ଭୁବନେଶ୍ୱର, ୧୯ ଫେବୃଆରୀ (ହି.ସ.) - ଓଡ଼ିଶା ସରକାର ‘ନମସ୍ତେ’ ଯୋଜନାର କାର୍ଯ୍ୟକାରିତା ମାଧ୍ୟମରେ ପରିମଳ କର୍ମୀ ଏବଂ ବର୍ଜ୍ୟବସ୍ତୁ ସଂଗ୍ରହକାରୀଙ୍କ ଜୀବିକା, ନିରାପତା ଏବଂ ମର୍ଯ୍ୟାଦାକୁ ସୁଦୃଢ଼ କରିବା ପାଇଁ ପ୍ରୟାସକୁ ତ୍ୱରାନ୍ୱିତ କରିଛନ୍ତି। ସାମାଜିକ ନ୍ୟାୟ ଓ ସଶକ୍ତିକରଣ ମନ୍ତ୍ରଣାଳୟ ଏବଂ ଗୃହ ଓ ନଗର ଉନ୍ନୟନ ମନ୍ତ୍ରଣାଳୟର ସମନ୍ୱୟରେ ଜୁଲାଇ ୨୦୨୩ରେ ଆରମ୍ଭ ହୋଇଥିବା ଏହି ଯୋଜନା, ବିପଜ୍ଜନକ ସଫେଇ ପ୍ରଥାର ବିଲୋପ ସହ ସାରା ଦେଶରେ ସୁରକ୍ଷିତ, ଯାନ୍ତ୍ରିକ ଏବଂ ମର୍ଯ୍ୟାଦାପୂର୍ଣ୍ଣ ପରିମଳ କାର୍ଯ୍ୟକୁ ପ୍ରୋତ୍ସାହିତ କରିବାକୁ ଲକ୍ଷ୍ୟ ରଖିଛି।
‘ନମସ୍ତେ’ ଯୋଜନାର ମୂଳ ଉଦ୍ଦେଶ୍ୟ ହେଉଛି ସ୍ୱେରେଜ୍ ଏବଂ ସେପ୍ଟିକ୍ ଟାଙ୍କିର ବିପଜ୍ଜନକ ସଫେଇ କାର୍ଯ୍ୟରେ ନିୟୋଜିତ ବ୍ୟକ୍ତିମାନଙ୍କୁ ଆନୁଷ୍ଠାନିକ ସ୍ୱୀକୃତି ପ୍ରଦାନ କରିବା ଓ ସେମାନଙ୍କର ପୁନର୍ବାସ ନିଶ୍ଚିତ କରିବା ସହ ପରିମଳ କାର୍ଯ୍ୟରେ ଶୂନ୍ୟ ମୃତ୍ୟୁହାର ନିଶ୍ଚିତ କରିବା। ଏହି କାର୍ଯ୍ୟକ୍ରମ ମାନବ ବର୍ଜ୍ୟବସ୍ତୁ ସହ ପ୍ରତ୍ୟକ୍ଷ ସଂସ୍ପର୍ଶକୁ ରୋକିବା, ସୁରକ୍ଷା ଉପକରଣର ବାଧ୍ୟତାମୂଳକ ବ୍ୟବହାର, ବୃତିଗତ କୌଶଳ ପ୍ରଶିକ୍ଷଣ ଏବଂ ନିରାପଦ ସେବା ପ୍ରଦାନ ପାଇଁ ‘ଜରୁରୀକାଳୀନ ସ୍ୱଚ୍ଛତା ପ୍ରତିକ୍ରିୟା ୟୁନିଟ୍’ ର ସୁଦୃଢ଼ୀକରଣ ଉପରେ ଗୁରୁତ୍ୱାରୋପ କରେ। ଏହା ସ୍ୱଚ୍ଛତା କର୍ମୀଙ୍କ ଆର୍ôଥକ ସଶକ୍ତିକରଣ ପାଇଁ ସ୍ୱୟଂ ସହାୟକ ଗୋଷ୍ଠୀ ଗଠନ ଏବଂ ଉଦ୍ୟୋଗିତା ସୁଯୋଗକୁ ମଧ୍ୟ ପ୍ରୋତ୍ସାହନ ଦେଉଛି।
