ଜେୱର ବିମାନବନ୍ଦରର ନାମ ବଦଳି ନରେନ୍ଦ୍ର ମୋଦୀ ଇଣ୍ଟରନ୍ୟାସନାଲ୍ ଏୟାରପୋର୍ଟ ହେବ: ଉତ୍ତରପ୍ରଦେଶ କ୍ୟାବିନେଟ୍ର ନିଷ୍ପତ୍ତି

ଲକ୍ଷ୍ନୌ, ୦୯ ଅକ୍ଟୋବର (ହି.ସ.)। ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଅଧ୍ୟକ୍ଷତାରେ ଶୁକ୍ରବାର ଉତ୍ତରପ୍ରଦେଶ କ୍ୟାବିନେଟ୍ର ବୈଠକ ଅନୁଷ୍ଠିତ ହୋଇଥିଲା। ଏଥିରେ ଜେୱର ବିମାନବନ୍ଦରର ନାମ ପରିବର୍ତ୍ତନ ପ୍ରସ୍ତାବକୁ ଅନୁମୋଦନ ମିଳିଛି। ମୁଖ୍ୟମନ୍ତ୍ରୀ କହିଛନ୍ତି ଯେ, ଜେୱର ବିମାନବନ୍ଦରର ନାମ ପରିବର୍ତ୍ତନ କରି ନରେନ୍ଦ୍ର ମୋଦୀ ଇଣ୍ଟରନ୍ୟାସନାଲ୍ ଏୟାରପୋର୍ଟ ରଖାଯାଇଛି।

ଆଜି ଲୋକଭବନରେ ଆୟୋଜିତ କ୍ୟାବିନେଟ୍ ବୈଠକ ପରେ ମିଡିଆ ସେଣ୍ଟରରେ ସାମ୍ବାଦିକମାନଙ୍କୁ ସମ୍ବୋଧିତ କରି ମୁଖ୍ୟମନ୍ତ୍ରୀ କହିଥିଲେ ଯେ, ମନ୍ତ୍ରିପରିଷଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସେବା କାର୍ଯ୍ୟକୁ ହୃଦୟରୁ ଅଭିନନ୍ଦନ ଜଣାଉଛି। ସେ ଉତ୍ତରପ୍ରଦେଶରୁ ଜନପ୍ରତିନିଧି ଭାବେ ନିର୍ବାଚିତ ହୋଇ ଦେଶର ନେତୃତ୍ୱ ନେଉଛନ୍ତି। କ୍ୟାବିନେଟ୍ ଜେୱର ବିମାନବନ୍ଦରର ନାମ ପରିବର୍ତ୍ତନ କରି ନରେନ୍ଦ୍ର ମୋଦୀ ଏୟାରପୋର୍ଟ ରଖିବା ପ୍ରସ୍ତାବକୁ ମଞ୍ଜୁରୀ ଦେଇଛି।

ମୁଖ୍ୟମନ୍ତ୍ରୀ କହିଥିଲେ ଯେ, ପ୍ରଧାନମନ୍ତ୍ରୀ ମୋଦୀ ଓ ଉତ୍ତରପ୍ରଦେଶ ମଧ୍ୟରେ ସମ୍ପର୍କ ଅତ୍ୟନ୍ତ ଆତ୍ମୀୟ। କାଶୀ ଓ ମା’ ଗଙ୍ଗାଙ୍କଠାରୁ ଆରମ୍ଭ ହୋଇଥିବା ଏହି ଆତ୍ମୀୟ ସମ୍ପର୍କ ସମୟ ସହିତ ଆହୁରି ଗଭୀର ହୋଇଛି ଏବଂ ଆଜି ଏହା ରାଜ୍ୟର ସର୍ବାଙ୍ଗୀଣ ପରିବର୍ତ୍ତନର ଆଧାର ପାଲଟିଛି। କେନ୍ଦ୍ର ଓ ରାଜ୍ୟର ମିଳିତ ସଂକଳ୍ପ ଏବଂ ‘ଟିମ୍ ଇଣ୍ଡିଆ’ ଭାବନା ସହିତ ଉତ୍ତରପ୍ରଦେଶ ଅଭୂତପୂର୍ବ ପ୍ରଗତି ପଥରେ ଆଗକୁ ବଢ଼ୁଛି।

କ୍ୟାବିନେଟ୍ ବୈଠକରେ ଉତ୍ତରପ୍ରଦେଶର ଶିଳ୍ପ ବିକାଶ ପ୍ରାଧିକରଣଗୁଡ଼ିକ ପାଇଁ ମଡେଲ୍ ବିଲ୍ଡିଂ ନିୟମାବଳୀ, ୨୦୨୬ କାର୍ଯ୍ୟକାରୀ କରିବା ସମ୍ପର୍କିତ ପ୍ରସ୍ତାବକୁ ମଧ୍ୟ ଅନୁମୋଦନ ମିଳିଛି।

ଏହା ବ୍ୟତୀତ ଖରିଫ ବିପଣନ ବର୍ଷ ୨୦୨୬-୨୭ରେ ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି) ଯୋଜନା ଅଧୀନରେ ଧାନ କ୍ରୟ ନୀତି ନିର୍ଦ୍ଧାରଣ, ଉତ୍ତରପ୍ରଦେଶ ଷ୍ଟାର୍ଟଅପ୍ କ୍ରୟ ଯୋଜନା-୨୦୨୬, ଉତ୍ତରପ୍ରଦେଶ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ମିଶନ୍ ପ୍ରତିଷ୍ଠା ଏବଂ ଭଦୋହି ଜିଲ୍ଲାର ନାମ ପରିବର୍ତ୍ତନ କରି ‘ସନ୍ଥ ରବିଦାସନଗର ଭଦୋହି’ ରଖିବା ସମ୍ପର୍କିତ ପ୍ରସ୍ତାବକୁ ମଞ୍ଜୁରୀ ମିଳିଛି। ଏଥିସହ ‘ଉତ୍ତରପ୍ରଦେଶ ସୁଧ ଛାଡ଼ ଯୋଜନା-୨୦୨୬’ ଲାଗୁ କରିବା ପ୍ରସ୍ତାବକୁ ମଧ୍ୟ କ୍ୟାବିନେଟ୍ ଅନୁମୋଦନ କରିଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା