟନ୍ତ୍ରଣ ପାଇଁ ରଣନୈତିକ, ପରିଚାଳନାଗତ ଓ
କାର୍ଯ୍ୟକ୍ଷେତ୍ର ସ୍ତରରେ ସହଯୋଗ ବଢ଼ାଇବାକୁ ନିଷ୍ପତ୍ତି ହୋଇଥିଲା। ଏଥିପାଇଁ ଉଭୟ ଦେଶ ତୁରନ୍ତ
ସୂଚନା ଆଦାନପ୍ରଦାନ କରିବାକୁ ପ୍ରତିବଦ୍ଧତା ପ୍ରକାଶ କରିଥିଲେ।
ଦୁଇ ଦେଶ ମଧ୍ୟରେ ଥିବା ନୋ-ମ୍ୟାନ୍ସ ଲ୍ୟାଣ୍ଡ୍ ଦଶଗଜାର ସଠିକ୍ ପରିଚାଳନା ପାଇଁ ଅନଧିକୃତ
ଚାଷ, ଜବରଦଖଲ
ଓ ବେଆଇନ ନିର୍ମାଣ ହଟାଇବା ନିମନ୍ତେ ମିଳିତ ପ୍ରୟାସ ଜାରି ରଖିବାକୁ ସହମତି ହୋଇଥିଲା।
ସୀମାସ୍ତମ୍ଭଗୁଡ଼ିକର ମରାମତି,
ରକ୍ଷଣାବେକ୍ଷଣ ଓ ପୁନଃନିର୍ମାଣ ପାଇଁ ସମ୍ପୃକ୍ତ ବ୍ୟବସ୍ଥାର ନିଷ୍ପତ୍ତି ଅନୁଯାୟୀ
ସ୍ଥଳସ୍ତରରେ ସମନ୍ୱୟ ବଢ଼ାଇବାକୁ ମଧ୍ୟ ଉଭୟ ପକ୍ଷ ରାଜି ହୋଇଥିଲେ।
ସେହିପରି ସୀମାପାର ଅପରାଧୀ ନେଟୱର୍କ,
ବେଆଇନ ଚାଲାଣ, ମାନବ
ଚାଲାଣ, ଜାଲ୍
ନୋଟ୍ ଓ ନିଶାଦ୍ରବ୍ୟ କାରବାର ନିୟନ୍ତ୍ରଣ ପାଇଁ ନିୟମିତ ସୂଚନା ଆଦାନପ୍ରଦାନ ଜାରି ରଖିବାକୁ
ନିଷ୍ପତ୍ତି ହୋଇଛି।
ଖୋଲା ସୀମାର ଦୁରୁପଯୋଗ କରି ତୃତୀୟ ଦେଶର ନାଗରିକଙ୍କ ବେଆଇନ ପ୍ରବେଶ ରୋକିବା ପାଇଁ ସୀମା
ଯାଞ୍ଚ କେନ୍ଦ୍ରଗୁଡ଼ିକରେ ଯାଞ୍ଚ ଓ ଦସ୍ତାବିଜ୍ ଯାଞ୍ଚ ପ୍ରକ୍ରିୟା କଡ଼ାକଡ଼ି କରିବା, ଦଶଗଜା ଅଞ୍ଚଳରେ
ମିଳିତ ପାଟ୍ରୋଲିଂ କରିବା ଏବଂ ସନ୍ଦିଗ୍ଧ ବ୍ୟକ୍ତିଙ୍କ ସମ୍ପର୍କରେ ତୁରନ୍ତ ସୂଚନା ଆଦାନପ୍ରଦାନ
କରିବାକୁ ମଧ୍ୟ ସହମତି ପ୍ରକାଶ ପାଇଛି।
ସୀମା ପରିଚାଳନାକୁ ଆଧୁନିକ ଓ ପ୍ରଯୁକ୍ତି ଅନୁକୂଳ କରିବା ଉପରେ ବୈଠକରେ ଗୁରୁତ୍ୱ
ଦିଆଯାଇଥିଲା। ଦଶଗଜା ଅଞ୍ଚଳରେ ସିସିଟିଭି କ୍ୟାମେରା ଲଗାଇବା, ପ୍ରମୁଖ ସୀମା
ଯାଞ୍ଚ କେନ୍ଦ୍ରରେ ଲଗେଜ୍ ସ୍କାନର୍ ଓ ୱାକ୍-ଥ୍ରୁ ମେଟାଲ୍ ଡିଟେକ୍ଟର୍ ସ୍ଥାପନ କରିବା ସହ
ଉଭୟ ଦେଶ ନିଜ ନିଜ ଅଞ୍ଚଳରେ ଡ୍ରୋନ୍ର ବ୍ୟବହାର ବଢ଼ାଇବା ନେଇ ଆଲୋଚନା ହୋଇଥିଲା।
ଏହାବ୍ୟତୀତ ସୋସିଆଲ ମିଡିଆର ଦୁରୁପଯୋଗ ଓ ଭ୍ରମାତ୍ମକ ସୂଚନା ଯୋଗୁଁ ସୃଷ୍ଟି ହେଉଥିବା
