କୋଲକାତା, ଅକ୍ଟୋବର 7 (ହି.ସ) ଦୁବାଇ ପଳାଇ ପତ୍ନୀଙ୍କ ସହ ଉପସାଗରୀୟ ଦେଶରେ ବସବାସ କରିବାର ସ୍ୱପ୍ନ ଦେଖୁଥିବା ପଶ୍ଚିମବଙ୍ଗର ପୂର୍ବ ବର୍ଦ୍ଧମାନ ଜିଲ୍ଲାର ନକଲି ଡାକ୍ତର ଶେଖ ସାଇଦୁଲଙ୍କ ଯୋଜନା ପଣ୍ଡ ହୋଇଯାଇଛି। ପତ୍ନୀଙ୍କୁ ସାଙ୍ଗରେ ନେବା ଉଦ୍ଦେଶ୍ୟରେ ମଙ୍ଗଳବାର ଦିଲ୍ଲୀରେ ପହଞ୍ଚିଥିବା ସାଇଦୁଲଙ୍କୁ ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ଓହ୍ଲାଇବା ମାତ୍ରେ ପୁଲିସ ଗିରଫ କରିଥିଲା। ବୁଧବାର ବର୍ଦ୍ଧମାନ ଥାନାର ଏକ ସ୍ୱତନ୍ତ୍ର ଟିମ୍ ତାଙ୍କୁ ଟ୍ରାନଜିଟ୍ ରିମାଣ୍ଡରେ ପଶ୍ଚିମବଙ୍ଗ ଆଣିବା ପାଇଁ ଦିଲ୍ଲୀ ଯାତ୍ରା କରିଛି।
ଶେଖ ସାଇଦୁଲଙ୍କ ନକଲି କାର୍ଯ୍ୟକଳାପର ପର୍ଦ୍ଦାଫାଶ ସେପ୍ଟେମ୍ବର ପ୍ରଥମ ସପ୍ତାହରେ ହୋଇଥିଲା। ପୂର୍ବ ବର୍ଦ୍ଧମାନର ନବାବହାଟସ୍ଥିତ ‘ଲାଇଫ୍ କେୟାର’ ନାମକ ଏକ ଘରୋଇ ନର୍ସିଂହୋମ୍ରେ ଫାଇମୋସିସ୍ ଅସ୍ତ୍ରୋପଚାର ସମୟରେ ଜଣେ ଶିଶୁର ମୃତ୍ୟୁ ଘଟିଥିଲା। ଶିଶୁର ପରିବାର ଚିକିତ୍ସାରେ ଗୁରୁତର ଅବହେଳା ହୋଇଥିବା ଅଭିଯୋଗ କରିଥିଲେ। ମୃତ ଶିଶୁର ମା’ ଶିଳ୍ପା ରାୟ ତାଙ୍କୁ ଫୋନ୍ରେ ଧମକ ଦିଆଯାଉଥିବା ନେଇ ମଧ୍ୟ ଅଭିଯୋଗ କରିଥିଲେ।
ବର୍ଦ୍ଧମାନ ଥାନା ପୁଲିସ ଏବଂ ରାଜ୍ୟ ସ୍ୱାସ୍ଥ୍ୟ ବିଭାଗର ମିଳିତ ତଦନ୍ତରୁ ଜଣାପଡ଼ିଥିଲା ଯେ, ଅସ୍ତ୍ରୋପଚାର କରିଥିବା ଶେଖ ସାଇଦୁଲଙ୍କ ପାଖରେ କୌଣସି ବୈଧ ମେଡିକାଲ୍ ଡିଗ୍ରୀ ନଥିଲା ଏବଂ ସେ ନକଲି ଡିଗ୍ରୀ ଆଧାରରେ ଡାକ୍ତରୀ କରୁଥିଲେ। ତାଙ୍କ ସୂଚନା ଆଧାରରେ ସ୍ୱାସ୍ଥ୍ୟ ବିଭାଗ ଅନ୍ୟ କେତେକ ସନ୍ଦିଗ୍ଧ ନକଲି