ଅସୁନସିଓନ୍, ୦୭ ନଭେମ୍ବର (ହି.ସ.)। ଦକ୍ଷିଣ ଆମେରିକୀୟ ଦେଶ ପାରାଗୁଏରେ ବ୍ୟାଙ୍କିଂ ଦୁର୍ନୀତି ଏକ ବଡ଼ ରାଜନୈତିକ ସଙ୍କଟ ସୃଷ୍ଟି କରିଛି। ଉଏନୋ ବ୍ୟାଙ୍କର ଆର୍ଥିକ ସଙ୍କଟ ଏବଂ କଥିତ ଅନିୟମିତତା ପରେ ରାଷ୍ଟ୍ରପତି ସାଣ୍ଟିଆଗୋ ପେନାଙ୍କୁ ମହାଭିଯୋଗ ଜରିଆରେ ପଦରୁ ହଟାଇ ଦିଆଯାଇଛି। ତାଙ୍କ ସ୍ଥାନରେ ଉପରାଷ୍ଟ୍ରପତି ପେଡ୍ରୋ ଏଲିଆନା ଶୁକ୍ରବାର ଦେଶର ୫୩ତମ ରାଷ୍ଟ୍ରପତି ଭାବେ ଶପଥ ଗ୍ରହଣ କରିଛନ୍ତି। ଏହି ଘଟଣା ପରେ ପାରାଗୁଏର ରାଜନୀତିରେ ହଟଚମଟ ସୃଷ୍ଟି ହୋଇଛି।
ଅନ୍ତର୍ଜାତୀୟ ଇଂରାଜୀ ନ୍ୟୁଜ୍ ଚ୍ୟାନେଲ ଅଲ୍ ଜଜିରାର ରିପୋର୍ଟ ଅନୁଯାୟୀ, ଶୁକ୍ରବାର ପାରାଗୁଏର ୪୫ ସଦସ୍ୟ ବିଶିଷ୍ଟ ସିନେଟ୍ରେ ରାଷ୍ଟ୍ରପତି ପେନାଙ୍କୁ ପଦରୁ ହଟାଇବା ପାଇଁ ଭୋଟିଂ ହୋଇଥିଲା। ଏଥିରେ ୪୪ ଜଣ ସିନେଟର ମହାଭିଯୋଗ ସପକ୍ଷରେ ଭୋଟ୍ ଦେଇଥିବା ବେଳେ ଜଣେ ସଦସ୍ୟ ଭୋଟିଂରେ ଭାଗ ନେଇନଥିଲେ। ଏହା ପୂର୍ବରୁ ନିମ୍ନ ସଦନ ଚାମ୍ବର ଅଫ୍ ଡେପୁଟିଜ୍ ମଧ୍ୟ ୭୮-୦ ଭୋଟ୍ରେ ମହାଭିଯୋଗକୁ ସମର୍ଥନ କରିଥିଲା।
ପଦରୁ ହଟିବା ପରେ ପେନା ସାମାଜିକ ଗଣମାଧ୍ୟମରେ ଲେଖିଥିଲେ ଯେ, ସେ କୃତଜ୍ଞତାର ସହ ବିଦାୟ ନେଉଛନ୍ତି ଏବଂ ଏହି ପୂରା ଘଟଣାରେ ଏବେ ବି ଉତ୍ତର ଅପେକ୍ଷାରେ ଥିବା ଲୋକଙ୍କ ଯନ୍ତ୍ରଣାକୁ ସେ ବୁଝିପାରୁଛନ୍ତି।
ପାରାଗୁଏରେ ଏହି ରାଜନୈତିକ ସଙ୍କଟର ମୁଖ୍ୟ କାରଣ ଉଏନୋ ବ୍ୟାଙ୍କର ଆର୍ଥିକ ସଙ୍କଟ ବୋଲି କୁହାଯାଉଛି। ଦେଶର କେନ୍ଦ୍ରୀୟ ବ୍ୟାଙ୍କ ମଙ୍ଗଳବାର ସୂଚନା ଦେଇଥିଲା ଯେ, ଉଏନୋ ବ୍ୟାଙ୍କ ଆର୍ଥିକ ସ୍ଥିରତା ସମ୍ପର୍କିତ ଆଇନଗତ ମାନଦଣ୍ଡ ପୂରଣ କରିବାରେ ବିଫଳ ହୋଇଛି। ଏହା ପରେ ବ୍ୟାଙ୍କର ଲକ୍ଷ ଲକ୍ଷ ଗ୍ରାହକଙ୍କ ଜମା ଟଙ୍କା, ବ୍ୟାଙ୍କ ଖାତା ଏବଂ ପେନ୍ସନ୍ ପ୍ରଦାନକୁ ନେଇ ସଙ୍କଟ ସୃଷ୍ଟି ହୋଇଥିଲା। ପ୍ରାୟ ୩୦ ଲକ୍ଷ ଗ୍ରାହକ ଥିବା ଏହି ବ୍ୟାଙ୍କ ପାରାଗୁଏର ମୋଟ ବୟସ୍କ ଜନସଂଖ୍ୟାର ପ୍ରାୟ ଦୁଇ-ତୃତୀୟାଂଶ ଲୋକଙ୍କୁ ସେବା ଯୋଗାଉଥିଲା। ଜମା ରାଶି ଦୃଷ୍ଟିରୁ ଏହା ଦେଶର ପଞ୍ଚମ ବୃହତ୍ତମ ବ୍ୟାଙ୍କ ହୋଇପାରିଥିଲା।
ହିନ୍ଦୁସ୍ଥାନ ସମାଚାର / ସ୍ୱାଗତିକା
