ଜୟପୁର , , 04 ନଭେମ୍ବର (ହି.ସ.) -ପୂର୍ବତଟ ରେଳପଥ ରାୟଗଡ଼ା ରେଳ ମଣ୍ଡଳ ପକ୍ଷରୁ ରେଳ ପେନସନଭୋଗୀ ଓ ପରିବାର ପେନସନଭୋଗୀଙ୍କୁ ବାର୍ଷିକ ଜୀବନ ପ୍ରମାଣପତ୍ର ଡିଜିଟାଲ ମାଧ୍ୟମରେ ଦାଖଲ କରିବାରେ ସୁବିଧା ଯୋଗାଇଦେବା ଉଦ୍ଦେଶ୍ୟରେ 1 ନଭେମ୍ବରରୁ 30 ନଭେମ୍ବର 2026 ପର୍ଯ୍ୟନ୍ତ ଡିଜିଟାଲ ଲାଇଫ୍ ସାର୍ଟିଫିକେଟ୍ ଅଭିଯାନ 5.0 ଆୟୋଜନ କରାଯାଉଛି। ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ ହେଉଛି ଡିଜିଟାଲ ପ୍ରଯୁକ୍ତିର ଉପଯୋଗ ମାଧ୍ୟମରେ ଜୀବନ ପ୍ରମାଣପତ୍ର ଦାଖଲ ପ୍ରକ୍ରିୟାକୁ ସରଳ, ଦ୍ରୁତ ଓ ସୁବିଧାଜନକ କରିବା ସହିତ ଅବସରପ୍ରାପ୍ତ ରେଳ କର୍ମଚାରୀ ଏବଂ ସେମାନଙ୍କ ପରିବାରକୁ ଏହି ସେବା ସହଜରେ ଉପଲବ୍ଧ କରାଇବା।ଏହି ଅଭିଯାନର ଅଂଶ ଭାବେ ରାୟଗଡ଼ା ମଣ୍ଡଳ ମୁଖ୍ୟାଳୟ ସମେତ କୋରାପୁଟ, ଜଗଦଲପୁର ଓ ଆରାକୁଠାରେ ସ୍ୱତନ୍ତ୍ର ଶିବିର ଆୟୋଜନ କରାଯାଉଛି। ଏହି ଶିବିରଗୁଡ଼ିକରେ ପେନସନଭୋଗୀ ଓ ପରିବାର ପେନସନଭୋଗୀଙ୍କୁ ଡିଜିଟାଲ ଲାଇଫ୍ ସାର୍ଟିଫିକେଟ୍ ପ୍ରସ୍ତୁତି ଓ ଦାଖଲ କରିବା ପାଇଁ ଆବଶ୍ୟକ ସହାୟତା ଏବଂ ମାର୍ଗଦର୍ଶନ ଯୋଗାଇ ଦିଆଯାଉଛି।ରାୟଗଡ଼ାସ୍ଥିତ ମଣ୍ଡଳ ରେଳ ପ୍ରବନ୍ଧକ (କାର୍ମିକ)ଙ୍କ କାର୍ଯ୍ୟାଳୟ ସମେତ କୋରାପୁଟ, ଜଗଦଲପୁର ଓ ଆରାକୁଠାରେ ନିର୍ଦ୍ଧାରିତ କାର୍ଯ୍ୟାଳୟଗୁଡ଼ିକରେ ଏହି ଶିବିର ପରିଚାଳନା କରାଯାଉଛି। ୮୦ ବର୍ଷ ଓ ତଦୁର୍ଦ୍ଧ୍ୱ ବୟସର ଅତି ବରିଷ୍ଠ ପେନସନଭୋଗୀଙ୍କୁ ଏହି ପ୍ରକ୍ରିୟା ସୁବିଧାରେ ସମ୍ପନ୍ନ କରିବା ପାଇଁ ସ୍ୱତନ୍ତ୍ର ସହାୟତା ଓ ପ୍ରାଥମିକତା ପ୍ରଦାନ କରାଯାଉଛି।ଏହି ସୁବିଧାର ଲାଭ ନେବାକୁ ଇଚ୍ଛୁକ ରେଳ ପେନସନଭୋଗୀ ଓ ପରିବାର ପେନସନଭୋଗୀମାନଙ୍କୁ ନିଜ ସହିତ ଆଧାର କାର୍ଡ, ପେନସନ ପେମେଣ୍ଟ ଅର୍ଡର (PPO), ବ୍ୟାଙ୍କ ପାସବୁକ୍ ଏବଂ ଆଧାର ସହିତ ସଂଯୁକ୍ତ ମୋବାଇଲ୍ ଫୋନ୍ ଆଣିବାକୁ ଅନୁରୋଧ କରାଯାଉଛି, ଯାହାଦ୍ୱାରା ଡିଜିଟାଲ ଲାଇଫ୍ ସାର୍ଟିଫିକେଟ୍ ପ୍ରସ୍ତୁତି ଓ ଦାଖଲ ପ୍ରକ୍ରିୟା ସୁଗମ ହୋଇପାରିବ।ଏହି ଅଭିଯାନ ମାଧ୍ୟମରେ ରାୟଗଡ଼ା ମଣ୍ଡଳ ଡିଜିଟାଲ ପ୍ରଯୁକ୍ତିର ଉପଯୋଗ ସହିତ ଅବସରପ୍ରାପ୍ତ ରେଳ କର୍ମଚାରୀ ଓ ସେମାନଙ୍କ ପରିବାରକୁ ସୁଗମ, ଦକ୍ଷ ଏବଂ ପେନସନଭୋଗୀ ଅନୁକୂଳ ସେବା ଯୋଗାଇଦେବା ପାଇଁ ନିଜର ପ୍ରତିବଦ୍ଧତାକୁ ପୁନର୍ବାର ଦୋହରାଇଛି।
---------------
ହିନ୍ଦୁସ୍ଥାନ ସମାଚାର / ପିକେପି
