- ଦୈନିକ ଜଳଯୋଗାଣ ୭୨ ନିୟୁତ ଲିଟରକୁ ବୃଦ୍ଧି, ନିୟୋଜିତ ହେଲେ ୪୬ଟି ଟ୍ୟାଙ୍କର

ଭୁବନେଶ୍ୱର, ୦୨ ନଭେମ୍ବର (ହି.ସ.) - ସାମୁଦ୍ରିକ ବାତ୍ୟା ‘ଅର୍ଣ୍ଣବ’ର ପ୍ରଭାବରେ ବ୍ରହ୍ମପୁର ସହରରେ ବାଧାପ୍ରାପ୍ତ ଜଳଯୋଗାଣ ବ୍ୟବସ୍ଥାର ପୁନରୁଦ୍ଧାର ଓ ଜନସାଧାରଣଙ୍କୁ ନିରବଚ୍ଛିନ୍ନ ସୁରକ୍ଷିତ ପାନୀୟ ଜଳ ଯୋଗାଇଦେବା ଲକ୍ଷ୍ୟରେ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ୱାଟକୋ ସହଯୋଗରେ ଜରୁରୀକାଳୀନ ପଦକ୍ଷେପକୁ ଅଧିକ ତ୍ୱରାନ୍ୱିତ କରାଯାଇଛି। ବିକଳ୍ପ ଜଳଉତ୍ସର ବିନିଯୋଗ ସହ ଜାନିବିଲି ଇନଟେକ୍?ର ପୁନରୁଦ୍ଧାର କାର୍ଯ୍ୟକୁ ଯୁଦ୍ଧକାଳୀନ ଭିତିରେ ଆଗେଇ ନିଆଯାଉଛି।

ବ୍ରହ୍ମପୁର ସହରରେ ଦୈନିକ ଜଳଯୋଗାଣ ପରିମାଣକୁ ୭୨ ନିୟୁତ ଲିଟର (ଏମ୍ଏଲ୍ଡି)କୁ ବୃଦ୍ଧି କରାଯାଇଛି। ଏଥିମଧ୍ୟରୁ ୬୪ ନିୟୁତ ଲିଟର ଜଳ ଭୂପୃଷ୍ଠ ଜଳଉତ୍ସରୁ ଯୋଗାଇ ଦିଆଯାଉଥିବା ବେଳେ ଅତିରିକ୍ତ ୮ ନିୟୁତ ଲିଟର ଜଳ ୧୮ଟି ଉତ୍ପାଦନକ୍ଷମ କୂପ ମାଧ୍ୟମରେ ଯୋଗାଣ କରାଯାଉଛି। ଏହା ସହିତ ବିଭିନ୍ନ ଅଂଚଳରେ ଜଳ ବଂଟନ ବ୍ୟବସ୍ଥାକୁ ସୁଦୃଢ଼ କରିବା ନିମନ୍ତେ ୪୬ଟି ଟ୍ୟାଙ୍କର ନିୟୋଜିତ କରାଯାଇଛି। ଏଥିରେ ୧୨ଟି ଘରୋଇ ଟ୍ୟାଙ୍କର ସାମିଲ ରହିଛି।

ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲ ଏବଂ ଆଇଆଇଏସ୍?ଇଆ?ର୍କୁ ଜଳଯୋଗାଣ ପୁନଃସ୍ଥାପିତ ହୋଇଛି ଏବଂ ସ୍ୱାଭାବିକ ଭାବେ ଚାଲୁ ରହିଛି। ସେହିପରି ହିଞ୍ଜିଳିକାଟୁ ଓ ଗୋପାଳପୁରରେ ମଧ୍ୟ ଜଳଯୋଗାଣ ବ୍ୟବସ୍ଥା ସୁଚାରୁରୂପେ ଜାରି ରହିଛି।

ପାନୀୟ ଜଳର ଗୁଣବତା ଓ ଜନସ୍ୱାସ୍ଥ୍ୟର ସୁରକ୍ଷାକୁ ବିଭାଗ ପ୍ରାଥମିକତା ଦେଇଛି। ଏଥିପାଇଁ ଜଳ ବିଶୋଧନାଗାରଗୁଡ଼ିକରେ ସୁପର କ୍ଲୋରିନେସନ୍ ବ୍ୟବସ୍ଥା ଜାରି ରହିଛି। ଜଳ ବିଶୋଧନ ପ୍ରକ୍ରିୟାରେ ପ୍ରାରମ୍ଭିକ ସ୍ତରରେ ୪ ପିପିଏମ୍ ଏବଂ ଶେଷ ସ୍ତରରେ ୧୦ ପିପିଏମ୍ କ୍ଲୋରିନେସନ୍ କରାଯାଉଛି। ଏଥିସହିତ ଜଳ ବିତରଣ ବ୍ୟବସ୍ଥାର ଶେଷ ଭାଗରେ ୨ ପିପିଏମ୍ କ୍ଲୋରିନେସନ୍ ସୁନିଶ୍ଚିତ କରାଯାଉଛି। ବିଭାଗର କାର୍ଯ୍ୟକ୍ଷମ ପ୍ରସ୍ତୁତିକୁ ଅଧିକ ସୁଦୃଢ଼ କରିବା ପାଇଁ ଗୋଟିଏ ମୋବାଇଲ୍ ଟ୍ରିଟମେଂଟ ୟୁନିଟ୍ (ଏମ୍ଟିୟୁ) ବ୍ରହ୍ମପୁର ଡିଭିଜନ କାର୍ଯ୍ୟାଳୟରେ ପହଂଚିଛି।

ଜାନିବିଲି ଇନଟେକ୍ ରେ ଅସ୍ଥାୟୀ ଜଳ ଅବରୋଧ ବ୍ୟବସ୍ଥା (ଟେମ୍ପୋରାରି ପଣ୍ଡିଂ ଆରେଞ୍ଜମେଂଟ) ନିର୍ମାଣ କାର୍ଯ୍ୟ ପ୍ରାୟ ୯୯ ପ୍ରତିଶତ ସମ୍ପୂର୍ଣ୍ଣ ହୋଇଛି। ଇନଟେକ୍ ନିକଟରେ ବାଲିବନ୍ଧ ନିର୍ମାଣ କାର୍ଯ୍ୟ ଯୁଦ୍ଧକାଳୀନ ଭିତିରେ ଚାଲିଛି। ଏଥିପାଇଁ ଇତିମଧ୍ୟରେ ପ୍ରାୟ ୧୫ ହଜାର ବାଲିବସ୍ତା ବିଛାଯାଇଥିବା ବେଳେ ଆଜି ଆଉ ୫ ହଜାର ବାଲିବସ୍ତା ବିଛାଇବା ପାଇଁ ଯୋଜନା ରହିଛି। ଆବଶ୍ୟକ ଶ୍ରମଶକ୍ତି ଓ ଯନ୍ତ୍ରପାତି ନିୟୋଜିତ କରାଯାଇ ଏହି କାର୍ଯ୍ୟ ଆଗେଇ ନିଆଯାଉଛି। ପୁନରୁଦ୍ଧାର କାର୍ଯ୍ୟରେ ନିୟୋଜିତ କର୍ମଚାରୀଙ୍କ ସୁରକ୍ଷା ନିମନ୍ତେ ଘଟଣାସ୍ଥଳରେ ଓଡ୍ରାଫ୍ ଟିମ୍ ମଧ୍ୟ ମୁତୟନ କରାଯାଇଛି।

ବ୍ରହ୍ମପୁର ମହାନଗର ନିଗମ ସମେତ ପ୍ରଭାବିତ ସହରାଂଚଳ ସ୍ଥାନୀୟ ସଂସ୍ଥାଗୁଡ଼ିକରେ ଜରୁରୀକାଳୀନ ପୁନରୁଦ୍ଧାର ଓ ରିଲିଫ୍ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବା ପାଇଁ ବିଭାଗ ପକ୍ଷରୁ ଅତିରିକ୍ତ ଅଧିକାରୀଙ୍କୁ ନିୟୋଜିତ କରାଯାଇଛି। ଏହାଦ୍ୱାରା କ୍ଷେତ୍ରସ୍ତରୀୟ ସମନ୍ୱୟ ଓ ତଦାରଖ ବ୍ୟବସ୍ଥାକୁ ସୁଦୃଢ଼ କରାଯାଇଛି।

ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ସମସ୍ତ ଚାଲୁ ରହିଥିବା କାର୍ଯ୍ୟର ନିୟମିତ ତଦାରଖ କରାଯାଉଛି। ବିଶେଷକରି ଜଳଯୋଗାଣର ପରିମାଣ ବୃଦ୍ଧି, ପାନୀୟ ଜଳର ଗୁଣବତା ବଜାୟ ରଖିବା ଓ ଜାନିବିଲି ଇନଟେକ୍ ର ପୁନରୁଦ୍ଧାର ଉପରେ ଗୁରୁତ୍ୱ ଦିଆଯାଉଛି। ଜନସାଧାରଣଙ୍କ ଅସୁବିଧାକୁ ସର୍ବନିମ୍ନ କରିବା ସହ ବ୍ରହ୍ମପୁର ସହରରେ ଯଥାଶୀଘ୍ର ସ୍ୱାଭାବିକ ଜଳଯୋଗାଣ ବ୍ୟବସ୍ଥା ପୁନଃସ୍ଥାପନ ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯାଉଛି।

---------------

ହିନ୍ଦୁସ୍ଥାନ ସମାଚାର / ବନ୍ଦନା