ମୁମ୍ବାଇ, ୮ ଅକ୍ଟୋବର (ହି.ସ.)। ବଲିଉଡ୍ର ବରିଷ୍ଠ ଅଭିନେତା ନାନା ପାଟେକରଙ୍କ ଅନ୍ତିମ ସଂସ୍କାର ମହାରାଷ୍ଟ୍ରର ପୁଣେ ଜିଲ୍ଲା ଡୋଞ୍ଜେସ୍ଥିତ ତାଙ୍କ ଫାର୍ମହାଉସରେ କରାଯିବ। ତାଙ୍କୁ ରାଜକୀୟ ସମ୍ମାନ ସହ ଅନ୍ତିମ ବିଦାୟ ଦିଆଯିବ। ଏହି ଫାର୍ମହାଉସରେ ହିଁ ନାନା ପାଟେକରଙ୍କ ପାର୍ଥିବ ଶରୀରକୁ ଶେଷ ଦର୍ଶନ ପାଇଁ ରଖାଯିବ।
ନାନାଙ୍କ ଘନିଷ୍ଠ ବନ୍ଧୁ ଗଣେଶ ଥୋରାଟ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ଅଭିନେତାଙ୍କ ପାର୍ଥିବ ଶରୀର ଗୁରୁବାର ଗୋଆରୁ ପୁଣେ ଅଣାଯିବ। ଏହା ପରେ ଅପରାହ୍ଣ ପ୍ରାୟ ୪ଟାରେ ତାଙ୍କ ଫାର୍ମହାଉସରେ ଅନ୍ତିମ ସଂସ୍କାର କରାଯିବ। ପୁଣେ ସହରର ବାହାର ଅଞ୍ଚଳରେ ନାନାଙ୍କ ଏହି ଫାର୍ମହାଉସ ଅବସ୍ଥିତ।
ରାଜକୀୟ ସମ୍ମାନ ସହ ଦିଆଯିବ ଅନ୍ତିମ ବିଦାୟ
ନାନା ପାଟେକରଙ୍କୁ ରାଜକୀୟ ସମ୍ମାନ ସହ ଅନ୍ତିମ ବିଦାୟ ଦିଆଯିବ। ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସ ନାନାଙ୍କ ପୁଅ ମଲ୍ହାର ପାଟେକରଙ୍କ ସହ ଫୋନରେ କଥା ହୋଇ ଶୋକ ପ୍ରକାଶ କରିଛନ୍ତି। ସରକାରଙ୍କ ପକ୍ଷରୁ ରାଜକୀୟ ସମ୍ମାନ ସହ ଅନ୍ତିମ ସଂସ୍କାର ପାଇଁ ଆବଶ୍ୟକ ପ୍ରସ୍ତୁତି ସମ୍ପର୍କରେ ପରିବାରକୁ ଅବଗତ କରାଯାଇଥିବା ଜଣାପଡ଼ିଛି।
ମରାଠୀ ରଙ୍ଗମଞ୍ଚ ସହିତ ହିନ୍ଦୀ ଓ ମରାଠୀ ସିନେମା ପ୍ରତି ନାନା ପାଟେକରଙ୍କ ଅବଦାନକୁ ସମ୍ମାନ ଜଣାଇ ତାଙ୍କୁ ଏହି ରାଜକୀୟ ସମ୍ମାନ ଦିଆଯାଉଛି।
ଘରେ ଅଚେତ ଅବସ୍ଥାରେ ମିଳିଥିଲେ ନାନା
ନାନା ପାଟେକରଙ୍କ ପୁଅ ମଲ୍ହାର ପାଟେକର କହିଛନ୍ତି ଯେ ଗୋଆସ୍ଥିତ ନିଜ ଘରେ ନାନାଙ୍କୁ ଅଚେତ ଅବସ୍ଥାରେ ଦେଖିବାକୁ ମିଳିଥିଲା। ଏହା ପରେ ତାଙ୍କୁ ତୁରନ୍ତ ମଣିପାଲ ହସ୍ପିଟାଲକୁ ନିଆଯାଇଥିଲା। ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ପ୍ରାଥମିକ ସୂଚନା ଅନୁସାରେ, ହୃଦ୍ଘାତ ଯୋଗୁଁ ନାନା ପାଟେକରଙ୍କ ମୃତ୍ୟୁ ହୋଇଥିବା କୁହାଯାଉଛି।
ହସ୍ପିଟାଲ ସହ ସମ୍ପୃକ୍ତ ଜଣେ ଡାକ୍ତରଙ୍କ ଅନୁସାରେ, ନାନା ପ୍ରାୟ ରାତି ୨ଟା୩୦ ସମୟରେ ଜଣେ ବନ୍ଧୁଙ୍କୁ ବାର୍ତ୍ତା ପଠାଇ ନିଜ ଦେହ ଅସୁସ୍ଥ ଥିବା ଜଣାଇଥିଲେ। ବିଳମ୍ବିତ ରାତି ହୋଇଥିବାରୁ ବନ୍ଧୁ ତୁରନ୍ତ ସେହି ବାର୍ତ୍ତା ଦେଖିପାରିନଥିଲେ। ପରେ ସେ ନାନାଙ୍କ ସହ ଯୋଗାଯୋଗ କରି ପ୍ରାୟ ୪ଟା ସମୟରେ ତାଙ୍କ ଘରେ ପହଞ୍ଚିଥିଲେ।
ସେତେବେଳେ ନାନାଙ୍କୁ ଅତ୍ୟଧିକ ଝାଳ ବାହାରୁଥିଲା ଏବଂ ତାଙ୍କ ଅବସ୍ଥା ଧୀରେ ଧୀରେ ଗୁରୁତର ହେଉଥିଲା। ସେ ଅଚେତ ହେବାକୁ ଲାଗିଥିଲେ। ଏହା ପରେ କେୟାରଟେକରଙ୍କୁ ହସ୍ପିଟାଲ ପଠାଯାଇଥିଲା ଏବଂ ପରେ ଆମ୍ବୁଲାନ୍ସ ଯୋଗେ ନାନାଙ୍କୁ ହସ୍ପିଟାଲ ନିଆଯାଇଥିଲା। ଡାକ୍ତରମାନେ ତାଙ୍କୁ ବଞ୍ଚାଇବା ପାଇଁ ସମସ୍ତ ପ୍ରୟାସ କରିଥିଲେ, କିନ୍ତୁ ତାଙ୍କ ଅବସ୍ଥାରେ ସୁଧାର ଆସିନଥିଲା।
ବରିଷ୍ଠ ଅଭିନେତା ନାନା ପାଟେକରଙ୍କ ମୃତ୍ୟୁ ଖବର ପ୍ରକାଶ ପାଇବା ପରେ ହିନ୍ଦୀ ଓ ମରାଠୀ ଫିଲ୍ମ ଜଗତରେ ଶୋକର ଛାୟା ଖେଳିଯାଇଛି। ୭୫ ବର୍ଷୀୟ ନାନା ବୁଧବାର ବିଳମ୍ବିତ ରାତି ପରେ ଗୋଆସ୍ଥିତ ନିଜ ବାସଭବନରେ ଶେଷ ନିଃଶ୍ୱାସ ତ୍ୟାଗ କରିଥିଲେ। ତାଙ୍କ ପୁଅ ମଲ୍ହାର ପାଟେକର ମୃତ୍ୟୁ ଖବର ନିଶ୍ଚିତ କରିଛନ୍ତି। ଖବର ପ୍ରକାଶ ପାଇବା ପରେ ଫିଲ୍ମ ଜଗତର ବହୁ ବ୍ୟକ୍ତିତ୍ୱ ଓ ପ୍ରଶଂସକ ସୋସିଆଲ ମିଡିଆରେ ଶୋକ ପ୍ରକାଶ କରିବା ସହ ନାନାଙ୍କୁ ସ୍ମରଣ କରିଛନ୍ତି।
ଅଭିନୟର ବିଭିନ୍ନ ଧାରାରେ ଛାପ ଛାଡ଼ିଥିଲେ
ନାନା ପାଟେକର ଦୀର୍ଘ ଚଳଚ୍ଚିତ୍ର ଜୀବନରେ ଅନେକ ସ୍ମରଣୀୟ ଚରିତ୍ରରେ ଅଭିନୟ କରିଥିଲେ। ଗମ୍ଭୀର ଭୂମିକାଠାରୁ ଆରମ୍ଭ କରି ଖଳନାୟକ ଓ ହାସ୍ୟରସାତ୍ମକ ଚରିତ୍ର ପର୍ଯ୍ୟନ୍ତ ପ୍ରତ୍ୟେକ ଭୂମିକାରେ ସେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ତାଙ୍କ ସଂଳାପ ପ୍ରଦାନର ଶୈଳୀ, ସ୍ୱର ଏବଂ ଅଭିନୟର ବିଶିଷ୍ଟ ଅନ୍ଦାଜ ସର୍ବଦା ଦର୍ଶକଙ୍କ ମଧ୍ୟରେ ବିଶେଷ ଆକର୍ଷଣର କେନ୍ଦ୍ର ରହିଥିଲା।
‘ଓ ରୋମିଓ’ରେ ଶେଷଥର ନଜର ଆସିଥିଲେ
