ପ୍ରାଟୋ/ନୂଆଦିଲ୍ଲୀ, ୫ ନଭେମ୍ବର (ହି.ସ.)- ବୟନ ମନ୍ତ୍ରଣାଳୟ ସଚିବ ନୀଲମ ଶାମି ରାଓ ତାଙ୍କ ପ୍ରତିନିଧିମଣ୍ଡଳ ସହିତ ବୟନ ଏବଂ ଫ୍ୟାଶନ୍ କ୍ଷେତ୍ରରେ ଭାରତ ଏବଂ ଇଟାଲୀ ମଧ୍ୟରେ ରଣନୈତିକ ଏବଂ ବୈଷୟିକ ସମ୍ପର୍କକୁ ଆହୁରି ଘନିଷ୍ଠ କରିବା ପାଇଁ ଇଟାଲୀ ଗସ୍ତ କରିଛନ୍ତି । ତାଙ୍କ ନେତୃତ୍ୱରେ ପ୍ରତିନିଧିମଣ୍ଡଳୀ ସେମାନଙ୍କ ଗସ୍ତର ତୃତୀୟ ଦିନରେ ଇଟାଲୀର ପ୍ରସିଦ୍ଧ ବୟନ ଉତ୍ପାଦନ କେନ୍ଦ୍ର ପ୍ରାଟୋର ଏକ ବ୍ୟାପକ ଗସ୍ତ କରିଥିଲେ ।
ମନ୍ତ୍ରଣାଳୟ ଅନୁଯାୟୀ, ବୁଧବାର ଦିନ, ନୀଲମ ଶାମି ରାଓ କନଫିଣ୍ଡଷ୍ଟ୍ରିଆ ଟୋସ୍କାନା ନର୍ଡର ଅଧ୍ୟକ୍ଷଙ୍କ ସହିତ ଦ୍ୱିପାକ୍ଷିକ ଆଲୋଚନା କରିଥିଲେ । ଏହା ପରେ ଆୟୋଜିତ ଏକ ସ୍ୱତନ୍ତ୍ର ସେମିନାରରେ ଭାରତ-ଇଟାଲୀ ସହଯୋଗ, ପ୍ରଯୁକ୍ତିବିଦ୍ୟା ବିନିମୟ, ନିବେଶ ଏବଂ ଶିଳ୍ପ ସହଭାଗୀତା ଉପରେ ଗୁରୁତ୍ୱାରୋପ କରାଯାଇଥିଲା ।
ସେମିନାର ସମୟରେ, ଇଣ୍ଡିଆ ଟେକ୍ସ ୨୦୨୭'କୁ ବିଶ୍ୱ ବୟନ ଶିଳ୍ପ ପାଇଁ ଏକ ପ୍ରମୁଖ ପ୍ଲାଟଫର୍ମ ଭାବରେ ଉପସ୍ଥାପିତ କରାଯାଇଥିଲା, ଯାହା ଉଭୟ ଦେଶର ଶିଳ୍ପପତିଙ୍କ ପାଇଁ ନୂତନ ବ୍ୟବସାୟ ସୁଯୋଗ ପ୍ରଦାନ କରିଥିଲା । ସେମିନାର ପରେ, ଭାରତୀୟ ଏବଂ ଇଟାଲୀୟ ନିର୍ମାତାଙ୍କ ମଧ୍ୟରେ ସିଧାସଳଖ ବାଣିଜ୍ୟ, ସାମଗ୍ରୀ ଯୋଗାଣ ଏବଂ ନୂତନ ଚୁକ୍ତିନାମା ଉପରେ ଧ୍ୟାନ ଦେଇ ମୁହାଁମୁହିଁ ବ୍ୟବସାୟିକ ବୈଠକ ଅନୁଷ୍ଠିତ ହୋଇଥିଲା ।
ସେମିନାର ସମୟରେ, ପ୍ରତିନିଧିମଣ୍ଡଳ ପ୍ରାଟୋରେ ବୟନ ଉତ୍ପାଦନ ୟୁନିଟ୍ ଗୁଡିକର ପ୍ରାତ୍ୟକ୍ଷ ପରିଦର୍ଶନ କରିଥିଲେ । ଇଟାଲୀୟ ଉତ୍ପାଦନ ବିଶେଷଜ୍ଞତା, ବୃତାକାର ବୟନ ଅର୍ଥନୀତି ଏବଂ ସ୍ଥାୟୀ ଉତ୍ପାଦନ ପଦ୍ଧତି ଗୁଡିକର ଗହନ ଅବଲୋକନ କରାଯାଇଥିଲା ।
ଭାରତ-ୟୁରୋପିୟ ସଂଘ ମୁକ୍ତ ବାଣିଜ୍ୟ ଚୁକ୍ତିନାମା (ଏଫଟିଏ) ର ପୃଷ୍ଠଭୂମିରେ, ଏହି ଗସ୍ତ ଦୁଇ ଦେଶ ମଧ୍ୟରେ ଦୀର୍ଘକାଳୀନ ଆର୍ôଥକ ସହଭାଗୀତାକୁ ରେଖାଙ୍କିତ କରିଥିଲା ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
05 Nov 2026
