ଭୁବନେଶ୍ୱର,୧୦ ନଭେମ୍ବର (ହି.ସ.) - କୁହୁଡ଼ି ଏବଂ ପ୍ରତିକୂଳ ପାଣିପାଗ ପରିସ୍ଥିତିରେ ନିରାପଦ ଟ୍ରେନ୍ ପରିଚାଳନା ସୁନିଶ୍ଚିତ କରିବା ପାଇଁ ପୂର୍ବ ତଟ ରେଳପଥ ପକ୍ଷରୁ ୧୦ ନଭେମ୍ବର ଠାରୁ ୯ ଫେବୃଆରୀ ପର୍ଯ୍ୟନ୍ତ ତିନି ମାସିଆ ସ୍ୱତନ୍ତ୍ର ସୁରକ୍ଷା ଅଭିଯାନ ଆରମ୍ଭ କରାଯାଇଛି। ଖୋର୍ଦ୍ଧା ରୋଡ୍, ସମ୍ବଲପୁର ଏବଂ ରାୟଗଡ଼ା ମଣ୍ଡଳ ଅଧୀନରେ ସମସ୍ତ ବିଭାଗର ଅଧିକାରୀ, ପର୍ଯ୍ୟବେକ୍ଷକ ଏବଂ କର୍ମଚାରୀଙ୍କ ସହଯୋଗରେ ଏହି ଅଭିଯାନ ପରିଚାଳନା କରାଯାଉଛି।
ଏହି ଅଭିଯାନରେ ଷ୍ଟେସନଗୁଡ଼ିକରେ ବ୍ୟାପକ ପ୍ରସ୍ତୁତି, ଚଳନ୍ତା ଟ୍ରେନ୍ଗୁଡ଼ିକର ସୁରକ୍ଷା, ସିଗନାଲର ଦୃଶ୍ୟମାନତା ଏବଂ ଆବଶ୍ୟକୀୟ ସୁରକ୍ଷା ଉପକରଣର ଉପଲବ୍ଧତା ଉପରେ ବିଶେଷ ଗୁରୁତ୍ୱ ଦିଆଯାଉଛି। ଷ୍ଟେସନ୍ ପରିଚାଳକମାନଙ୍କୁ ପର୍ଯ୍ୟାପ୍ତ ପରିମାଣର ଡେଟୋନେଟର ଉପଲବ୍ଧତା ସୁନିଶ୍ଚିତ କରିବା ସହିତ କୁହୁଡ଼ି ସମୟରେ ସିଗନାଲ ସୂଚନା ପ୍ରଦାନ ପାଇଁ ନିୟୋଜିତ କର୍ମଚାରୀମାନଙ୍କୁ ଉପଯୁକ୍ତ ପ୍ରଶିକ୍ଷଣ ଦେବାକୁ ନିର୍ଦ୍ଦେଶ ଦିଆଯାଇଛି। ସିଗନାଲ ଏବଂ ନିର୍ଦ୍ଧାରିତ ଦୃଶ୍ୟମାନତା ପରୀକ୍ଷଣ ଉପକରଣଗୁଡ଼ିକର ନିୟମିତ ଭାବେ ଯାଂଚ କରାଯିବ। ସିଗନାଲର ଦୃଶ୍ୟମାନତାକୁ ପ୍ରଭାବିତ କରୁଥିବା କୁହୁଡ଼ି ପରିସ୍ଥିତି ସମ୍ପର୍କରେ ତୁରନ୍ତ ସମ୍ପୃକ୍ତ କେଂଟ୍ରାଲ୍ କାର୍ଯ୍ୟାଳୟକୁ ସୂଚିତ କରାଯିବ।
କମ୍ ଦୃଶ୍ୟମାନତା ସମୟରେ ଲୋକୋ ପାଇଲଟମାନଙ୍କୁ ସିଗନାଲ ଚିହ୍ନଟ କରିବାରେ ସହାୟତା ପାଇଁ କ୍ରୁ ଲବିଗୁଡ଼ିକରେ ପର୍ଯ୍ୟାପ୍ତ ପରିମାଣର ଫଗ୍ ସେଫ୍ ଡିଭାଇସ୍ ଉପଲବ୍ଧ କରାଯିବ। ଦୃଶ୍ୟମାନତା ବୃଦ୍ଧି କରିବା ପାଇଁ ସିଗନାଲ, ଲେଭଲ୍ କ୍ରସିଂ ଗେଟ୍ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ଥାନଗୁଡ଼ିକରେ ରେଟ୍ରୋ-ରିଫ୍ଲେକ୍ଟିଭ୍ ସୂଚକ, ଉଜ୍ଜ୍ୱଳ ସଙ୍କେତ ଷ୍ଟ୍ରିପ୍ ଏବଂ ଦୃଶ୍ୟମାନତା ବୋର୍ଡଗୁଡ଼ିକର ରକ୍ଷଣାବେକ୍ଷଣ ଉପରେ ମଧ୍ୟ ଗୁରୁତ୍ୱ ଦିଆଯିବ।
ଲୋକୋ ପାଇଲଟ୍ ଏବଂ ସହାୟକ ଲୋକୋ ପାଇଲଟ୍ ମାନଙ୍କୁ ସର୍ବାଧିକ ସତର୍କତା ଅବଲମ୍ବନ କରିବା ସହିତ ଦୃଶ୍ୟମାନତା ପରିସ୍ଥିତି ଅନୁଯାୟୀ ଟ୍ରେନ୍ ର ବେଗ ନିୟନ୍ତ୍ରଣ କରିବାକୁ ପରାମର୍ଶ ଦିଆଯାଇଛି। କୁହୁଡ଼ି ସମୟରେ ଟ୍ରେନ୍ ର ସର୍ବାଧିକ ବେଗ ଘଂଟାପ୍ରତି ୭୫ କିଲୋମିଟରରୁ ଅଧିକ ହେବ ନାହିଁ। ତେବେ ଏହା ଲୋକୋ ପାଇଲଟ୍ ଙ୍କ ବିଚାର ଏବଂ ନିର୍ଦ୍ଧାରିତ ସିଗନାଲ ସୂଚନା ଉପରେ ନିର୍ଭର କରିବ। ଯାତ୍ରା ସମୟରେ ଫଗ୍ ସେଫ୍ ଡିଭାଇସ୍ ଉପଲବ୍ଧ ନଥିଲେ କିମ୍ବା ଏହା ଅଚଳ ହୋଇଗଲେ ଟ୍ରେନ୍ ର ସର୍ବାଧିକ ବେଗ ଘଂଟାପ୍ରତି ୬୦ କିଲୋମିଟର କିମ୍ବା ତା'ଠାରୁ କମ୍ ରଖାଯିବ। ନିକଟବର୍ତୀ ଗେଟମ୍ୟାନ୍ ଏବଂ ରାସ୍ତା ବ୍ୟବହାରକାରୀଙ୍କୁ ଟ୍ରେନ୍ ଆସିବା ସମ୍ପର୍କରେ ସତର୍କ କରାଇବା ପାଇଁ ଲୋକୋ ପାଇଲଟ୍ମାନଙ୍କୁ ବାରମ୍ବାର ହୁଇସିଲ୍ ବଜାଇବାକୁ ମଧ୍ୟ ପରାମର୍ଶ ଦିଆଯାଇଛି।
ଟ୍ରେନ୍ ମ୍ୟାନେଜରମାନଙ୍କୁ ଦୃଶ୍ୟମାନତା ବାଧାପ୍ରାପ୍ତ ହେଉଥିବା ପରିସ୍ଥିତିରେ ଟ୍ରେନ୍ ର ଶେଷ ଯାନରେ ଲାଗିଥିବା ଲାଲ୍ ଟେଲ୍ ଲ୍ୟାମ୍ପ ଝଲସାଇବା ଏବଂ ନିର୍ଦ୍ଧାରିତ ଗତି ପ୍ରତିବନ୍ଧକ ପାଳନ କରିବାକୁ ନିର୍ଦ୍ଦେଶ ଦିଆଯାଇଛି । କୁହୁଡ଼ିପୂର୍ଣ୍ଣ ପାଣିପାଗରେ ସୁରକ୍ଷା ସତର୍କତା ଏବଂ ପରିଚାଳନାଗତ ପ୍ରକ୍ରିୟା ସମ୍ପର୍କରେ କର୍ମଚାରୀମାନଙ୍କୁ ମଧ୍ୟ ନିୟମିତ ପରାମର୍ଶ ଦିଆଯିବ।