ନୂଆଦିଲ୍ଲୀ, ୭ ଅକ୍ଟୋବର (ହି.ସ) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିକଶିତ ଭାରତକୁ ନିଜ ଜୀବନର ପ୍ରମୁଖ ଲକ୍ଷ୍ୟ ବୋଲି କହି ବୁଧବାର ଏଠାରେ କହିଛନ୍ତି ଯେ, ଯେପର୍ଯ୍ୟନ୍ତ ଭାରତ ବିକଶିତ ହୋଇନାହିଁ, ସେପର୍ଯ୍ୟନ୍ତ ସେ ନା ଅଟକିବେ, ନା ଥକିବେ ଏବଂ ନା ନିଜ ପଥରୁ ବିଚ୍ୟୁତ ହେବେ।

ଭାରତୀୟ ଜନତା ପାର୍ଟି (ବିଜେପି) ପକ୍ଷରୁ ପ୍ରଧାନମନ୍ତ୍ରୀ ମୋଦୀଙ୍କ ସାର୍ବଜନୀନ ଜୀବନରେ ଶାସନ ପ୍ରମୁଖ ଭାବେ ୨୫ ବର୍ଷ ପୂରଣ ଅବସରରେ ଆୟୋଜିତ ‘ବିକଶିତ ଭାରତ ସଂକଳ୍ପ ସଭା’କୁ ସମ୍ବୋଧିତ କରି ସେ କହିଛନ୍ତି ଯେ, ୨୦୪୭ ସୁଦ୍ଧା ବିକଶିତ ଭାରତ ଗଠନ ୧୪୦ କୋଟିରୁ ଅଧିକ ଦେଶବାସୀ ମିଳିତ ଭାବେ କରିବେ। ମୋଦୀ ୭ ଅକ୍ଟୋବର ୨୦୦୧ରେ ଗୁଜରାଟର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ ଏବଂ ଏହା ପରେ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀ ଭାବେ ସରକାରର ମୁଖ୍ୟ ରହି କ୍ରମାଗତ ୨୫ ବର୍ଷ ପୂରଣ କରିଛନ୍ତି।

ମୋଦୀ କହିଛନ୍ତି ଯେ, ସ୍ୱାଧୀନତା ହାସଲ ପାଇଁ ଦେଶବାସୀ ନିଜ ଜୀବନ ସମର୍ପିତ କରିଥିଲେ। ଏବେ ବିକଶିତ ଭାରତ ଗଠନ ପାଇଁ ଦେଶ ପାଇଁ ବଞ୍ଚିବାକୁ ହେବ। ସେ କହିଛନ୍ତି ଯେ, ଭାରତ ସମ୍ମୁଖରେ ଲକ୍ଷ୍ୟ ସ୍ପଷ୍ଟ—ବିକଶିତ ଭାରତ, ଆତ୍ମନିର୍ଭର ଭାରତ, ବିଶ୍ୱର ଶ୍ରେଷ୍ଠ ତିନିଟି ଅର୍ଥନୀତି ମଧ୍ୟରେ ସ୍ଥାନ, ଦାରିଦ୍ର୍ୟ ଦୂରୀକରଣ ଏବଂ ବିଭିନ୍ନ କ୍ଷେତ୍ରରେ ଭାରତକୁ ବିଶ୍ୱ ନେତୃତ୍ୱର ସ୍ଥାନରେ ପହଞ୍ଚାଇବା।

