କୋଲକାତା, ୧୦ ନଭେମ୍ବର (ହି.ସ.)। ବିଷ୍ଣୁପୁରର ପ୍ରଖ୍ୟାତ ସିତାର ବାଦକ ପଣ୍ଡିତ ମଣିଲାଲ ନାଗଙ୍କର ସୋମବାର ବିଳମ୍ବିତ ରାତିରେ କୋଲକାତାର ଏକ ହସ୍ପିଟାଲରେ ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୮୭ ବର୍ଷ ବୟସ ହୋଇଥିଲା। ତାଙ୍କ ପରିବାରରେ ପତ୍ନୀ, ଜଣେ ପୁଅ ଓ ଜଣେ ଝିଅ ଅଛନ୍ତି। ତାଙ୍କ ଝିଅ ମୀତା ନାଗ ମଧ୍ୟ ଜଣେ ସୁପରିଚିତ ସିତାର ବାଦକ। ସେ ନିଜ ପଛରେ ଅଗଣିତ ଶିଷ୍ୟଙ୍କ ଏକ ବିଶାଳ ପରିବାର ଛାଡ଼ିଯାଇଛନ୍ତି।
ବାର୍ଦ୍ଧକ୍ୟଜନିତ ରୋଗ କାରଣରୁ ବର୍ଷୀୟାନ ସିତାର ବାଦକ ଦୀର୍ଘଦିନ ଧରି ଅସୁସ୍ଥ ଥିଲେ। ୧୯୩୯ ମସିହାରେ ଜନ୍ମଗ୍ରହଣ କରିଥିବା ମଣିଲାଲ ନାଗଙ୍କୁ ସଙ୍ଗୀତ ଶିକ୍ଷା ପାରିବାରିକ ଉତ୍ତରାଧିକାରୀ ସୂତ୍ରରେ ମିଳିଥିଲା। ତାଙ୍କ ପିତା ଗୋକୁଲ ନାଗ ମଧ୍ୟ ବିଷ୍ଣୁପୁର ଘରାନାର ଜଣେ ପ୍ରତିଷ୍ଠିତ ସିତାର ବାଦକ ଥିଲେ। ମଣିଲାଲ ନିଜ ପିତାଙ୍କଠାରୁ ହିଁ ସଙ୍ଗୀତର ପ୍ରାରମ୍ଭିକ ଶିକ୍ଷା ଗ୍ରହଣ କରିଥିଲେ। ନିଜର ଦୀର୍ଘ ଓ ଗୌରବମୟ ସଙ୍ଗୀତ ଜୀବନରେ ସେ ଦେଶ ଓ ବିଦେଶର ବହୁ ପ୍ରତିଷ୍ଠିତ ମଞ୍ଚରେ ନିଜର ବାଦନର ଯାଦୁ ପ୍ରଦର୍ଶନ କରିଥିଲେ। ଏଥିସହିତ ବିଷ୍ଣୁପୁର ଘରାନାର ସମୃଦ୍ଧ ପରମ୍ପରାକୁ ବିଶ୍ୱସ୍ତରରେ ପରିଚିତ କରାଇବାରେ ମହତ୍ତ୍ୱପୂର୍ଣ୍ଣ ଅବଦାନ ରଖିଥିଲେ।
ସଙ୍ଗୀତ କ୍ଷେତ୍ରରେ ତାଙ୍କର ଅମୂଲ୍ୟ ଅବଦାନ ପାଇଁ ତାଙ୍କୁ ଅନେକ ଜାତୀୟ ଓ ଅନ୍ତର୍ଜାତୀୟ ସମ୍ମାନରେ ସମ୍ମାନିତ କରାଯାଇଥିଲା। ୨୦୦୧ ମସିହାରେ ତାଙ୍କୁ ପ୍ରତିଷ୍ଠିତ ସଙ୍ଗୀତ ନାଟକ ଏକାଡେମୀ ପୁରସ୍କାର ମିଳିଥିଲା। ସେହିପରି ୨୦୨୦ ମସିହାରେ ଦେଶର ଚତୁର୍ଥ ସର୍ବୋଚ୍ଚ ନାଗରିକ ସମ୍ମାନ 'ପଦ୍ମଶ୍ରୀ'ରେ ତାଙ୍କୁ ଭୂଷିତ କରାଯାଇଥିଲା।
ପଣ୍ଡିତ ମଣିଲାଲ ନାଗଙ୍କ ପରିବାର ପକ୍ଷରୁ ମିଳିଥିବା ସୂଚନା ଅନୁଯାୟୀ, ମଙ୍ଗଳବାର ତାଙ୍କ ମରଶରୀରକୁ ବାସଭବନରୁ ରାଜ୍ୟ ସଙ୍ଗୀତ ଏକାଡେମୀକୁ ନିଆଯିବ। ସେଠାରେ ତାଙ୍କ ପ୍ରଶଂସକ ଓ ସଙ୍ଗୀତପ୍ରେମୀମାନେ ଶେଷ ଦର୍ଶନ କରିପାରିବେ। ଏହାପରେ କାଶୀପୁର ମହାଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