ନାନାଙ୍କ ସଦ୍ୟ ମୁକ୍ତିପ୍ରାପ୍ତ ଚଳଚ୍ଚିତ୍ର ବିଷୟରେ କହିଲେ, ବିଶାଳ ଭାରଦ୍ୱାଜଙ୍କ ନିର୍ଦ୍ଦେଶିତ ‘ଓ ରୋମିଓ’ରେ ସେ ନଜର ଆସିଥିଲେ। ଏହି ଚଳଚ୍ଚିତ୍ରରେ ତାଙ୍କ ସହ ଶାହିଦ କପୁର, ତୃପ୍ତି ଡିମ୍ରି ଏବଂ ଫରିଦା ଜଲାଲ ପ୍ରମୁଖ ଭୂମିକାରେ ଥିଲେ। ଚଳିତ ବର୍ଷ ଫେବ୍ରୁଆରୀରେ ମୁକ୍ତିଲାଭ କରିଥିବା ଏହି ଚଳଚ୍ଚିତ୍ରରେ ନାନାଙ୍କ ଅଭିନୟକୁ ଦର୍ଶକମାନେ ପସନ୍ଦ କରିଥିଲେ। ଏହା ପୂର୍ବରୁ ସେ ‘ହାଉସଫୁଲ୍ ୫’ରେ ମଧ୍ୟ ନଜର ଆସିଥିଲେ। ଏହି ଫିଲ୍ମରେ ତାଙ୍କ ପ୍ରବେଶ ଏବଂ ନୃତ୍ୟ ଦୃଶ୍ୟ ଦର୍ଶକଙ୍କ ବିଶେଷ ଦୃଷ୍ଟି ଆକର୍ଷଣ କରିଥିଲା।
ରଙ୍ଗମଞ୍ଚରୁ ସିନେମା ପର୍ଯ୍ୟନ୍ତ ଗଢ଼ିଥିଲେ ସ୍ୱତନ୍ତ୍ର ପରିଚୟ
ନାନା ପାଟେକର ରଙ୍ଗମଞ୍ଚରୁ ନିଜ ଅଭିନୟ ଯାତ୍ରା ଆରମ୍ଭ କରି ପରବର୍ତ୍ତୀ ସମୟରେ ହିନ୍ଦୀ ଓ ମରାଠୀ ସିନେମାର ଜଣେ ବିଶିଷ୍ଟ କଳାକାର ଭାବେ ପରିଚିତ ହୋଇଥିଲେ। ଅଭିନୟ ସହିତ ସେ ନିର୍ଦ୍ଦେଶନା ଓ ଲେଖନ କ୍ଷେତ୍ରରେ ମଧ୍ୟ କାମ କରିଥିଲେ। ଉତ୍କୃଷ୍ଟ ଅଭିନୟ ପାଇଁ ସେ ତିନିଥର ଜାତୀୟ ଚଳଚ୍ଚିତ୍ର ପୁରସ୍କାର ସମେତ ଅନେକ ପ୍ରତିଷ୍ଠିତ ସମ୍ମାନ ପାଇଥିଲେ। ୨୦୧୩ରେ ତାଙ୍କୁ ପଦ୍ମଶ୍ରୀରେ ସମ୍ମାନିତ କରାଯାଇଥିଲା।
ଛାଡ଼ିଗଲେ ଅନେକ ସ୍ମରଣୀୟ ଚରିତ୍ର
ନାନା ପାଟେକରଙ୍କ ପରଲୋକ ସହ ହିନ୍ଦୀ ଓ ମରାଠୀ ସିନେମା ଏପରି ଜଣେ ଦକ୍ଷ କଳାକାରଙ୍କୁ ହରାଇଛି, ଯିଏ ଦଶନ୍ଧି ଧରି ନିଜ ଅଭିନୟ ମାଧ୍ୟମରେ ଦର୍ଶକଙ୍କ ହୃଦୟରେ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିଲେ। ‘ପରିନ୍ଦା’, ‘କ୍ରାନ୍ତିବୀର’, ‘ଅଗ୍ନିସାକ୍ଷୀ’, ‘ଅବ ତକ୍ ଛପ୍ପନ’, ‘ୱେଲକମ୍’ ଏବଂ ‘ନଟସମ୍ରାଟ’ ଭଳି ଚଳଚ୍ଚିତ୍ରରେ ତାଙ୍କ ସ୍ମରଣୀୟ ଚରିତ୍ର ସର୍ବଦା ମନେ ରହିବ। ତାଙ୍କ ମୃତ୍ୟୁରେ ଫିଲ୍ମ ଜଗତରେ ଶୋକର ଛାୟା ଖେଳିଯାଇଥିବା ବେଳେ ବହୁ କଳାକାର ତାଙ୍କ ସ୍ମୃତିଚାରଣ କରି ଶ୍ରଦ୍ଧାଞ୍ଜଳି ଜଣାଇଛନ୍ତି।
ହିନ୍ଦୁସ୍ଥାନ ସମାଚାର / ସମନ୍ୱୟ