ଇଞ୍ଜିନିୟରିଂ ବିଭାଗ ପକ୍ଷରୁ ରେଳ ଧାରଣାରେ ଫାଟ ସୃଷ୍ଟି ହେବାର ସମ୍ଭାବନା ଥିବା ସ୍ଥାନ ଏବଂ ଅନ୍ୟାନ୍ୟ ସମ୍ବେଦନଶୀଳ ସ୍ଥାନଗୁଡ଼ିକରେ ଶୀତକାଳୀନ ପାଟ୍ରୋଲିଂ କରାଯିବ। ଗଛର ଡାଳ କାଟିବା, ବୁଦା ସଫା କରିବା ଏବଂ ରେଳ ଧାରଣା ସମ୍ବନ୍ଧୀୟ ଭିତିଭୂମିର ରକ୍ଷଣାବେକ୍ଷଣ ଉପରେ ମଧ୍ୟ ବିଶେଷ ଧ୍ୟାନ ଦିଆଯିବ। ସିଗନାଲ ଏବଂ ଟେଲିକମ୍ୟୁନିକେସନ୍ ବିଭାଗର କର୍ମଚାରୀମାନେ ସିଗନାଲ ଲାଇଟ୍ ର ସଠିକ୍ ଦୃଶ୍ୟମାନତା ଓ କାର୍ଯ୍ୟକାରିତା, ସିଗନାଲ ଗ୍ଲାସ୍ ସଫା କରିବା ଏବଂ ଲେଭଲ୍ କ୍ରସିଂଗୁଡ଼ିକରେ ଉଜ୍ଜ୍ୱଳ ସଙ୍କେତ ବ୍ୟବସ୍ଥାର ରକ୍ଷଣାବେକ୍ଷଣ ସୁନିଶ୍ଚିତ କରିବେ।
ଏହା ବ୍ୟତୀତ, ସୁରକ୍ଷା ପ୍ରସ୍ତୁତିର ସମୀକ୍ଷା କରିବା ଏବଂ ନିର୍ଦ୍ଧାରିତ ପ୍ରକ୍ରିୟାଗୁଡ଼ିକର ଅନୁପାଳନ ସୁନିଶ୍ଚିତ କରିବା ପାଇଁ ଅଧିକାରୀ ଓ ପର୍ଯ୍ୟବେକ୍ଷକମାନଙ୍କ ଦ୍ୱାରା ରାତ୍ରିକାଳୀନ ଅଚାନକ ନିରୀକ୍ଷଣ ଏବଂ ଫୁଟ୍ ପ୍ଲେଟ୍ ନିରୀକ୍ଷଣ କରାଯିବ। ଏହି ଅଭିଯାନ ସମୟରେ ରେଳ କର୍ମଚାରୀମାନଙ୍କୁ ନିୟମିତ ପରାମର୍ଶ ପ୍ରଦାନ ଏବଂ ସୁରକ୍ଷା ବ୍ୟବସ୍ଥାର ନିରନ୍ତର ତଦାରଖ କରାଯିବ।
ଏହି ସ୍ୱତନ୍ତ୍ର ପଦକ୍ଷେପ ମାଧ୍ୟମରେ କୁହୁଡ଼ି ଏବଂ ପ୍ରତିକୂଳ ପାଣିପାଗ ସମୟରେ ଟ୍ରେନ୍ ପରିଚାଳନାଗତ ବିପଦକୁ କମ୍ କରିବା ପାଇଁ ପୂର୍ବତଟ ରେଳପଥ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଉଛି। ଯାତ୍ରୀମାନଙ୍କ ସୁରକ୍ଷା ଏବଂ ନିରାପଦ ଟ୍ରେନ୍ ପରିଚାଳନାକୁ ସର୍ବୋଚ୍ଚ ପ୍ରାଥମିକତା ଦିଆଯାଉଛି।
---------------
ହିନ୍ଦୁସ୍ଥାନ ସମାଚାର / ବନ୍ଦନା
