ମୁମ୍ବାଇ, ଅକ୍ଟୋବର 7 (ହି.ସ)। ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ) ବୁଧବାର ବଢ଼ୁଥିବା ବିଶ୍ୱ ଅନିଶ୍ଚିତତା ମଧ୍ୟରେ ପ୍ରମୁଖ ନୀତିଗତ ସୁଧ ହାର ରେପୋ ରେଟ୍କୁ ପ୍ରାୟ ସାଢ଼େ ତିନି ବର୍ଷ ପରେ ୦.୨୫ ପ୍ରତିଶତ ବଢ଼ାଇ ୫.୫୦ ପ୍ରତିଶତ କରିଛି। ଏହା ସହିତ ଆରବିଆଇ ଚଳିତ ଆର୍ଥିକ ବର୍ଷ ପାଇଁ ଆର୍ଥିକ ଅଭିବୃଦ୍ଧି ହାରର ଅନୁମାନକୁ ୦.୪୦ ପ୍ରତିଶତ ବଢ଼ାଇ ୭.୧ ପ୍ରତିଶତ କରିଛି।
ଆରବିଆଇ ଗଭର୍ଣ୍ଣର ସଞ୍ଜୟ ମଲହୋତ୍ରା ସୋମବାରଠାରୁ ଆରମ୍ଭ ହୋଇଥିବା ତିନିଦିନିଆ ଦ୍ୱିମାସିକ ସମୀକ୍ଷା ବୈଠକରେ ମୁଦ୍ରାନୀତି କମିଟି (ଏମପିସି) ନେଇଥିବା ନିଷ୍ପତ୍ତି ସମ୍ପର୍କରେ ବୁଧବାର ସୂଚନା ଦେଇଛନ୍ତି। ସେ କହିଛନ୍ତି ଯେ, ବର୍ତ୍ତମାନର ବିଶ୍ୱ ପରିସ୍ଥିତିକୁ ବିଚାରକୁ ନେଇ ଏମପିସି ସର୍ବସମ୍ମତିକ୍ରମେ ରେପୋ ରେଟ୍କୁ ୦.୨୫ ପ୍ରତିଶତ ବଢ଼ାଇ ୫.୫୦ ପ୍ରତିଶତ କରିବାକୁ ନିଷ୍ପତ୍ତି ନେଇଛି। ଏହା ସହିତ ଏମପିସି ନିଜର ନୀତିଗତ ଆଭିମୁଖ୍ୟକୁ ‘ନିରପେକ୍ଷ’ରୁ ପରିବର୍ତ୍ତନ କରି ‘ଆବଶ୍ୟକତା ଅନୁଯାୟୀ କଠୋର’ କରିବାକୁ ନିଷ୍ପତ୍ତି ନେଇଛି।
ମଲହୋତ୍ରା କହିଛନ୍ତି ଯେ, ଚଳିତ ଆର୍ଥିକ ବର୍ଷ ୨୦୨୬-୨୭ ପାଇଁ ଆର୍ଥିକ ଅଭିବୃଦ୍ଧି ହାରର ଅନୁମାନକୁ ମଧ୍ୟ ବଢ଼ାଇ ୭.୧ ପ୍ରତିଶତ କରାଯାଇଛି, ଯାହା ପୂର୍ବରୁ ୬.୭ ପ୍ରତିଶତ ଥିଲା। ସେହିପରି ମୁଦ୍ରାସ୍ଫୀତିର ଅନୁମାନକୁ ୫ ପ୍ରତିଶତରୁ ବଢ଼ାଇ ୫.୧ ପ୍ରତିଶତ କରାଯାଇଛି। ସେ ଏହା ମଧ୍ୟ ସଙ୍କେତ ଦେଇଛନ୍ତି ଯେ, ଆଗାମୀ ଦିନରେ ନୀତିଗତ ସୁଧ ହାରରେ ଆଉ ହ୍ରାସର ସମ୍ଭାବନା ନାହିଁ। ଏଥିରେ ବୃଦ୍ଧି ହୋଇପାରେ କିମ୍ବା ଏହା ସ୍ଥିର ରହିପାରେ।
ରେପୋ ରେଟ୍ ହେଉଛି ସେହି ସୁଧ ହାର, ଯେଉଁ ହାରରେ ବାଣିଜ୍ୟିକ ବ୍ୟାଙ୍କଗୁଡ଼ିକ ନିଜର ତତ୍କାଳିକ ଆବଶ୍ୟକତା ପୂରଣ ପାଇଁ କେନ୍ଦ୍ରୀୟ ବ୍ୟାଙ୍କଠାରୁ ଋଣ ନିଅନ୍ତି। ଆରବିଆଇ ରେପୋ ରେଟ୍ ବଢ଼ାଇବା ଫଳରେ ଗୃହ, ଯାନବାହନ ଏବଂ ବାଣିଜ୍ୟିକ ଋଣର ମାସିକ କିସ୍ତି ବଢ଼ିପାରେ।
ଉଲ୍ଲେଖଯୋଗ୍ୟ ଯେ, ଫେବ୍ରୁଆରୀ ୨୦୨୩ ପରେ ଏହା ପ୍ରଥମ ଥର, ଯେତେବେଳେ ନୀତିଗତ ସୁଧ ହାର ବୃଦ୍ଧି କରାଯାଇଛି। ଏହା ପୂର୍ବରୁ ଗତବର୍ଷ ଫେବ୍ରୁଆରୀରୁ ଡିସେମ୍ବର ୨୦୨୫ ପର୍ଯ୍ୟନ୍ତ ରେପୋ ରେଟ୍ରେ ମୋଟ ୧.୨୫ ପ୍ରତିଶତ ହ୍ରାସ କରାଯାଇଥିଲା। ଚଳିତ ବର୍ଷ ଫେବ୍ରୁଆରୀ, ଏପ୍ରିଲ, ଜୁନ୍ ଏବଂ ଅଗଷ୍ଟରେ ହୋଇଥିବା ଦ୍ୱିମାସିକ ମୁଦ୍ରାନୀତି ସମୀକ୍ଷା ବୈଠକରେ ନୀତିଗତ ସୁଧ ହାରରେ କୌଣସି ପରିବର୍ତ୍ତନ କରାଯାଇନଥିଲା।
--------
ହିନ୍ଦୁସ୍ଥାନ ସମାଚାର / ସ୍ୱାଗତିକା
07 Oct 2026