ଝାରସୁଗୁଡ଼ା, ୫ ଅକ୍ଟୋବର (ହି.ସ.)- ଝାରସୁଗୁଡ଼ା ସହରର ସାରବାହାଲ ରୋଡ଼ରେ ଭିଷାଲ ମେଗାମାର୍ଟ ନିକଟସ୍ଥ ମୁଖ୍ୟ ରାସ୍ତାରେ ଲାଗିରହିଥିବା ଟ୍ରାଫିକ୍ ସମସ୍ୟା ଓ ଜନସୁରକ୍ଷା ନେଇ ଚିନ୍ତା ପ୍ରକାଶ ପାଇଛି। ଏହି ସମସ୍ୟାର ସମାଧାନ ସହ ଆଗାମୀ ପର୍ବପର୍ବାଣୀ ସମୟରେ ବଢ଼ିବାକୁ ଥିବା ଯାତାୟାତକୁ ଦୃଷ୍ଟିରେ ରଖି ରାସ୍ତାର ଡିଭାଇଡର୍ ମେଡିଆନ୍ ରେ ଆବଶ୍ୟକ ପରିବର୍ତ୍ତନ କରିବାକୁ ଦାବି ହୋଇଛି।
ଏନେଇ ଝାରସୁଗୁଡ଼ା ପୌରପାଳିକାର ଉପାଧ୍ୟକ୍ଷ ବେଣୁଗୋପାଳ ପାଣିଗ୍ରାହୀ ଲୋକ ନିର୍ମାଣ ବିଭାଗ (ପିଡବ୍ଲୁଡି), ଝାରସୁଗୁଡ଼ାର ଅଧୀକ୍ଷଣ ଯନ୍ତ୍ରୀଙ୍କ ନିକଟରେ ଲିଖିତ ଭାବେ ଅନୁରୋଧ କରିଛନ୍ତି। ତାଙ୍କ ଅନୁରୋଧ ଅନୁଯାୟୀ, ଭିଷାଲ ମେଗାମାର୍ଟ ନିକଟରେ ରହିଥିବା ବର୍ତ୍ତମାନର ରାସ୍ତା ମେଡିଆନ୍ ଯୋଗୁଁ ଯାନବାହନ ଚଳାଚଳରେ ବାଧା ସୃଷ୍ଟି ହେଉଛି। ବିଶେଷକରି ପିକ୍ ଆୱାରରେ ଏଠାରେ ଟ୍ରାଫିକ୍ ଜାମ୍ ଓ ବୋତଲନେକ୍ ପରିସ୍ଥିତି ଦେଖାଦେଉଛି। ଏଥିସହ ଅସୁରକ୍ଷିତ ଭାବେ ଗାଡ଼ି ଘୁରାଇବା ଏବଂ ପଥଚାରୀମାନଙ୍କ ରାସ୍ତା ପାର୍ ହେବା ଯୋଗୁଁ ଦୁର୍ଘଟଣାର ଆଶଙ୍କା ମଧ୍ୟ ରହୁଛି। ପର୍ବପର୍ବାଣୀ ସମୟରେ ଏହି ରାସ୍ତାରେ ଯାତାୟାତ ଆହୁରି ବଢ଼ିବାର ସମ୍ଭାବନା ଥିବାରୁ ପରିସ୍ଥିତି ଗମ୍ଭୀର ହେବା ପୂର୍ବରୁ ପଦକ୍ଷେପ ନେବାକୁ ସେ ଅନୁରୋଧ କରିଛନ୍ତି।
ଏହି ପରିପ୍ରେକ୍ଷୀରେ ଘଟଣାସ୍ଥଳର ତୁରନ୍ତ ନିରୀକ୍ଷଣ କରି ପ୍ରାୟ ୧୫ ଫୁଟ୍ ମେଡିଆନ୍ ଅପସାରଣ କରି ଏକ ସୁଚିନ୍ତିତ ଓ ସୁରକ୍ଷିତ ଖୋଲା ସ୍ଥାନ ସୃଷ୍ଟି କରିବାର ବୈଷୟିକ ସମ୍ଭାବନା ଯାଞ୍ଚ କରିବାକୁ ସେ ପ୍ରସ୍ତାବ ଦେଇଛନ୍ତି। ଏହି କାର୍ଯ୍ୟ ସମସ୍ତ ପ୍ରଯୁଜ୍ୟ ଇଞ୍ଜିନିୟରିଂ ନିର୍ଦ୍ଦେଶାବଳୀ, ଟ୍ରାଫିକ୍ ପରିଚାଳନା ଓ ସଡ଼କ ସୁରକ୍ଷା ମାନଦଣ୍ଡ ଅନୁଯାୟୀ କରାଯିବା ଉଚିତ ବୋଲି ସେ ଉଲ୍ଲେଖ କରିଛନ୍ତି। ମେଡିଆନ୍ ରେ ଏଭଳି ବୈଜ୍ଞାନିକ ପରିବର୍ତ୍ତନ ହେଲେ ଯାନବାହନ ଚଳାଚଳ ଅଧିକ ସୁଗମ ହେବା ସହ ବ୍ୟବସାୟିକ ପ୍ରତିଷ୍ଠାନଗୁଡ଼ିକୁ ସୁରକ୍ଷିତ ପ୍ରବେଶ, ଜରୁରୀକାଳୀନ ଯାନ, ସାଧାରଣ ପରିବହନ ଓ ପଥଚାରୀଙ୍କ ଯାତାୟାତରେ ସୁବିଧା ହେବ ବୋଲି ଆଶା ପ୍ରକାଶ କରାଯାଇଛି। ପର୍ବ ଋତୁ ଆରମ୍ଭ ପୂର୍ବରୁ ଏହି ପ୍ରସଙ୍ଗରେ ତୁରନ୍ତ ପଦକ୍ଷେପ ନେଇ ଟ୍ରାଫିକ୍ ପରିଚାଳନା ଓ ଜନସୁରକ୍ଷା ସୁନିଶ୍ଚିତ କରିବାକୁ ବେଣୁଗୋପାଳ ପାଣିଗ୍ରାହୀ ପିଡବ୍ଲୁଡି କର୍ତ୍ତୃପକ୍ଷଙ୍କୁ ଅନୁରୋଧ କରିଛନ୍ତି।
ହିନ୍ଦୁସ୍ଥାନ ସମାଚାର / ସଞ୍ଜୟ
