ଆଇଆଇଟିଏଫ୍ ରେ ଓଡ଼ିଶାର ଖଜୁରୀ ଗୁଡ଼'ର ବେଶ୍ ଆଦୃତି
ନୂଆଦିଲ୍ଲୀ /ଭୁବନେଶ୍ୱର, ୧୯ ନଭେମ୍ବର (ହି.ସ)- ୪୫ତମ ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା (ଆଇଆଇଟିଏଫ୍)-୨୦୨୬ର ଓଡ଼ିଶା ପାଭିଲିୟନରେ ଓଡ଼ିଶାର ପାରମ୍ପରିକ ଖଜୁରୀ ଗୁଡ଼'' ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଦର୍ଶକଙ୍କୁ ଆକର୍ଷିତ କରୁଛି । ଛୋଟ ଛୋଟ ଦାନା ଆକାରରେ ବିକ୍ରି ହେଉଥିବା ଏହି ପାରମ୍ପରିକ ମ
ଆଇଆଇଟିଏଫ୍ ରେ ଓଡ଼ିଶାର ଖଜୁରୀ ଗୁଡ଼'ର ବେଶ୍ ଆଦୃତି


ନୂଆଦିଲ୍ଲୀ /ଭୁବନେଶ୍ୱର, ୧୯ ନଭେମ୍ବର (ହି.ସ)- ୪୫ତମ ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା (ଆଇଆଇଟିଏଫ୍)-୨୦୨୬ର ଓଡ଼ିଶା ପାଭିଲିୟନରେ ଓଡ଼ିଶାର ପାରମ୍ପରିକ ଖଜୁରୀ ଗୁଡ଼' ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଦର୍ଶକଙ୍କୁ ଆକର୍ଷିତ କରୁଛି । ଛୋଟ ଛୋଟ ଦାନା ଆକାରରେ ବିକ୍ରି ହେଉଥିବା ଏହି ପାରମ୍ପରିକ ମିଠା ପଦାର୍ଥଟି ଭାରତ ମଣ୍ଡପମ୍'ରେ ଅନେକ ନୂଆ ପ୍ରଶଂସକ ସୃଷ୍ଟି କରିଛି। ଏହାର ପ୍ରାକୃତିକ ସ୍ୱାଦ, ସରଳତା ଏବଂ ଓଡ଼ିଶାର ଗ୍ରାମୀଣ ପରମ୍ପରା ସହ ଥିବା ସମ୍ପର୍କ ଯୋଗୁଁ ଏହା ମେଳାରେ ଏକ ଲୋକପ୍ରିୟ ସାମଗ୍ରୀ ପାଲଟିଛି।

ଓଡ଼ିଶା ରାଜ୍ୟ ତାଳଗୁଡ଼ ସମବାୟ ସଂଘ ଲିମିଟେଡ୍' ଦ୍ୱାରା ଉପସ୍ଥାପିତ ଏହି ଖଜୁରୀ ଗୁଡ଼କୁ ଦର୍ଶକଙ୍କ ନିକଟରେ ଏକ ଆଖୁରୁ ପ୍ରସ୍ତୁତ ଗୁଡର ବିକଳ୍ପ ଭାବରେ ପରିଚିତ କରାଯାଉଛି। ଖଜୁରୀ ରସରୁ ପ୍ରସ୍ତୁତ ଏହି ଗୁଡ଼ରେ କୌଣସି କୃତ୍ରିମ ଉପାଦାନ କିମ୍ବା ସଂରକ୍ଷକ ମିଶାଯାଇ ନଥାଏ। ଏଥିରେ କୃତ୍ରିମ ସ୍ୱାଦର ମାତ୍ରା ଅତ୍ୟନ୍ତ କମ୍ ଏବଂ ଏହାର ଗ୍ଲାଇସେମିକ୍ ଇଣ୍ଡେକ୍ସ' ମଧ୍ୟ କମ୍ ଥିବାରୁ, ଏହା ବିଭିନ୍ନ ପ୍ରକ୍ରିୟାକୃତ ମିଠା ପଦାର୍ଥର ଏକ ଉତମ ବିକଳ୍ପ ହୋଇପାରିଛି। ସଂଘର ସଦସ୍ୟମାନେ ଦର୍ଶକଙ୍କୁ ଏହା କିପରି ପ୍ରସ୍ତୁତ ହୁଏ, ଏହାର ପ୍ରାକୃତିକ ଗୁଣ ଏବଂ ପାରମ୍ପରିକ ମହତ୍ୱ ବିଷୟରେ ବୁଝାଉଛନ୍ତି। ଅଧିକ ଲୋକ ଅଧିକ ପସନ୍ଦ କରିବା ସହିତ ଓଡ଼ିଶାର ଏହି ସ୍ୱାଦକୁ ଘରକୁ ନେଉଛନ୍ତି ।

ଖଜୁରୀ ରସକୁ ଯତ୍ନର ସହ ସଂଗ୍ରହ କରାଯାଇ ପାରମ୍ପରିକ ପଦ୍ଧତିରେ ତାହାକୁ ଗୁଡ଼ରେ ପରିଣତ କରାଯାଏ। ଏହା ଗ୍ରାମୀଣ ସମ୍ପ୍ରଦାୟର ଜ୍ଞାନ, ସ୍ଥାନୀୟ ସମ୍ବଳ ଏବଂ ଏପରି ଏକ ପରମ୍ପରାର ପ୍ରତିନିଧିତ୍ୱ କରେ, ଯାହା ପରିବର୍ତନଶୀଳ ସମୟରେ ମଧ୍ୟ ନିଜର ସ୍ଥାନ ବଜାୟ ରଖିପାରିଛି। ଭାରତ ଅନ୍ତର୍ଜାତୀୟ ବାଣିଜ୍ୟ ମେଳା ମାଧ୍ୟମରେ ଖଜୁରୀ ଗୁଡ଼'ର ଏହି କାହାଣୀ ଓଡ଼ିଶାର ସୀମା ଅତିକ୍ରମ କରି ପ୍ରତ୍ୟେକ ଦର୍ଶକ ଏବଂ ପ୍ରତ୍ୟେକ କ୍ରେତାଙ୍କ ନିକଟରେ ପହଂଚିଛି ।

ଆଇଆଇଟିଏଫ୍-୨୦୨୬ ରେ ଓଡ଼ିଶାର ଅଂଶଗ୍ରହଣକୁ ନେଇ ମିଳିଥିବା ପ୍ରତିକ୍ରିୟା ବେଶ୍ ଉତ୍ସାହଜନକ ରହିଛି। ଓଡ଼ିଶା ପାଭିଲିୟନରେ ଥିବା ସମସ୍ତ ଷ୍ଟଲ୍ ଗୁଡ଼ିକରେ ମୋଟ ବିକ୍ରି ପରିମାଣ ୧୮ ଲକ୍ଷ ଟଙ୍କା ଅତିକ୍ରମ କରିଥିବା ବେଳେ, ଏଠାକୁ ଆସିଥିବା ଦର୍ଶକଙ୍କ ସଂଖ୍ୟା ୫୨,୦୦୦ ଅତିକ୍ରମ କରିଛି। ଏହି ବର୍ଦ୍ଧିତ ପ୍ରତିକ୍ରିୟା ଓଡ଼ିଶାର ବିଭିନ୍ନ ସାମଗ୍ରୀ ପ୍ରତି ଥିବା ଆଗ୍ରହକୁ ଦର୍ଶାଉଛି; ଯେଉଁଥିରେ କୃଷିଜାତ ଦ୍ରବ୍ୟ, ହସ୍ତତନ୍ତ ଓ ହସ୍ତଶିଳ୍ପ ଠାରୁ ଆରମ୍ଭ କରି ଆଦିବାସୀ ସାମଗ୍ରୀ, ଖାଦ୍ୟ ସାମଗ୍ରୀ ଏବଂ ଗ୍ରାମୀଣ ଉଦ୍ୟୋଗର ଉତ୍ପାଦଗୁଡ଼ିକ ରହିଛି । ସ୍ଥାନୀୟ ଉତ୍ପାଦକ, ସମବାୟ ସଂସ୍ଥା, କାରିଗର, ମହିଳା ଗୋଷ୍ଠୀ ଏବଂ ଉଦ୍ୟୋଗୀମାନେ ଦର୍ଶକ ତଥା ବ୍ୟାପକ ବଜାର ସହିତ ସିଧାସଳଖ ଯୋଡ଼ି ହୋଇପାରୁଛନ୍ତି ।

ଆଇଆଇଟିଏଫ୍-୨୦୨୬ ରେ, ଖଜୁରୀ ଗୁଡ଼' କେବଳ ଏକ ପାରମ୍ପରିକ ମିଠା ସାମଗ୍ରୀ ନୁହେଁ, ବରଂ ଏହା ଓଡ଼ିଶାର ମାଟି, ଏହାର ଲୋକ ଏବଂ ସେମାନଙ୍କ ପରମ୍ପରାର ଏକ କାହାଣୀ, ଯାହା ରାଜ୍ୟ ସୀମା ଅତିକ୍ରମ କରି ଦୂରଦୂରାନ୍ତ ପର୍ଯ୍ୟନ୍ତ ପହଂଚି ପାରିଛି।

---------------

ହିନ୍ଦୁସ୍ଥାନ ସମାଚାର / ବନ୍ଦନା


 rajesh pande