ନୂଆଦିଲ୍ଲୀ, ୦୭ ନଭେମ୍ବର (ହି.ସ.)। ଦେଶର ବିଭିନ୍ନ ଅଞ୍ଚଳରେ ପାଣିପାଗରେ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ଉତ୍ତର ଭାରତରେ ଥଣ୍ଡା ଓ କୁହୁଡ଼ିର ପ୍ରଭାବ ବଢ଼ୁଥିବା ବେଳେ ଦକ୍ଷିଣ ଭାରତରେ ପ୍ରବଳ ବର୍ଷା ପାଇଁ ସତର୍କ ସୂଚନା ଜାରି ହୋଇଛି। ଦିଲ୍ଲୀ-ଏନ୍ସିଆର୍ରେ ଆଗାମୀ ତିନି ଦିନ ପର୍ଯ୍ୟନ୍ତ ସକାଳ ସମୟରେ କୁହୁଡ଼ି ରହିବାର ସମ୍ଭାବନା ରହିଛି।
ଭାରତୀୟ ପାଣିପାଗ ବିଭାଗ (ଆଇଏମ୍ଡି) ଅନୁଯାୟୀ, ଦିଲ୍ଲୀ-ଏନ୍ସିଆର୍ରେ ଆସନ୍ତା ୮ରୁ ୧୦ ନଭେମ୍ବର ମଧ୍ୟରେ ସକାଳ ସମୟରେ ମଧ୍ୟମରୁ ହାଲୁକା କୁହୁଡ଼ି ଦେଖାଦେବାର ସମ୍ଭାବନା ରହିଛି। ଏହି ସମୟରେ ସର୍ବାଧିକ ତାପମାତ୍ରା ୨୬ରୁ ୩୦ ଡିଗ୍ରୀ ସେଲସିୟସ୍ ଏବଂ ସର୍ବନିମ୍ନ ତାପମାତ୍ରା ୧୩ରୁ ୧୬ ଡିଗ୍ରୀ ସେଲସିୟସ୍ ମଧ୍ୟରେ ରହିପାରେ। ଏହାବ୍ୟତୀତ ୧୧ରୁ ୧୩ ନଭେମ୍ବର ମଧ୍ୟରେ ପଶ୍ଚିମା ଝଡ଼ର ପ୍ରଭାବରେ ଦିଲ୍ଲୀ, ହରିୟାଣା ଓ ପଞ୍ଜାବର କେତେକ ସ୍ଥାନରେ ସ୍ୱଳ୍ପ ବର୍ଷା ହେବାର ଆଶଙ୍କା ରହିଛି।
ବାୟୁମଣ୍ଡଳର ନିମ୍ନସ୍ତରରେ ସୃଷ୍ଟି ହୋଇଥିବା ଘୂର୍ଣ୍ଣିବଳୟର ପ୍ରଭାବରେ ଦକ୍ଷିଣ ଉପଦ୍ୱୀପ ଭାରତରେ ବର୍ଷା ଜାରି ରହିବ। ୮ରୁ ୧୦ ନଭେମ୍ବର ମଧ୍ୟରେ ତାମିଲନାଡୁ, ପୁଡୁଚେରୀ ଓ କରାଇକାଲ୍ରେ ଏବଂ ୮ ନଭେମ୍ବରରେ କେରଳ ଓ ମାହେରେ ଘଣ୍ଟାପ୍ରତି ୩୦ରୁ ୫୦ କିଲୋମିଟର ବେଗରେ ପବନ ବହିବା ସହ ପ୍ରବଳ ବର୍ଷା ହେବାର ଆକଳନ କରାଯାଇଛି।
ସେହିପରି ୧୦ ନଭେମ୍ବରରୁ ସକ୍ରିୟ ହେବାକୁ ଥିବା ନୂତନ ପଶ୍ଚିମା ଝଡ଼ ଯୋଗୁଁ ଉତ୍ତର-ପଶ୍ଚିମ ହିମାଳୟ ଅଞ୍ଚଳରେ ପାଣିପାଗରେ ପରିବର୍ତ୍ତନ ଆସିବ। ୧୦ରୁ ୧୩ ନଭେମ୍ବର ମଧ୍ୟରେ ଜମ୍ମୁ-କଶ୍ମୀର, ଲଦାଖ, ହିମାଚଳ ପ୍ରଦେଶ ଓ ଉତ୍ତରାଖଣ୍ଡରେ ବର୍ଷା ଏବଂ ଝଡ଼ତୋଫାନ ହେବାର ସମ୍ଭାବନା ରହିଛି। ବିଶେଷକରି ୧୨ ନଭେମ୍ବରରେ କଶ୍ମୀର ଉପତ୍ୟକାର କେତେକ ସ୍ଥାନରେ ପ୍ରବଳ ବର୍ଷା କିମ୍ବା ତୁଷାରପାତ ହୋଇପାରେ।
ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜରେ ୮ରୁ ୧୩ ନଭେମ୍ବର ମଧ୍ୟରେ ବ୍ୟାପକ ବର୍ଷା ଏବଂ ୯ରୁ ୧୩ ନଭେମ୍ବର ମଧ୍ୟରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଏହାବ୍ୟତୀତ, ଉତ୍ତର-ପୂର୍ବ ଭାରତର ଆସାମ, ମେଘାଳୟ, ନାଗାଲାଣ୍ଡ, ମଣିପୁର, ମିଜୋରାମ ଓ ତ୍ରିପୁରାର କେତେକ ଅଞ୍ଚଳରେ ୧୦ରୁ ୧୧ ନଭେମ୍ବର ମଧ୍ୟରେ ପ୍ରବଳ ବର୍ଷା ହେବାର ଆଶଙ୍କା ରହିଛି।
ହିନ୍ଦୁସ୍ଥାନ ସମାଚାର / ସ୍ୱାଗତିକା