ଡାକ୍ତରଙ୍କ ସମ୍ପର୍କରେ ମଧ୍ୟ ତଥ୍ୟ ପାଇଥିଲା। ଘଟଣା ପରେ ପ୍ରଶାସନ ଉକ୍ତ ନର୍ସିଂହୋମ୍କୁ ସିଲ୍ କରିଦେଇଥିଲା ଏବଂ ପୁଲିସ ଏହାର ଦୁଇଜଣ ପରିଚାଳକଙ୍କୁ ଗିରଫ କରିଥିଲା। ତେବେ ସାଇଦୁଲ ଫେରାର ହୋଇଯାଇଥିଲେ।
ତଦନ୍ତରୁ ଜଣାପଡ଼ିଥିଲା ଯେ, ଘଟଣା ପରେ ସାଇଦୁଲ ଗୁଲାବବାଗ ମୋଡ଼ ଅଞ୍ଚଳର ଏକ ସୋସାଇଟିରୁ ଜଣେ ନର୍ସିଂହୋମ୍ ମାଲିକଙ୍କ ସହାୟତାରେ ଦୁବାଇ ପଳାଇ ଯାଇଥିଲେ ଏବଂ ସେଠାରେ ‘ଭିସା ଅନ୍ ଆରାଇଭାଲ୍’ରେ ରହୁଥିଲେ। ସେ ଲଗାତାର ମୋବାଇଲ୍ ସିମ୍ ବଦଳାଇ ପତ୍ନୀଙ୍କ ସହ ଯୋଗାଯୋଗରେ ଥିଲେ ଏବଂ ତାଙ୍କୁ ମଧ୍ୟ ଦୁବାଇ ଡାକିବା ପାଇଁ ପ୍ରସ୍ତୁତି କରୁଥିଲେ। ପୁଲିସ ତାଙ୍କ ବିରୋଧରେ ଲୁକ୍ଆଉଟ୍ ସର୍କୁଲାର (ଏଲ୍ଓସି) ଜାରି କରିଥିଲା।
ମଙ୍ଗଳବାର ସାଇଦୁଲଙ୍କ ପତ୍ନୀ ନିର୍ଦ୍ଧାରିତ ଯୋଜନା ଅନୁଯାୟୀ ଦିଲ୍ଲୀରେ ପହଞ୍ଚିଥିଲେ। ତାଙ୍କୁ ନେବା ପାଇଁ ସାଇଦୁଲ ମଧ୍ୟ ଦୁବାଇରୁ ବିମାନ ଯୋଗେ ଦିଲ୍ଲୀ ବିମାନବନ୍ଦରରେ ପହଞ୍ଚିଥିଲେ। ଆବାସନ ଅଧିକାରୀ ଏବଂ ସ୍ଥାନୀୟ ପୁଲିସ ତାଙ୍କୁ ତୁରନ୍ତ ହେପାଜତକୁ ନେଇ ପୂର୍ବ ବର୍ଦ୍ଧମାନ ଜିଲ୍ଲା ପୁଲିସକୁ ସୂଚନା ଦେଇଥିଲେ। ତାଙ୍କୁ ବର୍ଦ୍ଧମାନର ସ୍ଥାନୀୟ ଅଦାଲତରେ ହାଜର କରାଯିବ।
ତାଙ୍କ ଗିରଫଦାରୀକୁ ନେଇ ସନ୍ତୋଷ ପ୍ରକାଶ କରି ମୃତ ଶିଶୁର ମା’ ଶିଳ୍ପା ରାୟ ପୁଲିସକୁ ଧନ୍ୟବାଦ ଜଣାଇଛନ୍ତି। ଅନ୍ୟ କୌଣସି ମା’ଙ୍କ କୋଳ ଏଭଳି ଶୂନ୍ୟ ନହେଉ, ସେଥିପାଇଁ ଦୋଷୀଙ୍କୁ ସବୁଠାରୁ କଠୋର ଦଣ୍ଡ ମିଳିବା ଉଚିତ ବୋଲି ସେ କହିଛନ୍ତି।
--------
ହିନ୍ଦୁସ୍ଥାନ ସମାଚାର / ସ୍ୱାଗତିକା
07 Oct 2026