ନୂଆଦିଲ୍ଲୀ, ୧୦ ନଭେମ୍ବର (ହି.ସ.)। କଂଗ୍ରେସ ପକ୍ଷରୁ ନଭେମ୍ବର ୧୩ ଓ ୧୪ ତାରିଖରେ ହାଇଦ୍ରାବାଦରେ ‘ଭାରତ ସମିଟ୍’ ଆୟୋଜନ କରାଯିବ। ଏଥିରେ ୭୦ଟି ଦେଶର ପ୍ରାୟ ଏକ ହଜାର ପ୍ରତିନିଧି ଅଂଶଗ୍ରହଣ କରିବେ। ଏମାନଙ୍କ ମଧ୍ୟରେ ନୀତି ନିର୍ଦ୍ଧାରକ ଏବଂ ବିଭିନ୍ନ ଦେଶର ପ୍ରଗତିଶୀଳ ଆନ୍ଦୋଳନ ସହ ଜଡ଼ିତ ପ୍ରମୁଖ ନେତାମାନେ ସାମିଲ ହେବେ। ଏହି ସମ୍ମିଳନୀରେ ନୂତନ ବିଶ୍ୱ ବ୍ୟବସ୍ଥା, ଭୂ-ରାଜନୈତିକ ପରିବର୍ତ୍ତନ, ଜଳବାୟୁ ପରିବର୍ତ୍ତନ, ଗଣମାଧ୍ୟମର ଭୂମିକା ଏବଂ ସୂଚନାର ବିଶ୍ୱସନୀୟତା ସମେତ ବିଭିନ୍ନ ପ୍ରସଙ୍ଗରେ ଆଲୋଚନା ହେବ।
ପୂର୍ବତନ ବୈଦେଶିକ ମନ୍ତ୍ରୀ ତଥା କଂଗ୍ରେସର ବୈଦେଶିକ ବିଭାଗ ଅଧ୍ୟକ୍ଷ ସଲମାନ ଖୁର୍ସିଦ ମଙ୍ଗଳବାର ଏଠାରେ କଂଗ୍ରେସ ମୁଖ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଦୁଇଟି ଗୁରୁତ୍ୱପୂର୍ଣ୍ଣ ଅବସରକୁ ଦୃଷ୍ଟିରେ ରଖି ଏହି ସମ୍ମିଳନୀ ଆୟୋଜନ କରାଯାଉଛି। ଏଥିରେ ପଣ୍ଡିତ ଜବାହରଲାଲ ନେହେରୁଙ୍କ ୧୩୭ତମ ଜୟନ୍ତୀ ଏବଂ ଭାରତର ସ୍ୱାଧୀନତାର ୮୦ ବର୍ଷ ପୂର୍ତ୍ତି ସାମିଲ ରହିଛି। ସେ କହିଛନ୍ତି ଯେ, ନେହେରୁଙ୍କ ବିଚାରଧାରା ଆଜି ମଧ୍ୟ କଂଗ୍ରେସର ବୈଦେଶିକ ନୀତି ଏବଂ ଦୃଷ୍ଟିକୋଣ ପାଇଁ ପ୍ରେରଣା ଯୋଗାଉଛି। ଭାରତ ଏବଂ ବିଶ୍ୱର ଭବିଷ୍ୟତ ତଥା ନୂତନ ବିଶ୍ୱ ବ୍ୟବସ୍ଥା ସମ୍ପର୍କରେ ରାହୁଲ ଗାନ୍ଧୀଙ୍କ ପରିକଳ୍ପନା ଉପରେ ବିଚାରବିମର୍ଶ କରିବା ଏହି ସମ୍ମିଳନୀର ଉଦ୍ଦେଶ୍ୟ। ଏଥିରେ ୧୨ଟି ଅନ୍ତର୍ଜାତୀୟ ଅଧିବେଶନ ଏବଂ ତେଲେଙ୍ଗାନାକୁ କେନ୍ଦ୍ର କରି ୮ଟି ଅଧିବେଶନ ଆୟୋଜିତ ହେବ।
ତେଲେଙ୍ଗାନାର ସୂଚନା ପ୍ରଯୁକ୍ତିବିଦ୍ୟା, ଇଲେକ୍ଟ୍ରୋନିକ୍ସ ଓ ଯୋଗାଯୋଗ, ଶିଳ୍ପ ଓ ବାଣିଜ୍ୟ ତଥା ବିଧାନ ବ୍ୟାପାର ମନ୍ତ୍ରୀ ଶ୍ରୀଧର ବାବୁ ଦୁଡ୍ଡିଲ୍ଲା କହିଛନ୍ତି ଯେ, ବିଭିନ୍ନ ଦେଶରୁ ଆସୁଥିବା ପ୍ରତିନିଧିମାନଙ୍କ ମଧ୍ୟରେ ହେବାକୁ ଥିବା ଆଲୋଚନା ଦ୍ୱାରା ତେଲେଙ୍ଗାନାର ଶାସନ ବ୍ୟବସ୍ଥା ଏବଂ ଜନସାଧାରଣ ଉପକୃତ ହେବେ। ଅନ୍ତର୍ଜାତୀୟ ଅଧିବେଶନଗୁଡ଼ିକ ହାଇଦ୍ରାବାଦ ଇଣ୍ଟରନ୍ୟାସନାଲ କନଭେନସନ ସେଣ୍ଟର (ଏଚ୍ଆଇସିସି)ରେ ଆୟୋଜିତ ହେବ। ସେହିପରି ତେଲେଙ୍ଗାନା ସମ୍ପର୍କିତ ଅଧିବେଶନଗୁଡ଼ିକ ହାଇଟେକ୍ସରେ ଅନୁଷ୍ଠିତ ହେବ। ଏହି ଅଧିବେଶନଗୁଡ଼ିକରେ ଫ୍ୟୁଚର ସିଟି ଓ ସହରୀକରଣ, ଆର୍ଥିକ ଓ ସାମାଜିକ ନ୍ୟାୟ, ଜନକଲ୍ୟାଣକାରୀ ନୀତି, ସହଯୋଗୀ ସଂଘୀୟ ବ୍ୟବସ୍ଥା, ସଂସ୍କୃତି, ଯୁବକ ଓ କ୍ରୀଡ଼ା ତଥା ନିର୍ବାଚନୀ ନିରପେକ୍ଷତା ଭଳି ବିଷୟ ଉପରେ ଆଲୋଚନା ହେବ।
ଶ୍ରୀଧର ବାବୁ କହିଛନ୍ତି ଯେ, ଭାରତ ସମ୍ମିଳନୀରେ ଅଂଶଗ୍ରହଣ କରୁଥିବା ପ୍ରତିନିଧିମାନଙ୍କୁ ଡିସେମ୍ବରରେ ଆୟୋଜିତ ହେବାକୁ ଥିବା ‘ଇନଭେଷ୍ଟ ତେଲେଙ୍ଗାନା ଗ୍ଲୋବାଲ ସମିଟ୍ ୨୦୨୬’ରେ ମଧ୍ୟ ଆମନ୍ତ୍ରଣ କରାଯିବ। ଏହି କାର୍ଯ୍ୟକ୍ରମ ଡିସେମ୍ବର ୭ରୁ ୯ ତାରିଖ ପର୍ଯ୍ୟନ୍ତ ଆୟୋଜିତ ହେବ। ଏଥିରେ ସମ୍ଭାବ୍ୟ ପୁଞ୍ଜିନିବେଶର ସୁଯୋଗ ସମ୍ପର୍କରେ ଆଲୋଚନା କରାଯିବ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