ପ୍ରଧାନମନ୍ତ୍ରୀ କହିଛନ୍ତି ଯେ, ଦେଶରେ ସମସ୍ୟା ନିଶ୍ଚିତ ଭାବେ ରହିଛି, କିନ୍ତୁ ଭାରତ ପାଖରେ ୧୪୦ କୋଟି ସମାଧାନ ମଧ୍ୟ ରହିଛି। ଯୁବପିଢ଼ିଙ୍କୁ ଦେଶର ବଡ଼ ଶକ୍ତି ବୋଲି ଅଭିହିତ କରି ସେ କହିଛନ୍ତି ଯେ, ସେମାନଙ୍କ ଶକ୍ତି ଓ ସାମର୍ଥ୍ୟ ବିକଶିତ ଭାରତ ଗଠନରେ ନିର୍ଣ୍ଣାୟକ ଭୂମିକା ନେବ। ସେ କହିଛନ୍ତି ଯେ, ଭାରତକୁ ଛୋଟ ଲକ୍ଷ୍ୟ ନେଇ ଆଗକୁ ବଢ଼ିବା ଉଚିତ ନୁହେଁ; ବରଂ ଅସାଧାରଣ ଓ ଅଭୂତପୂର୍ବ ଲକ୍ଷ୍ୟ ଧାର୍ଯ୍ୟ କରିବା ଆବଶ୍ୟକ।

ମୋଦୀ କହିଛନ୍ତି ଯେ, ସରକାରର ମୁଖ୍ୟ ଭାବେ ୨୫ ବର୍ଷର ନିରନ୍ତର ସେବା ଜନସାଧାରଣଙ୍କ ନିରନ୍ତର ଆଶୀର୍ବାଦର ପରିଣାମ। ସେ କହିଛନ୍ତି ଯେ, ଏହି ୨୫ ବର୍ଷର ଜନବିଶ୍ୱାସ ଓ ଅଭିଜ୍ଞତା ଏକ ବଡ଼ ପୁଞ୍ଜି, କିନ୍ତୁ ଏହି ପୁଞ୍ଜି କେବଳ ମୋଦୀଙ୍କର ନୁହେଁ, ଏହା ଦେଶର ପୁଞ୍ଜି।

ପ୍ରଧାନମନ୍ତ୍ରୀ କହିଛନ୍ତି ଯେ, ତାଙ୍କ ୨୫ ବର୍ଷର ମୂଲ୍ୟାୟନ ଏହି ଆଧାରରେ ହେବା ଉଚିତ ନୁହେଁ ଯେ ସେ ନିଜେ କେଉଁଠି ପହଞ୍ଚିଛନ୍ତି; ବରଂ ଏହା ଆଧାରରେ ହେବା ଉଚିତ ଯେ ଦେଶ କେଉଁଠି ପହଞ୍ଚିଛି। ସେ କହିଛନ୍ତି ଯେ, ଗୁଜରାଟରେ ତାଙ୍କର ମନ୍ତ୍ର ଥିଲା—ଗୁଜରାଟର ବିକାଶ ମାଧ୍ୟମରେ ଦେଶର ବିକାଶ। ପ୍ରଧାନମନ୍ତ୍ରୀ ଭାବେ ମଧ୍ୟ ସେ ଏହି ଚିନ୍ତାଧାରା ସହିତ କାମ କରିଛନ୍ତି।

ମୋଦୀ କହିଛନ୍ତି ଯେ, ଦେଶ ପାଇଁ ନିଃସ୍ୱାର୍ଥ କର୍ମ ହିଁ ତାଙ୍କ ପାଇଁ ସବୁକିଛି ଏବଂ କର୍ମ ହିଁ ତାଙ୍କର ଧର୍ମ। ତାଙ୍କ ପାଇଁ କର୍ମ କେବଳ ଦାୟିତ୍ୱ ନୁହେଁ, ବରଂ ଦେଶ ପ୍ରତି ସାଧନା। ଫଳ କିମ୍ବା ଶ୍ରେୟର ଚିନ୍ତା ନକରି ଦେଶର ସେବା କରିବା ହିଁ ତାଙ୍କର ସଂକଳ୍ପ ରହିଛି ବୋଲି ସେ କହିଛନ୍ତି।

ପ୍ରଧାନମନ୍ତ୍ରୀ କହିଛନ୍ତି ଯେ, ଆଗାମୀ ଦିନରେ ପ୍ରତିଭା, ପ୍ରଯୁକ୍ତି, ନବସୃଜନ, କ୍ରୀଡ଼ା, ମହାକାଶ ଓ ଉତ୍ପାଦନ ସମେତ ବିଭିନ୍ନ କ୍ଷେତ୍ରରେ ଭାରତ ବିଶ୍ୱର ନେତୃତ୍ୱ ନେଇପାରିବ। ବିକଶିତ ଭାରତର ଲକ୍ଷ୍ୟ ହାସଲ ପାଇଁ ସାମୂହିକ ପ୍ରୟାସ ଜରୁରୀ ବୋଲି ସେ କହିଛନ୍ତି।

ସେ କହିଛନ୍ତି, “ରାଷ୍ଟ୍ର ପ୍ରଥମ ମୋର ସଂକଳ୍ପ ହେବ, ରାଷ୍ଟ୍ରର ସମୃଦ୍ଧି ମୋର ପ୍ରାଣ ରହିବ, ରାଷ୍ଟ୍ରର ସେବା ମୋର ଲକ୍ଷ୍ୟ ରହିବ ଏବଂ କର୍ମ ମୋର ଧର୍ମ ରହିବ।” ସେ ନିଜ ସଂକଳ୍ପକୁ ଦୋହରାଇ କହିଛନ୍ତି, “ଯେପର୍ଯ୍ୟନ୍ତ ଭାରତ ବିକଶିତ ନ ହୋଇଛି, ସେପର୍ଯ୍ୟନ୍ତ ମୁଁ ନା ଅଟକିବି, ନା ଥକିବି, ନିଜ ପଥରୁ ବିଚ୍ୟୁତ ହେବି ନାହିଁ।”

ମୋଦୀ କହିଛନ୍ତି, “ଆଜିର ଏହି ଦିନ କେବଳ ସ୍ମୃତି ପାଇଁ ନୁହେଁ। ଏହା ଆମ ସଂକଳ୍ପକୁ ନୂଆ ଶକ୍ତିରେ ପୂର୍ଣ୍ଣ କରିବାର ଦିନ। ଏହା ସେହି ପ୍ରତିଶ୍ରୁତିକୁ ଦୋହରାଇବା ଏବଂ ସେହି ଉଦ୍ଦେଶ୍ୟକୁ ପ୍ରକାଶ କରିବାର ଦିନ, ଯାହା କହେ—ଆମେ କରିକି ରହିବୁ। ମୋର ଅଧିକାର କେବଳ ମୋର କର୍ମ ଉପରେ, ତେଣୁ ମୁଁ କର୍ମକୁ ନିଜ କର୍ତ୍ତବ୍ୟ ବୋଲି ମାନେ ଏବଂ ପ୍ରତ୍ୟେକ କର୍ମକୁ ସମ୍ପୂର୍ଣ୍ଣ ସାମର୍ଥ୍ୟର ସହିତ କରେ। ନିରନ୍ତର କର୍ମ କରେ। କର୍ମ କର, କାମ ଅଟକିବା ଉଚିତ ନୁହେଁ, ପ୍ରୟାସ ଅଟକିବା ଉଚିତ ନୁହେଁ। ତେଣୁ ମୋ ପାଇଁ କର୍ମ କେବଳ ଦାୟିତ୍ୱ ନୁହେଁ, ଏହା ଦେଶ ପ୍ରତି ମୋର ସାଧନା। ଦେଶ ପାଇଁ କର୍ମ, ଦେଶବାସୀଙ୍କ ପାଇଁ କର୍ମ ଏବଂ ଏଥିରେ ଭାବ ହେଉଛି—‘ମା ଫଳେଷୁ କଦାଚନ!’ ଫଳର ଚିନ୍ତା ନାହିଁ, ଶ୍ରେୟର ମଧ୍ୟ ଚିନ୍ତା ନାହିଁ।”

