ନୂଆଦିଲ୍ଲୀ, ଅକ୍ଟୋବର 6 (ହି.ସ) : ଭାରତର ପୂର୍ବତନ ମୁଖ୍ୟ କୋଚ୍ ରବି ଶାସ୍ତ୍ରୀ ଜେଲରେ ବନ୍ଦୀ ଥିବା ପାକିସ୍ତାନର ପୂର୍ବତନ ଅଧିନାୟକ ଇମ୍ରାନ ଖାନଙ୍କ ସ୍ୱାସ୍ଥ୍ୟକୁ ନେଇ ଚିନ୍ତା ପ୍ରକାଶ କରିବା ସହ ତାଙ୍କୁ ସମର୍ଥନ କରିଛନ୍ତି। ଇମ୍ରାନଙ୍କ ସହ ଭଲ ବ୍ୟବହାର କରିବାକୁ ଦାବି କରିବା ସହ ଶାସ୍ତ୍ରୀ କୂଟନୈତିକ ହସ୍ତକ୍ଷେପ ପାଇଁ ମଧ୍ୟ ଅପିଲ କରିଛନ୍ତି। ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ୨୦୨୩ ମସିହାରୁ ପାକିସ୍ତାନ ଜେଲରେ ବନ୍ଦୀ ଅଛନ୍ତି।

ଏକ ନ୍ୟୁଜ୍ ଚ୍ୟାନେଲକୁ ସାକ୍ଷାତକାର ଦେଇ ଶାସ୍ତ୍ରୀ ଇମ୍ରାନଙ୍କ ପ୍ରତି ପାକିସ୍ତାନର ବ୍ୟବହାରକୁ ଅମାନବୀୟ ବୋଲି କହିଛନ୍ତି। ସେ କହିଛନ୍ତି ଯେ, ଖବର ଅନୁଯାୟୀ ଜେଲରେ ଇମ୍ରାନଙ୍କ ସ୍ୱାସ୍ଥ୍ୟ ଖରାପ ହୋଇପଡ଼ିଛି ଏବଂ ତାଙ୍କ ଡାହାଣ ଆଖିର ଦୃଷ୍ଟିଶକ୍ତି ମାତ୍ର ୧୫ ପ୍ରତିଶତ ରହିଛି।

ଶାସ୍ତ୍ରୀ କହିଛନ୍ତି, “ମୁଁ କୌଣସି ରାଜନେତା ନୁହେଁ। କିନ୍ତୁ ଆଜି ତାଙ୍କ ସହ ଯେପରି ବ୍ୟବହାର କରାଯାଉଛି, ତାହା ଆଶ୍ଚର୍ଯ୍ୟଜନକ। ଆପଣ ଜାଣନ୍ତି, କୌଣସି ମଣିଷଙ୍କ ସହ ଏପରି ବ୍ୟବହାର କରାଯାଏ ନାହିଁ। ମାନବିକ ଦୃଷ୍ଟିକୋଣରୁ ମୋତେ ଲାଗୁନାହିଁ ଯେ ସେ ଏପରି ବ୍ୟବହାରର ହକଦାର। ତେଣୁ ମୁଁ କେବଳ ନିଜ କଥା କହୁନାହିଁ। ମୋତେ ଲାଗୁଛି, ସାରା ବିଶ୍ୱରେ ଅନେକ କ୍ରିକେଟର ଥିବେ, ଯେଉଁମାନଙ୍କର ମଧ୍ୟ ଏଭଳି ଭାବନା ରହିଛି।”

ଶାସ୍ତ୍ରୀ ଇମ୍ରାନଙ୍କ ଶୀଘ୍ର ସୁସ୍ଥତା ଓ ଭଲ ସ୍ୱାସ୍ଥ୍ୟ କାମନା କରିବା ସହ କ୍ରିକେଟ୍ ଖେଳ ପ୍ରତି ତାଙ୍କ ଅବଦାନକୁ ମଧ୍ୟ ପ୍ରଶଂସା କରିଛନ୍ତି। ସେ କହିଛନ୍ତି, “ମୁଁ କେବଳ ଏତିକି ଆଶା କରୁଛି ଯେ ସେ ସୁସ୍ଥ ରୁହନ୍ତୁ ଏବଂ ତାଙ୍କ ସ୍ୱାସ୍ଥ୍ୟ ଭଲ ରହୁ। ଖେଳ ପାଇଁ ସେ ଯାହା ଦେଇଛନ୍ତି, ତାହା ଅତ୍ୟନ୍ତ ବିଶେଷ। ତାଙ୍କ ସହ ଜଡ଼ିତ ମୋର ସ୍ମୃତି ଜଣେ ଉତ୍କୃଷ୍ଟ ନେତାଙ୍କର। ଆପଣ ଜାଣନ୍ତି, ଇମ୍ରାନ ଲୋକଙ୍କୁ ସାଙ୍ଗରେ ନେଇ ଚାଲିବାର ଦକ୍ଷତା ରଖୁଥିବା ଜଣେ ନେତା ଥିଲେ। ଯୁବକମାନଙ୍କୁ ପ୍ରେରିତ କରିବା ଏବଂ ସେମାନଙ୍କୁ ଆଗକୁ ନେବାର କ୍ଷମତା ତାଙ୍କର ଥିଲା। ୪୦ ବର୍ଷ ବୟସରେ ସେ ଦଳର ଅଧିନାୟକ ହୋଇଥିଲେ ଏବଂ ଏକ ଯୁବ ଦଳ ସହ ବିଶ୍ୱକପ୍ ଜିତିଥିଲେ।”

ଶାସ୍ତ୍ରୀ କହିଛନ୍ତି ଯେ, ଇମ୍ରାନ ପାକିସ୍ତାନର ବିଶ୍ୱସ୍ତରୀୟ ଚେହେରା ରହିଛନ୍ତି ଏବଂ ସେ ଭଲ ବ୍ୟବହାର ପାଇବାର ହକଦାର। ସେ ପାକିସ୍ତାନ ସରକାରଙ୍କୁ ତାଙ୍କ ସ୍ୱାସ୍ଥ୍ୟକୁ ପ୍ରାଥମିକତା ଦେବାକୁ ଅପିଲ କରିଛନ୍ତି। ଶାସ୍ତ୍ରୀ କହିଛନ୍ତି, “ଆଶା କରୁଛି ସେ ଜେଲରୁ ବାହାରିବେ ଏବଂ ତାଙ୍କ ସହ ଭଲ ବ୍ୟବହାର କରାଯିବ। ସେ ଦୀର୍ଘ ସମୟ ଧରି ଜେଲରେ ଅଛନ୍ତି। ମୁଁ ରାଜନୀତି ବୁଝେ ନାହିଁ। ତାଙ୍କୁ ଜେଲ କୋଠରୀରେ ରଖାଯାଇଛି। ସେ ଏହାର ହକଦାର ନୁହନ୍ତି, କାରଣ ସେ ସାରା ବିଶ୍ୱରେ ସବୁଠାରୁ ପରିଚିତ ପାକିସ୍ତାନୀ ଚେହେରାମାନଙ୍କ ମଧ୍ୟରୁ ଜଣେ। ଆପଣ ଏହାକୁ ପସନ୍ଦ କରନ୍ତୁ କିମ୍ବା ନକରନ୍ତୁ, ଏହା ମୋର ମତ।”

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା