ନୂଆଦିଲ୍ଲୀ, ୦୮ ଅକ୍ଟୋବର (ହି.ସ.)- ଔଷଧ ବିକ୍ରିକୁ ପ୍ରୋତ୍ସାହନ ଦେବା ପାଇଁ ଫାର୍ମା କମ୍ପାନୀଗୁଡ଼ିକ ପକ୍ଷରୁ ଡାକ୍ତରମାନଙ୍କୁ ମହଙ୍ଗା ଉପହାର ଏବଂ ସୁବିଧା ଦେବାର ପ୍ରଥା ଉପରେ ରୋକ ଲଗାଇବା ପାଇଁ କେନ୍ଦ୍ର ସରକାରଙ୍କୁ ଏକ ବିଶେଷ କମିଟି ଗଠନ କରିବାକୁ ସର୍ବୋଚ୍ଚ ନ୍ୟାୟାଳୟ ଆଦେଶ ଦେଇଛନ୍ତି। ଏହି ଆଦେଶ ଗୁରୁବାର ଜଷ୍ଟିସ ବିକ୍ରମ ନାଥ ଏବଂ ଜଷ୍ଟିସ ସନ୍ଦୀପ ମେହତାଙ୍କ ବେଂଚ ଫେଡେରେସନ ଅଫ ମେଡିକାଲ ଆଣ୍ଡ ସେଲ୍ସ ରିପ୍ରେଜେଂଟେଟିଭ୍ସ ଆସୋସିଏସନ୍ସ ଅଫ ଇଣ୍ଡିଆ (ଏଫଏମଆରଏଆଇ)ର ଯାଚିକା ଉପରେ ଶୁଣାଣି ସମୟରେ ଦେଇଛନ୍ତି। ମାମଲାର ପରବର୍ତୀ ଶୁଣାଣି ୨୯ ଜାନୁଆରୀ, ୨୦୨୭ରେ ହେବ।

ଶୁଣାଣି ସମୟରେ ନ୍ୟାୟାଳୟ କେନ୍ଦ୍ର ସରକାରଙ୍କୁ ତିନି ସଦସ୍ୟ ବିଶିଷ୍ଟ ଏକ କମିଟି ଗଠନ କରିବାକୁ ଆଦେଶ ଦେଇଛନ୍ତି। ଫାର୍ମାସ୍ୟୁଟିକାଲ କମ୍ପାନୀଗୁଡ଼ିକର ମାର୍କେଟିଂ ପଦ୍ଧତିକୁ ନିୟନ୍ତ୍ରଣ କରିବା ପାଇଁ ଏକ ଆଇନଗତ ଢାଂଚା ପ୍ରସ୍ତୁତ କରିବାର ଆବଶ୍ୟକତା ଅଛି କି ନାହିଁ, କମିଟି ତାହାର ସମୀକ୍ଷା କରିବ। ଏହି ମାମଲାରେ ସାଧାରଣ ଜନତା, ଡାକ୍ତର, ବିଶେଷଜ୍ଞ ଏବଂ ସମ୍ପୃକ୍ତ ସଂସ୍ଥାଗୁଡ଼ିକ ପକ୍ଷରୁ ଦିଆଯାଇଥିବା ପରାମର୍ଶ ଏବଂ ଆପତି ଉପରେ ବିଚାର କରିବା ପରେ କମିଟି ନିଜ ସୁପାରିଶ ସରକାରଙ୍କୁ ଦେବ। ନ୍ୟାୟାଳୟ କେନ୍ଦ୍ର ସରକାରଙ୍କୁ ଆଦେଶ ଉପରେ କରାଯାଇଥିବା କାର୍ଯ୍ୟାନୁଷ୍ଠାନ ସମ୍ପର୍କରେ ଅନୁପାଳନ ହଲଫନାମା ଦାଖଲ କରିବାକୁ କହିଛନ୍ତି।

ଏଫଏମଆରଏଆଇର ଯାଚିକାରେ ଦାବି କରାଯାଇଛି ଯେ ମହଙ୍ଗା ଉପହାର ପାଇଁ ଫାର୍ମା କମ୍ପାନୀଗୁଡ଼ିକୁ ମଧ୍ୟ ଦାୟୀ କରାଯାଉ। ଆବାଦନରେ ଅଭିଯୋଗ କରାଯାଇଛି ଯେ ଔଷଧ କମ୍ପାନୀଗୁଡ଼ିକ ଡାକ୍ତରମାନଙ୍କୁ ପ୍ରଭାବିତ କରିବା ପାଇଁ ମହଙ୍ଗା ଉପହାର, ବିଦେଶ ଯାତ୍ରା ଏବଂ ଅନ୍ୟାନ୍ୟ ସୁବିଧା ଦେଇଥାନ୍ତି। ଏହା ପୂର୍ବରୁ ଅନ୍ୟ ଏକ ଆବାଦନରେ ଶୁଣାଣି କରିବା ସମୟରେ ସର୍ବୋଚ୍ଚ ନ୍ୟାୟାଳୟ କହିଥିଲେ ଯେ ଡାକ୍ତରମାନଙ୍କୁ ମହଙ୍ଗା ଉପହାର ଦେବା ଆଇନସମ୍ମତ ନୁହେଁ। ନ୍ୟାୟାଳୟ କହିଥିଲେ ଯେ ଫାର୍ମା କମ୍ପାନୀଗୁଡ଼ିକ ଡାକ୍ତରମାନଙ୍କୁ ମହଙ୍ଗା ଉପହାର ଦେଇ ଆଇନରୁ ଖସିପାରିବେ ନାହିଁ।

-------------------

ହିନ୍ଦୁସ୍ଥାନ ସମାଚାର / ଗଗନ