ସେ କହିଛନ୍ତି, “ଦେଶ ସୁଯୋଗ ଦେଇଛି, ଲୋକମାନେ ବିଶ୍ୱାସ ଦେଇଛନ୍ତି, ପରିସ୍ଥିତି ଶିକ୍ଷା ଦେଇଛି। ଏହାରି କାରଣରୁ ମୁଁ ଦେଶବାସୀଙ୍କ ଅବିରତ ସେବା କରିବାର ସୁଯୋଗ ପାଉଛି। ଆଜି ମୁଁ ଯାହା କିଛି, ଯେଉଁଠି ଅଛି, ଯେଉଁ ଦାୟିତ୍ୱରେ ଅଛି, ସେଥିରେ ସବୁଠାରୁ ବଡ଼ ଅବଦାନ ଜନତା-ଜନାର୍ଦ୍ଦନଙ୍କର। ମୋ ପାଇଁ ଜନତା-ଜନାର୍ଦ୍ଦନ ହିଁ ଈଶ୍ୱରଙ୍କ ରୂପ। ଲକ୍ଷ ଲକ୍ଷ, କୋଟି କୋଟି ଦେଶବାସୀଙ୍କ ବିଶ୍ୱାସ ଏବଂ ଲକ୍ଷ ଲକ୍ଷ କାର୍ଯ୍ୟକର୍ତ୍ତାଙ୍କ ପରିଶ୍ରମ ହିଁ ମୋର ସବୁଠାରୁ ବଡ଼ ଶକ୍ତି ରହିଛି।”

ପ୍ରଧାନମନ୍ତ୍ରୀ କହିଛନ୍ତି, “ଦେଶ ମୋତେ ବହୁତ କିଛି ଦେଇଛି। ତେଣୁ ଦେଶ ପାଇଁ ମୋର ଦାୟିତ୍ୱ ମଧ୍ୟ ସବୁଠାରୁ ଅଧିକ। ଏବଂ ମୁଁ ହୃଦୟରୁ ବିଶ୍ୱାସ କରେ ଯେ, ଦେଶର ପ୍ରତ୍ୟେକ ନାଗରିକଙ୍କର ମୋ ଉପରେ ସବୁଠାରୁ ବଡ଼ ଅଧିକାର ରହିଛି। ଏହି ୨୫ ବର୍ଷର ଜନବିଶ୍ୱାସ, ଏହି ୨୫ ବର୍ଷର ଅଭିଜ୍ଞତା ଏକ ବହୁତ ବଡ଼ ପୁଞ୍ଜି ଏବଂ ଏହି ପୁଞ୍ଜି କେବଳ ମୋଦୀଙ୍କର ନୁହେଁ, ଏହା ଦେଶର ପୁଞ୍ଜି। ମା’ ଭାରତୀଙ୍କ ପ୍ରତ୍ୟେକ ସନ୍ତାନ ଏହି ପୁଞ୍ଜିର ଅଧିକାରୀ।”

ମୋଦୀ କହିଛନ୍ତି, “ଆଜି ଯେତେବେଳେ ମୁଁ ପଛକୁ ଫେରି ଦେଖେ, ସେତେବେଳେ କେବଳ କୃତଜ୍ଞତାର ଭାବ ହିଁ ଦେଖାଯାଏ। ମୁଁ ପ୍ରତ୍ୟେକ ସେହି ବ୍ୟକ୍ତି ଓ ପ୍ରତ୍ୟେକ ସେହି ଘଟଣା ପ୍ରତି କୃତଜ୍ଞ, ଯିଏ ମୋତେ କିଛି ନା କିଛି ଶିଖାଇଛି। ଯିଏ ମୋତେ ଜିତାଇଛି, ସେ ମୋତେ ନମ୍ର ହେବା ଶିଖାଇଛି। ଯିଏ ମୋତେ ତଳେ ପକାଇଛି, ସେ ପୁଣି ଠିଆ ହେବା ଶିଖାଇଛି। ଶୁଭଚିନ୍ତକମାନେ ମୋତେ ଉତ୍ସାହିତ କରିଛନ୍ତି ଏବଂ ସମାଲୋଚକମାନେ ମୋତେ ନିଜ ଭିତରକୁ ଝାଙ୍କିବା ଶିଖାଇଛନ୍ତି। ଯିଏ ମୋର ସାଥ୍ ଦେଇଛି, ସେ ମୋତେ ବିଶ୍ୱାସର ଶକ୍ତି ଦେଖାଇଛି। ଯିଏ ମୋର ବିରୋଧ କରିଛି, ସେ ମୋତେ ଗଣତନ୍ତ୍ରର ଶକ୍ତି ବୁଝାଇଛି। ପ୍ରତ୍ୟେକ ସଙ୍କଟ ମୋର ଧୈର୍ଯ୍ୟର ପରୀକ୍ଷା ରହିଛି, ପ୍ରତ୍ୟେକ ସଫଳତା ମୋର ଦାୟିତ୍ୱକୁ ବିସ୍ତାର କରିଛି ଏବଂ ପ୍ରତ୍ୟେକ ସଫଳତା ବଡ଼ ଲକ୍ଷ୍ୟ ଦିଗରେ ଆଗକୁ ବଢ଼ିବାର ସାହସ ଓ ଉତ୍ସାହ ଦେଇଛି।”

