ନୂଆଦିଲ୍ଲୀ, ଅକ୍ଟୋବର ୯ (ହି.ସ.) - ନିର୍ବାଚନ ଆୟୋଗଙ୍କ ବିରୋଧରେ ନିର୍ବାଚନ ରୋଲ୍ (ଏସ୍. ଆଇ. ଆର) ର ସ୍ୱତନ୍ତ୍ର ଇଂଟେନ୍ସିଭ୍ ରିଭିସନ୍ ଏବଂ ଭୋଟ୍ ଚୋରି' ପ୍ରସଙ୍ଗରେ ଅନେକ ଦିନ ଧରି ବିରୋଧ କରୁଥିବା ବିରୋଧୀ ଇଣ୍ଡି ଆଲାଏନ୍ସକୁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିବାକୁ ଅନୁମତି ଦିଆଯାଇଛି। ଶୁକ୍ରବାର ରାତି ୮ଟାରେ ବିରୋଧୀ ଦଳର ୧୦ ଜଣ ସାଂସଦଙ୍କ ଏକ ପ୍ରତିନିଧି ଦଳ ରାଷ୍ଟ୍ରପତିଙ୍କୁ ଭେଟିବେ। ରାଷ୍ଟ୍ରପତିଙ୍କୁ ଭେଟିବା ପୂର୍ବରୁ ବିରୋଧୀ ସାଂସଦମାନେ ସମ୍ବିଧାନ ସଭାର କେନ୍ଦ୍ରୀୟ କକ୍ଷ (ପୁରୁଣା ସଂସଦ ଭବନ) ରେ ଏକତ୍ରିତ ହୋଇ ଆଗକୁ ଏକ ମିଳିତ ରଣନୀତି ପ୍ରସ୍ତୁତ କରିବେ। ସଂଗଠନ ଦାୟିତ୍ୱରେ ଥିବା କଂଗ୍ରେସ ସାଧାରଣ ସମ୍ପାଦକ କେ. ସି. ଭେନୁଗୋପାଳ ଶୁକ୍ରବାର କହିଛନ୍ତି ଯେ ରାଷ୍ଟ୍ରପତିଙ୍କ ସହ ବୈଠକ ପାଇଁ ବିରୋଧୀ ଦଳଗୁଡ଼ିକର ପ୍ରଥମ ଅନୁରୋଧ ପତ୍ର ଅକ୍ଟୋବର ୨ ରେ ପଠାଯାଇଥିଲା। ଅକ୍ଟୋବର ୫ ତାରିଖରେ ନେତାମାନଙ୍କ ନାମ ପଠାଇବା ପରେ ଶୁକ୍ରବାର ରାତି ୮ଟାରେ ସମୟ ସ୍ଥିର କରାଯାଇଥିଲା। ଏହି ସମୟରେ ବିରୋଧୀ ଦଳର ନେତାମାନେ ଭୋଟର ତାଲିକା ସଂଶୋଧନ ପ୍ରକ୍ରିୟାରେ ହୋଇଥିବା ଅନିୟମିତତା ଏବଂ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ନିଜର ଗୁରୁତର ଆପତି ରାଷ୍ଟ୍ରପତିଙ୍କ ସମ୍ମୁଖରେ ଉପସ୍ଥାପନ କରିବେ। ଅକ୍ଟୋବର ୬ ରେ ବିରୋଧୀ ମେଂଟ ନିର୍ବାଚନ ସଦନକୁ ପଦଯାତ୍ରା କରି ଆନ୍ଦୋଳନକୁ ତୀବ୍ର କରିଥିଲା, ଯେଉଁଠାରେ ପୋଲିସ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ସମେତ ଅନେକ ନେତାଙ୍କୁ ଅଟକ ରଖିଥିଲା। ପରଦିନ ସାଂସଦମାନେ ଜନ୍ତର ମନ୍ତର ଅଭିମୁଖେ ପଦଯାତ୍ରା କରିବାକୁ ଉଦ୍ୟମ କରିଥିଲେ, ଯାହାକୁ ପୋଲିସ୍ ବ୍ୟାରିକେଡିଂ ଦ୍ୱାରା ଅଟକାଇ ଦିଆଯାଇଥିଲା। ଗୁରୁବାର ଦିନ ବିରୋଧୀ ସାଂସଦମାନେ ମହାତ୍ମା ଗାନ୍ଧୀଙ୍କ ସମାଧି ରାଜଘାଟରେ ଶାନ୍ତିପୂର୍ଣ୍ଣ ଧାରଣାରେ ବସିଥିଲେ। ଏହି ମେଂଟ ଏହି ପ୍ରସଙ୍ଗରେ ବିଭିନ୍ନ ରାଜ୍ୟରେ ରାଲି କରିବାକୁ ଏବଂ ଗଣତନ୍ତ୍ର ବଂଚାଅ ପଦଯାତ୍ରା କରିବାକୁ ନିଷ୍ପତି ନେଇଛି।

ହିନ୍ଦୁସ୍ଥାନ ସମାଚାର / ଭାନୁ ଚରଣ