ଏହି ଯୋଜନାର ପ୍ରମୁଖ ଉପାଦାନଗୁଡ଼ିକ ମଧ୍ୟରେ ସ୍ୱେରେଜ୍ ଓ ସେପ୍ଟିକ୍ ଟାଙ୍କି କର୍ମୀଙ୍କ ତଥ୍ୟ ସଂଗ୍ରହ , ବୃତିଗତ ନିରାପତା ପ୍ରଶିକ୍ଷଣ, ପିପିଇ କିଟ୍ ପ୍ରଦାନ, ଆୟୁଷ୍ମାନ ଭାରତ-ପିଏମଜେଏୱାଇ ଅଧୀନରେ ସ୍ୱାସ୍ଥ୍ୟ ବୀମା କଭରେଜ୍, ପରିମଳ ଗାଡ଼ି ଓ ଯନ୍ତ୍ରପାତି ପାଇଁ ଅଗ୍ରୀମ ପୁଞ୍ଜି ସହାୟତା ଏବଂ ପରିମଳ ସେବାରେ ସୁରକ୍ଷା ଓ ସମ୍ମାନକୁ ସୁଦୃଢ଼ କରିବା ପାଇଁ ସଚେତନତା ଅଭିଯାନ ଅନ୍ତର୍ଭୁକ୍ତ।
ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଉଷା ପାଢ଼ୀ ଗୁରୁତ୍ୱାରୋପ କରିଛନ୍ତି ଯେ, ଓଡ଼ିଶାର ‘ଗାରିମା’ ଅଭିଯାନ ସହ ‘ନମସ୍ତେ’ ଯୋଜନାର ସମନ୍ୱୟ ଶ୍ରମର ମର୍ଯ୍ୟାଦା, ସାମାଜିକ ସୁରକ୍ଷା ଏବଂ ସ୍ୱଚ୍ଛତା କର୍ମୀ ଓ ବର୍ଜ୍ୟବସ୍ତୁ ସଂଗ୍ରହକାରୀଙ୍କ ଦୀର୍ଘକାଳୀନ ଜୀବିକା ନିଶ୍ଚିତ କରିବା ଦିଗରେ ସରକାରଙ୍କ ନିରନ୍ତର ଧ୍ୟାନକୁ ପ୍ରତିଫଳିତ କରୁଛି, ଯେଉଁମାନେ ସହରର ପରିମଳ ଓ ଜନସ୍ୱାସ୍ଥ୍ୟ ବ୍ୟବସ୍ଥାର ମୁଖ୍ୟ ଆଧାର। ବର୍ତମାନ ଓଡ଼ିଶା ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ମାଧ୍ୟମରେ ଏହି କର୍ମୀମାନଙ୍କ ପଞ୍ଜୀକରଣ ପ୍ରକ୍ରିୟା ଜାରି ରହିଛି।
କଠିନ ବର୍ଜ୍ୟବସ୍ତୁ ପରିଚାଳନାରେ ନିୟୋଜିତ ବର୍ଜ୍ୟବସ୍ତୁ ସଂଗ୍ରହକାରୀଙ୍କୁ ଏହି ଯୋଜନାରେ ଅନ୍ତର୍ଭୁକ୍ତ କରିବାର ଲକ୍ଷ୍ୟ ହେଉଛି ପଞ୍ଜୀକରଣ ଅଭିଯାନ, ବୃତିଗତ ନିରାପତା ପ୍ରଶିକ୍ଷଣ, ଦକ୍ଷତା ବିକାଶ କାର୍ଯ୍ୟକ୍ରମ, ଆବଶ୍ୟକୀୟ ପିପିଇ କିଟ୍, ସ୍ୱାସ୍ଥ୍ୟ ବୀମା ଏବଂ ବର୍ଜ୍ୟ ସଂଗ୍ରହ ଗାଡ଼ି ସହ ସ୍ୱୟଂ ନିଯୁକ୍ତି ନିମନ୍ତେ ଆର୍ôଥକ ସହାୟତା ମାଧ୍ୟମରେ ସେମାନଙ୍କୁ ସୁରକ୍ଷିତ, ସମ୍ମାନଜନକ ଏବଂ ସ୍ଥାୟୀ ଜୀବିକା ପ୍ରଦାନ କରିବା।
---------------
ହିନ୍ଦୁସ୍ଥାନ ସମାଚାର / ବନ୍ଦନା