ସୁରକ୍ଷା ଏବଂ ସାମାଜିକ ସଦ୍ଭାବ ସମ୍ବନ୍ଧୀୟ ଆହ୍ୱାନର ମୁକାବିଲା ପାଇଁ ସଂସ୍ଥାଗତ ସହଯୋଗ
ସୁଦୃଢ଼ କରିବାକୁ ସହମତି ହୋଇଛି। ସୀମା ସୁରକ୍ଷା ସମସ୍ୟାର ମୁକାବିଲା ପାଇଁ ଆଧୁନିକ ପ୍ରଯୁକ୍ତି
ଓ ସ୍ୱତନ୍ତ୍ର ପ୍ରଶିକ୍ଷଣ କ୍ଷେତ୍ରରେ ସହଯୋଗ ବଢ଼ାଇବା ସହ ଉଭୟ ସୁରକ୍ଷା ସଂସ୍ଥା ମଧ୍ୟରେ
ନିୟମିତ ଅଧ୍ୟୟନ ଗସ୍ତ ଆୟୋଜନ କରିବାକୁ ମଧ୍ୟ ନିଷ୍ପତ୍ତି ହୋଇଛି।
ପ୍ରାକୃତିକ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଚିତୱନର କୁରିନଟାରସ୍ଥିତ ସଶସ୍ତ୍ର ପ୍ରହରୀ
ବଳ ନେପାଳର ବିପର୍ଯ୍ୟୟ ପରିଚାଳନା ପ୍ରଶିକ୍ଷଣ ସଂସ୍ଥାନରେ ମିଳିତ ଜଳ ଉଦ୍ଧାର ଅଭ୍ୟାସ (ଜଏଣ୍ଟ
ସ୍ୱିଫ୍ଟ ୱାଟର ରେସ୍କ୍ୟୁ ଏକ୍ସରସାଇଜ୍) ଆୟୋଜନ କରିବା ନେଇ ମଧ୍ୟ ଆଲୋଚନା ହୋଇଥିଲା।
ବୈଧ ଯାତ୍ରୀମାନଙ୍କୁ ସୁବିଧା ଯୋଗାଇବା ପାଇଁ ସୀମା ଯାଞ୍ଚ କେନ୍ଦ୍ରଗୁଡ଼ିକରେ ସହାୟତା
କେନ୍ଦ୍ରର ସଂଖ୍ୟା ଓ ସୁବିଧା ବଢ଼ାଇବାକୁ ଉଭୟ ପକ୍ଷ ସହମତ ହୋଇଥିଲେ। ଏଥିସହ କ୍ରୀଡ଼ା, ଅନ୍ତର୍ଜାତୀୟ ଦିବସ
ଓ ପ୍ରମୁଖ ପର୍ବପର୍ବାଣୀ ଅବସରରେ ମିଳିତ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରି ପାରସ୍ପରିକ
ବିଶ୍ୱାସ ଓ ସଦ୍ଭାବ ବଢ଼ାଇବାକୁ ନିଷ୍ପତ୍ତି ହୋଇଛି।
ବୈଠକରେ ନେପାଳ ପକ୍ଷରୁ ସଶସ୍ତ୍ର ପ୍ରହରୀ ବଳ ନେପାଳର ବରିଷ୍ଠ ଅଧିକାରୀଙ୍କ ସହ ବୈଦେଶିକ
ମନ୍ତ୍ରଣାଳୟ, ଗୃହ
ମନ୍ତ୍ରଣାଳୟ, ନାପି
ବିଭାଗ, ନେପାଳ
ପୁଲିସ ଓ ଜାତୀୟ ଅନୁସନ୍ଧାନ ବିଭାଗର ପ୍ରତିନିଧିମାନେ ଯୋଗ ଦେଇଥିଲେ। ଭାରତ ପକ୍ଷରୁ ସଶସ୍ତ୍ର
ସୀମା ବଳର ବରିଷ୍ଠ ଅଧିକାରୀ,
କାଠମାଣ୍ଡୁସ୍ଥିତ ଭାରତୀୟ ଦୂତାବାସ ଏବଂ ବୈଦେଶିକ ଓ ଗୃହ ମନ୍ତ୍ରଣାଳୟର ପ୍ରତିନିଧିମାନେ
ବୈଠକରେ ସାମିଲ ହୋଇଥିଲେ।
୨୦୧୨ରୁ ନେପାଳ ଓ ଭାରତରେ ପାଳିକରି ଆୟୋଜିତ ହୋଇଆସୁଥିବା ଏହି ଦ୍ୱିପାକ୍ଷିକ ସମନ୍ୱୟ
ବୈଠକର ଏକାଦଶ ସଂସ୍କରଣ ଆସନ୍ତା ବର୍ଷ ଭାରତରେ ଅନୁଷ୍ଠିତ ହେବ।
ହିନ୍ଦୁସ୍ଥାନ ସମାଚାର / ସମନ୍ୱୟ