ରାଜଧାନୀର ଇନ୍ଦିରା ଗାନ୍ଧୀ ଇଣ୍ଡୋର ଷ୍ଟାଡିୟମରେ ଆୟୋଜିତ ଏହି କାର୍ଯ୍ୟକ୍ରମରେ ବିଜେପିର ଜାତୀୟ ଅଧ୍ୟକ୍ଷ ନିତିନ ନବୀନ ନିଜ ସମ୍ବୋଧନରେ ପ୍ରଧାନମନ୍ତ୍ରୀଙ୍କୁ ଅଭିନନ୍ଦନ ଜଣାଇ କହିଛନ୍ତି, “ଯିଏ ଜନସେବାକୁ ହିଁ ନିଜ ଜୀବନର ଲକ୍ଷ୍ୟ କରିଛନ୍ତି, ଯାହାଙ୍କ ପାଇଁ ଜନସେବା ହିଁ ରାଷ୍ଟ୍ରସେବାର ମାର୍ଗ ପାଲଟିଛି ଏବଂ ଜୀବନର ଏହି ସଂକଳ୍ପକୁ ନେଇ ଯିଏ ରାଜନୀତିରେ କ୍ଷମତାକୁ ସେବାର ମାଧ୍ୟମ କରି ରାଷ୍ଟ୍ରସେବାର ପଥରେ ନିରନ୍ତର ଆଗକୁ ବଢ଼ିଛନ୍ତି, ଏଭଳି ଆମ ସମସ୍ତଙ୍କ ପ୍ରଧାନମନ୍ତ୍ରୀଙ୍କୁ ମୁଁ ଅନ୍ତରିକ ଅଭିନନ୍ଦନ ଓ ଶୁଭେଚ୍ଛା ଜଣାଉଛି।”

ନିତିନ ନବୀନ କହିଛନ୍ତି, “ମୁଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଜୀଙ୍କୁ ତାଙ୍କ ସାର୍ବଜନୀନ ଜୀବନ ସହିତ ସେବା ଓ ସମର୍ପଣର ୨୫ ବର୍ଷର ଅବିରତ, ଅବିଚଳ ଯାତ୍ରା ପାଇଁ ୧୪୦ କୋଟି ଦେଶବାସୀଙ୍କ ପକ୍ଷରୁ ଏବଂ ବିଜେପିର ଲକ୍ଷ ଲକ୍ଷ କାର୍ଯ୍ୟକର୍ତ୍ତାଙ୍କ ପକ୍ଷରୁ ହାର୍ଦ୍ଦିକ ଶୁଭେଚ୍ଛା ଜଣାଉଛି। ଆପଣ ଏହି ୨୫ ବର୍ଷରେ ଦୀପ ପରି ନିଜକୁ ଜାଳି, ନିଜ ପରିଶ୍ରମ ଓ ସମର୍ପଣ ମାଧ୍ୟମରେ ୧୪୦ କୋଟି ଦେଶବାସୀଙ୍କ ଜୀବନରେ ବିକାଶ, ଆତ୍ମବିଶ୍ୱାସ ଓ ସ୍ୱାଭିମାନର ଆଲୋକ ବିସ୍ତାର କରିବାର ନିରନ୍ତର ପ୍ରୟାସ କରିଛନ୍ତି।”

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା