ଦରଭଙ୍ଗା, ୦୫ ନଭେମ୍ବର (ହି.ସ.)- କେନ୍ଦ୍ରୀୟ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତନ ମନ୍ତ୍ରୀ ଭୂପେନ୍ଦ୍ର ଯାଦବ ଏସ୍ଆଇଆରକୁ ଗଣତନ୍ତ୍ର ପାଇଁ ଜରୁରୀ ବୋଲି କହିଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଦେଶରେ ଏହି ପ୍ରକ୍ରିୟା ପ୍ରଥମ ଥର ହେଉନାହିଁ। ୧୯୫୦ ମସିହାଠାରୁ ଏପର୍ଯ୍ୟନ୍ତ ଆଠ ଥର ଏସ୍ଆଇଆର ହୋଇସାରିଛି। ଏଥର ନବମ ଥର ପାଇଁ ଏହି ପ୍ରକ୍ରିୟା ଆପଣାଯାଉଛି। ଗଣତାନ୍ତ୍ରିକ ମୂଲ୍ୟବୋଧ ଓ ବ୍ୟବସ୍ଥାର ସୁଦୃଢ଼ତା ବଜାୟ ରହିବା ଜରୁରୀ ବୋଲି ସେ କହିଛନ୍ତି।

ଗୁରୁବାର ଦରଭଙ୍ଗାରେ ଜାତୀୟ ଗଣତାନ୍ତ୍ରିକ ମେଂଟ (ଏନ୍ଡିଏ)ର ‘ଗଣତନ୍ତ୍ର ବଂଚାଅ, ଅରାଜକତା ହଟାଅ’ ପଦଯାତ୍ରାରେ କେନ୍ଦ୍ରୀୟ ମନ୍ତ୍ରୀ ଭୂପେନ୍ଦ୍ର ଯାଦବ ମୁଖ୍ୟ ଅତିଥି ଭାବେ ସାମିଲ ହୋଇଥିଲେ। ତାଙ୍କ ସହ ଜନତା ଦଳ ୟୁନାଇଟେଡ୍ (ଜେଡିୟୁ)ର ଜାତୀୟ କାର୍ଯ୍ୟକାରୀ ଅଧ୍ୟକ୍ଷ ସଞ୍ଜୟ ଝା ଏବଂ ବିହାର ବିଜେପିର ରାଜ୍ୟ ସଭାପତି ସଞ୍ଜୟ ସରାୱଗୀ ମଧ୍ୟ ଉପସ୍ଥିତ ଥିଲେ।

ଲହେରିଆସରାୟସ୍ଥିତ ପୋଲୋ ମଇଦାନର ଧାରଣାସ୍ଥଳରୁ ଆରମ୍ଭ ହୋଇଥିବା ରାଲିରେ କେନ୍ଦ୍ରୀୟ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତନ ମନ୍ତ୍ରୀ ଭୂପେନ୍ଦ୍ର ଯାଦବ କହିଥିଲେ ଯେ, ଏସ୍ଆଇଆର ଦେଶ ପାଇଁ ଏବଂ ଦେଶର ଗଣତନ୍ତ୍ର ପାଇଁ ଜରୁରୀ। ଗଣତାନ୍ତ୍ରିକ ବ୍ୟବସ୍ଥାକୁ ସୁଦୃଢ଼ ରଖିବା ପାଇଁ ଏହି ପ୍ରକ୍ରିୟାର ଗୁରୁତ୍ୱ ରହିଛି। ଏସ୍ଆଇଆରକୁ ବିରୋଧ କରୁଥିବା ଲୋକମାନେ ଅନୁପ୍ରବେଶକାରୀଙ୍କ ଦ୍ୱାରା ଭାରତୀୟ ନାଗରିକମାନଙ୍କୁ ପରାସ୍ତ କରାଇବାରେ ଲାଗିଛନ୍ତି ବୋଲି ସେ କହିଥିଲେ।

ଭୂପେନ୍ଦ୍ର ଯାଦବ ସ୍ପଷ୍ଟ କରିଥିଲେ ଯେ, ଏସ୍ଆଇଆରରେ କାହାରି ନାମ କଟାଯାଇପାରିବ ନାହିଁ। ସମସ୍ତ ରାଜନୈତିକ ଦଳର ବୁଥ୍ ସ୍ତରୀୟ ଏଜେଂଟ (ବିଏଲ୍ଏ) ରହିଛନ୍ତି। ପୂର୍ବ ନିର୍ବାଚନରେ ରାଜନୈତିକ ଦଳଗୁଡ଼ିକର ୧ ଲକ୍ଷ ୭୦ ହଜାର ବିଏଲ୍ଏ ଥିଲେ, କିନ୍ତୁ ସୁପ୍ରିମକୋର୍ଟରେ ମାତ୍ର ଦୁଇଟି ଆପତି ଦାଖଲ କରାଯାଇଥିଲା। ଯାଂଚ ପରେ ସୁପ୍ରିମକୋର୍ଟ ଏସ୍ଆଇଆର ପ୍ରକ୍ରିୟାକୁ ସମ୍ପୂର୍ଣ୍ଣ ଠିକ୍ ବୋଲି କହିଥିଲେ।

କେନ୍ଦ୍ରୀୟ ମନ୍ତ୍ରୀ କହିଥିଲେ ଯେ, କଂଗ୍ରେସ ସରକାର ସମୟରେ ଏସ୍ଆଇଆର ପାଇଁ ଚାରୋଟି ଦସ୍ତାବିଜର ବିକଳ୍ପ ଥିଲା। ବର୍ତମାନର ସରକାର ଏହାକୁ ବଢ଼ାଇ ୧୧ଟି କରିଛନ୍ତି। ଏଥିମଧ୍ୟରୁ ଯେକୌଣସି ଗୋଟିଏ ଦସ୍ତାବିଜ ଦେଖାଇ ବ୍ୟକ୍ତି ନିଜ ନାମ ଯୋଡ଼ାଇପାରିବେ ଏବଂ ମତଦାନ ପ୍ରକ୍ରିୟାରେ ଭାଗ ନେଇପାରିବେ।

---------------

ହିନ୍ଦୁସ୍ଥାନ ସମାଚାର / ଗଗନ